काठमाडौं– स्वास्थ्य तथा जनसंख्या मन्त्रालयले जनस्वास्थ्यका मापदण्ड पालना गर्न अनुरोध गरेको छ । मन्त्रालयका प्रवक्ता डा. संगीताकौशल मिश्राले बिहीबार विज्ञप्ति जारी गर्दै कोरोना भाइरसको संक्रमण छिमेकी मुलुक भारतमा बढ्दै गएपछि नेपालमा पनि संक्रमणको जोखिम रहेकाले जनस्वास्थ्यका मापदण्ड पालना गर्न अनुरोध गरेकी हुन् ।
‘कोभिड–१९ को संक्रमण भारतलगायत छिमेकी राष्ट्रमा पछिल्लो केही दिनमा बढ्दो क्रममा रहेको वर्तमान अवस्थामा संक्रमणको जोखिम कायम नै रहेकाले संक्रमण रोकथाम तथा नियन्त्रणका लागि प्रभावकारी भूमिका बढाउन संवेदनशील भई जिम्मेवार बनी जनस्वास्थ्यको मापदण्ड पालना गर्न÷गराउन मन्त्रालयले सबैलाई अनुरोध गर्दछ,’ उनले जारी गरेको विज्ञप्तिमा उल्लेख छ ।
प्रवक्ता डा.मिश्राले संख्यात्मकरूपमा संक्रमण केही कम भएजस्तो देखिए पनि महामारीको जोखिम कायमै रहेको उल्लेख गरेकी छन् । मन्त्रालयले खोप लगाएको तीन महिना पूरा भएकालाई बुस्टर मात्रा खोप लगाउनसमेत आग्रह गरेको छ । मन्त्रालयले कोभिड–१९ विरुद्धको पूर्णमात्रा खोप लगाउन, खोप लगाउन प्रेरित गर्न र जारी खोप अभियानमा साथ दिनका लागिसमेत सबैलाई आग्रह गरेको छ ।
दैनिक संक्रमण १५ जनाभन्दा कम
वैशाख महिनाको पहिलो हप्तामा संक्रमण १५ जनाभन्दा कममा देखिएको छ । मन्त्रालयको तथ्यांकअनुसार वैशाख १ गते चार जनामा संक्रमण देखिएको थियो । यस्तै वैशाख ७ गते १३ जनामा संक्रमण देखिएको थियो । वैशाख २ मा १४, वैशाख ३ मा नौ, वैशाख ४ गते १२, वैशाख ५ गते १० र वैशाख ६ गते १० जनामा संक्रमण देखिएको तथ्यांक छ ।
