काठमाडौं– शिक्षामन्त्री देवेन्द्र पौडेलले स्वदेशका कलेजहरूले नै नयाँ विषयहरूको पठनपाठन शुरूवात गरेमा उच्च शिक्षाका लागी नेपाली विद्यार्थीहरू विदेश जान नपर्ने बताएका छन् । लिंकन युनिभर्सिटी कलेज मलेसियाअन्तर्गतका एघार वटा कलेजहरूको दीक्षन्त समारोहलाई सम्बोधन गर्दै उनले स्वदेशी विद्यार्थीहरूले नेपालका कलेजहरूमा उच्च शिक्षा लिन सक्ने गरी आवश्यक वातावरण मिलाउन कलेज सञ्चालकहरूलाई आग्रहसमेत गरे ।
लिंकन युनिभर्सिटी कलेज एसोसिएट्स अफ नेपाल (लुक्यान)का अध्यक्ष रेश्ता झाले लिंकन युनिभर्सिटीमा आबद्ध कलेजहरूले उपलब्ध गराउँदै आएको अन्तर्राष्ट्रियस्तरको शिक्षाका विशेषता बारे प्रकाश पारिन् । लिंकन युनिभर्सिटी कलेजका प्रेसिडेन्ट प्रा.डा. अमिया भौमिकको सभापतित्वमा भएको समारोहमा कलेजका प्रो चान्सलर दातुक डाक्टर हज्जा बीबी फेलिरना अब्दुल्लाहले दीक्षित विद्यार्थीहरूको उज्वल भविष्यको कामना गरेका थिए । लुकानका महासचिव लक्ष्मण पोखेरेलले लिंकन युनिभर्सिटी मातहतका कलेजहरूले समय सापेक्ष गुणस्तरीय शिक्षालाई उच्च प्राथमिकता दिने बताए ।
समारोहमा दीक्षित विद्यार्थीहरूले आ–आङ्खनो अनुभव सुनाउँदै स्वदेशमै अन्तर्राष्ट्रियस्तरको गुणस्तरीय शिक्षा पाएर गौरवान्वित भएको बताए । लिंकन युनिभर्सिटी कलेज अन्तर्गत एकेडेमी अफ कलिनरी आर्ट हस्पिटालिटी एण्ड म्यानेजमेन्ट, फिनिक्स कलेज अफ म्यानेजमेन्ट, टेक्सस् कलेज अफ म्यानेजमेन्ट एण्ड आईटी, आईआईएमएस लिंकन इन्टरनेसनल कलेज, के. एफ. ए विजनेस स्कुल एण्ड आइटी, वेस्टर्न मेगा कलेज, नेपाल विजनेस कलेज, एन् सी एम टी कलेज, पोखरा लिंकन इन्टरनेसनल कलेज, ग्रिन पिस लिंकन कलेज, बाल्मिकी लिंकन कलेज सञ्चालित छन् । समारोहमा व्याचलर तथा मार्टर्स दुवै सेमेष्टरका विद्यार्थीहरू दीक्षित भएका हुन् ।
कार्यक्रममा दिपक बज्राचार्यको व्यान्ड ‘रिदम’ ले साङ्गीतिक प्रस्तुति दिएको थियो । लिंकन युनिभर्सिटी कलेज हाल गुणस्तरीय शिक्षाका लागि विश्वमै ३५औं स्थानमा रहेको छ । हाल विश्वविद्यालयले व्यवस्थापन, होटल व्यवस्थापन र सूचना प्रविधिमा स्नातक, स्नातकोत्तर र विद्यावारिधी तहका शैक्षिक पाठ्क्रमहरू संचालन गरिरहेको लुक्यानका कोषाध्यक्ष सविन्द्र महर्जनले जानकारी दिए । ललितपुरको गोदावरीमा सम्पन्न समारोहमा २५ सयभन्दा बढी विद्यार्थी दीक्षित भएका थिए ।
