काठमाडौं– वैदेशिक रोजगारीमा जाने श्रमिकको संख्या तीन गुणाले बढेको छ । गत आर्थिक वर्षको तुलनामा चालु आर्थिक वर्षको नौ महिनामै तीन गुणा बढी रोजगारीका लागि विदेशिएका हुन् । वैदेशिक रोजगार विभागको तथ्यांकअनुसार चालु आर्थिक वर्षको चैत मसान्तसम्म चार लाख ६४ हजार ४६५ श्रमिक विभिन्न देशमा रोजगारीका लागि गएका छन् । यो संख्या गत आर्थिक वर्षभरिको भन्दा तीन गुणाले बढी हो । गत आर्थिक वर्षमा वैदेशिक रोजगारीमा जानेको संख्या एक लाख ६६ हजार ६९६ जना रहेको थियो ।
गत आवमा कोरोना भाइरस (कोभिड–१९) संक्रमण उच्च भएका कारण रोजगार गन्तव्य मुलुकहरूले श्रमिक लिएका थिएनन् । त्यसले गर्दा नेपालबाट विदेशिने श्रमिकको संख्यामा कमी आएको थियो । चालु आवमा कोरोना संक्रमणको अवस्था सामान्य बनेका कारण गन्तव्य मुलुक खुला भएसँगै रोजगारीमा जानेको संख्या बढेको वैदेशिक रोजगार विभागको ताहाचल कार्यालयका प्रमुख रमेश अर्यालले बताए ।
अघिल्ला दुई आर्थिक वर्षमा कोभिडले प्रभाव पारेको भए पनि चालु आर्थिक वर्षमा रोजगारीका लागि विदेशिनेको संख्यामा उल्लेख्य वृद्धि भएको उनले बताए । नौ महिनामा नै उल्लेख्य संख्यामा रोजगारीका लागि नेपाली श्रमिक विदेशिएको भन्दै कार्यालय प्रमुख अर्यालले वैदेशिक रोजगारीको क्षेत्र पुरानै लयमा फर्किने अवस्थामा रहेको जानकारी दिए ।
अर्याललका अनुसार चालु आर्थिक वर्षको नौ महिनामा नेपालबाट दुई लाख १० हजार ५६७ जना पुनः श्रम स्वीकृति लिएर विदेश गएका छन् । यही अवधिमा दुई लाख २० हजार ५५८ जना संस्थागत श्रम स्वीकृति लिएर विदेश गएको तथ्यांक छ । त्यस्तै व्यक्तिगत रूपमा नयाँ श्रम स्वीकृति लिएर रोजगारीका लागि विदेश जानेको संख्या १५ हजार छ जना रहेको छ । त्यस्तै वैधानिकीकरणबाट आठ हजार ३१६ जना श्रमिक विदेश गएको विभागको तथ्यांक छ ।
गत वर्षको पूरा अवधिमा नेपालबाट पुनः श्रम स्वीकृति लिएर रोजगारीका लागि विदेश जानेको संख्या ७२ हजार ८१ रहेको थियो । उक्त आवमा सबैभन्दा बढी व्यक्तिगत पुनः श्रम स्वीकृति लिएर विदेश गएका थिए । जसमा ९४ हजार ६१७ जना रोजगारीका लागि विदेशिएको देखिएको छ । संस्थागत रूपमा श्रम स्वीकृति लिएर रोजगारीमा जानेको संख्या ६१ हजार ४२८ जना रहेको थियो । वैधानिकीकरणमार्फत पाँच हजार ३३६ र व्यक्तिगत नयाँ श्रम स्वीकृति लिएर जानेको संख्या पाँच हजार ३१७ जना रहेको थियो ।
अहिलेको तथ्यांकलाई हेर्दा वैदेशिक रोजगारीको क्षेत्र कोभिड–१९ पहिलेकै अवस्थमा पुग्ने सम्भावना रहेको सरोकारवालाहरूले बताउने गरेका छन् । ताहाचल कार्यालयका प्रमुख अर्यालले कोभिडका कारण समस्यामा परेको क्षेत्रमा विस्तारै सुधार देखिन थालेको बताए । अहिले दैनिक एक हजारभन्दा बढीले श्रम स्वीकृति लिने गरेको उनले बताए । उनका अनुसार कोभिडपूर्वको सामान्य अवस्थामा ताहाचल कार्यालयबाट कम्तीमा पनि एक हजार जनाले श्रम स्वीकृति लिने गरेका थिए ।
-1745656903.jpeg)