काठमाडौं– सौगात मल्ल, बुद्धि तामाङ र दीया पुनलगायत कलाकारको अभिनय रहेको चलचित्र ‘मन्त्र’ आजदेखि देशव्यापी प्रदर्शनमा आउने भएको छ । उक्त चलचित्रको बुधबार साँझ राजधानीको बिग मुभिजमा ‘ग्राण्ड प्रिमियर’ गरिएको थियो ।
प्रिमियरमा पूर्वप्रधानमन्त्री डा. बाबुराम भट्टराईदेखि सिनेमा क्षेत्रका चर्चित अनुहारहरूको उपस्थिति थियो । अभिनेता दीपकराज गिरी, अभिनेत्री एवं निर्देशक दीपाश्री निरौला, अभिनेता एवं निर्देशक निश्चल बस्नेत, अभिनेता वीपिन कार्की, कलाकार एवं निर्देशक नरेश पौड्याल, गायक युवराज चौलागाईं, मोडल निराजन प्रधानलगायतको उपस्थिति थियो ।
करिब पाँच हजार १०० मिटरभन्दा माथिको उचाईमा रहेको मनास्लु हिमालको बेसक्याम्प क्षेत्रमा छायांकन गरिएको यस सिनेमा हिमाली प्रेमकथामा आधारित रहेको बताइएको छ । ‘मन्त्र’ को प्रेमियर हेरिसकेपछि अभिनेता गिरीले सिनेमाको छायांकनस्थलले सबैभन्दा बढी लोभ्याउने बताए । ‘सिनेमा जुन ठाउँमा छायांकन गरिएको छ, त्यो छायांकनस्थलले सबैभन्दा बढी लोभ्याउँछ । सिनेमामा हामी हिमाललाई क्लोजसँग हेर्न पाउँछौं,’ उनले भने । उनले ‘मन्त्र’मा फरक खालको लभस्टोरी पाइएको बताउँदै सिनेमामा बोनसका रूपमा कमेडीसँगै हिमालका दृश्यहरू, ब्याकग्राउण्ड स्टोरी रहेको प्रतिक्रिया दिए ।
खिलबहादुर गुरुङको निर्देशनमा तयार भएको सिनेमा ‘मन्त्र’मा नमिता तामाङ, पासाङ टी शेर्पा र वीरबहादुर लामालगायतको पनि अभिनय रहेको छ । सुरेश कार्की, रविराज कार्की र सुभ श्रेष्ठ निर्माता रहेको चलचित्रको कार्यकारी निर्माता देवेन्द्र मानन्धर हुन् । परिक्षेद सेनको कथा रहेको चलचित्रमा साम्तेन भुटिया, सुनिल निउरे र सेन स्वयंको पटकथा, सञ्जय लामाको छायांकन एवं मित्र डी गुरुङको सम्पादन छ । सिनेमाको काठमाडौंबाहिर एफडी कम्पनी र उपत्यकामा काफिया फिल्मस्ले वितरणको जिम्मा लिएका छन् ।
-1787143572.jpg)
