काठमाडौं– प्रेस काउन्सिल नेपालका अध्यक्ष बालकृष्ण बस्नेतले फोटो सत्य, तथ्य र निष्पक्ष हुुनुपर्ने बताएका छन् । फोटो पत्रकार क्लव ‘पिजे क्लव’ नेपालले ९५औँ राष्ट्रिय फोटो पत्रकारिता दिवसको अवसरमा मंगलबार आयोजना गरेको फोटो प्रदर्शनीको उद्घाटन समारोहमा उनले उक्त कुरा बताएका हुन् । सबै पत्रकारले पत्रकारिताको मूल्य मान्यता र आचारसंहिताअनुसार काम गर्नुपर्ने उनको भनाइ थियो ।
नेपाल पत्रकार महासंघका अध्यक्ष विपुल पोखरेलले फोटोले पाठकलाई थप आकर्षित र समाचारलाई थप विश्वसनीय बनाउने बताए । उनले पत्रकारिता पेसालाई सुरक्षित बनाउन सरकारले बनाउने कानुन प्रेसमैत्री हुनुपर्ने बताए । पिजे क्लवकी अध्यक्ष श्रुती श्रेष्ठले क्लवले फोटो पत्रकारका पेसागत हक, हित र सुरक्षामा काम गर्दै आएको जानकारी दिइन् । राजनीतिक, आर्थिक, सामाजिक, साँस्कृतिकलगायत क्षेत्रमा काम गर्दा फोटो पत्रकारले भोग्नुपरेको जोखिमहरूलाई समावेश गरेर प्रदर्शनी आयोजना गरिएको उनले बताइन् ।
क्लवले ‘लेन्सबाट फोटो पत्रकारिता’ शीर्षकमा फोटो प्रदर्शनी आयोजना गरेको हो । वसन्तपुरमा आयोजित प्रदर्शनीमा फोटो पत्रकारहरूले कार्यसम्पादन गर्दा भोग्नुपरेका चुनौती र जोखिम झल्काउने ३० वटा फोटा राखिएका थिए ।
नेपाल पत्रकार महासंघ र सेन्टर फर मिडिया रिसर्च नेपालसँगको सहकार्यमा प्रदर्शनी आयोजना गरेको क्लवका महासचिव प्रकाशचन्द्र तिमसिल्नाले जानकारी दिए । ‘एउटा फोटो खिच्न पत्रकारले कति मेहनत गर्नुपर्छ भन्ने देखाउन फोटो प्रदर्शनी आयोजना गरेका हौं,’ उनले भने ।
-ज्ञानी ढकाल, प्रशिक्षार्थी पत्रकार
