काठमाडौं– नेपालबाट रोजगारीका लागि विदेश पठाउने संस्थाहरूले पनि आज (शुक्रबार) देखि श्रम स्वीकृति अनलाइनमार्फत लिनुपर्ने भएको छ । गत २ माघदेखि पुनः श्रम स्वीकृतिको कार्य अनलाइनमार्फत गर्दै आएकोमा शुक्रबारदेखि संस्थागत रूपमा नयाँ श्रम स्वीकृति पनि अनलाइनबाट लिनुपर्ने भएको हो ।
कार्यालयमा हुने भीडभाडलाई कम गर्ने र प्रविधिको प्रयोग गरेर सेवा लिनका लागि सबै कार्य अनलाइनमार्फत गर्न लागिएको वैदेशिक रोजगार विभागले जानकारी दिएको छ । श्रम स्वीकृतिसम्बन्धी सम्पूर्ण काम अनलाइन प्रणालीमा लगिएसँगै वैदेशिक रोजगार कार्यालय ताहाचलमा हुने भीडभाड कम हुने विभागका महानिर्देशक शेषनारायण पौडेलले बताए । कुनै समय हजारौँको उपस्थिति हुने कार्यालय अहिले सुनसानजस्तै हुन थालेको वैदेशिक रोजगार विभाग ताहाचल कार्यालयका सूचना अधिकारी हरिराम नागिलाले बताए । व्यक्तिगत श्रम स्वीकृति अनलाइनबाट गर्दा नै शून्यजस्तो बन्न पुगेको कार्यालय परिसर अब अझ सुनसान हुने उनको भनाइ छ ।
अनलाइनमार्फत सेवाप्रवाह गर्दा सहजसमेत हुने गरेको उनको भनाइ छ । कुनै समस्या उत्पन्न भएर घरमै रहेको समयमा पनि सेवा प्रवाह गर्न सकिने भएकाले अनलाइन प्रणाली सहज देखिएको उनले बताए । विभागले केही समयअघि नै सूचना जारी गर्दै सम्बन्धित इजाजतपत्रवाला संस्था, सेवाग्राही र सरोकारवाला सबैलाई संस्थागत श्रम स्वीकृति अनलाइन प्रणालीबाट मात्रै हुने जानकारी गराइसकेको छ । पहिलो आउने सेवाग्राहीलाई पहिलो सेवा प्रदान गरिने र त्यसका लागि तीन दिन अगाडि श्रम स्वीकृतिका लागि अनलाइनबाट निवेदन दिनुपर्ने विभागले जनाएको छ ।
स्वघोषणा अनिवार्य
यसैबीच, व्यक्तिगत श्रम स्वीकृति लिएर वैदेशिक रोजगारीमा जाने व्यक्तिले स्वघोषणापत्र अनिवार्यरूपमा भर्नुपर्ने भएको छ । विभागले नेपाली नयाँ वर्षको सुरुआतसँगै यो व्यवस्था कार्यान्वयनमा ल्याएको हो । भिजिट भिसा तथा व्यक्तिगत श्रम स्वीकृतिमा जाने अधिकांश नेपाली विदेशमा अलपत्र पर्न थालेपछि सरकारले स्वघोषणापत्र अनिवार्य रूपमा भर्नुपर्ने व्यवस्था गरेको हो ।
वैदेशिक रोजगारीका नाममा भिजिट भिसा र व्यक्तिगत श्रम स्वीकृति लिएर गएका व्यक्ति अलपत्र पर्ने, ठगिने, सरकारले तोकेकोभन्दा बढी शुल्क तिर्न बाध्य पारिनेजस्ता प्रवृत्ति देखिएपछि स्वघोषणापत्र भर्नुपर्ने व्यवस्था गरिएको वैदेशिक रोजगार विभागले जनाएको छ । वैदेशिक रोजगारीमा व्यक्तिगत रूपमा जाने व्यक्तिले श्रम स्वीकृति लिँदा नै त्यस्तो स्वघोषणापत्र भर्नुपर्ने जनाइएको छ ।
विभागले ‘व्यक्तिगत श्रम स्वीकृति लिने प्रक्रियासम्बन्धी निर्देशिका–२०६९’ अनुसार सो व्यवस्था लागू गरेको जनाएको छ । व्यक्तिगत श्रम स्वीकृतिमा वैदेशिक रोजगारीमा जाने श्रमिकले राहदानीको प्रतिलिपि, सम्बन्धित सरकारबाट जारी प्रवेशाज्ञाको प्रतिलिपि, रोजगार सेवा, सर्त, सुविधा र तलब स्पष्ट उल्लेख भएको करार वा सम्झौतापत्रको प्रतिलिपि दूतावासमा पेस गर्नुपर्ने बताइएको छ ।
