काठमाडौवासीको धारामा आउन थाल्यो मेलम्चीको पानी

प्रवास

Home
प्रवास
काठमाडौवासीको धारामा आउन थाल्यो मेलम्चीको पानी

काठमाडौवासीको धारामा आउन थाल्यो मेलम्चीको पानी

काठमाडौं– काठमाडौं उपत्यकामा मेलम्चीको पानी पुनः वितरण गर्न थालिएको छ । मेलम्चीबाट छाडिएको पानी सुन्दरीजल आइपुगेपछि वितरण सुरु गरिएको हो । आइतबार खानेपानीमन्त्री उमाकान्त चौधरीले काठमाडौं उपत्यका खानेपानी लिमिटेड, बानेश्वर शाखाको कार्यालयमा चाबी (भल्भ) खोलेर पुनः वितरण सुरु गरे । काठमाडौं उपत्यका खानेपानी लिमिटेड (केयुकेएल)ले आइतबार पाँच करोड लिटर पानी वितरण गरिएको जानकारी दिएको थियो । पहिलो दिन महाँकाल चौर र नयाँ बानेश्वर शाखाबाट पानी वितरण गरिएको छ । सोमबारबाट थप पानी आउने र थप स्थानमा वितरण गरिने केयुकेएलले जानकारी दिएको छ । उक्त अवसरमा मन्त्री चौधरीले आफूले मन्त्रालयको जिम्मेवारी सम्हाल्दा गरेको प्रतिबद्धताका आधारमा पानी ल्याइएको बताए । उनका अनुसार अझै पनि कतिपय संरचना सम्पन्न हुन बाँकी भएकामा तत्कालका लागि पानी पथान्तरण गरिएको उनले बताए । गत वर्ष बाढीपहिरोका कारण मुहानको माथिल्लो तटीय क्षेत्रमा पुगेको क्षतिका बारेमा दातृ निकाय एसियाली विकास बैंकले विस्तृत अध्ययन गरिरहेको उनले बताए । सो अध्ययनको प्रतिवेदन आएपछि सबै निकायसँगको समन्वयमा मर्मत गरिने उनले बताए । उनले भने, ‘वर्षायाममा मेलम्चीमा क्षति पुग्ने भए पनि पूर्वसूचना दिने प्रणाली सुरु गरिएको छ ।’ खानेपानी मन्त्रालयका सचिव सुरेश आचार्यले अहिले अस्थायी प्रक्रियाबाट पानी काठमाडौं ल्याइएको बताए । उपत्यकामा रहेका १० ट्यांकीबाट खानेपानी वितरण गरिनेछ । वर्षामा सुरुङ बन्द गर्नुपर्ने अवस्था आउँदा बागमतीको पानी वितरण गरिने उनले जानकारी दिए । काठमाडौं उपत्यका खानेपानी व्यवस्थापन बोर्डका कार्यकारी निर्देशक सञ्जीवविक्रम राणाले गत वर्ष नभएकामा यस वर्ष भक्तपुरमा पनि पानी वितरण गरिने बताए । एक÷दुई दिन बिराएर उपभोक्ताका घरघरमा पानी वितरण हुने उनको भनाइ छ । आयोजना कार्यान्वयन निर्देशनालयका प्रमुख राजेन्द्र सापकोटाले निर्देशनालयले सुन्दरीजलबाट उपभोक्ताका घरघरमा पानी पु¥याउन आवश्यक संरचना निर्माण गरेको बताए । आवश्यक संरचना निर्माण सकिएको उनको भनाइ छ । काठमाडौं उपत्यका खानेपानी लिमिटेडका प्रमुख कार्यकारी अधिकृत मिलन शाक्यले गत वर्ष केही समय पानी वितरण गरिएको भए पनि बाढीका कारण वितरण ठप्प हुँदा नागरिक निराश भएको बताए । उनका अनुसार अहिले पुनः पानी आउँदा नागरिकमा आशा पलाएको छ । लिमिटेडका बानेश्वर शाखा प्रमुख नारायण कर्णले शाखाले तालिका प्रकाशित गरेर आम उपभोक्तालाई पानी वितरणबारे जानकारी गराइरहेको बताए । –सृजना कुँवर, प्रशिक्षार्थी पत्रकार

प्रकाशित मिति: सोमबार, वैशाख १२, २०७९ ०८:३४

प्रतिक्रिया दिनुहोस्