काठमाडौं– अभिनेत्री करिश्मा मानन्धरले आफ्नो न्वारनको नाम थाहा पाएपछि धेरैलाई पोल्न थालेको बताएकी छन् । नेकपा एमाले प्रवेश गरेकी मानन्धरले गत सोमबार कपिलवस्तुमा गरेको एउटा भाषण निकै चर्चामा आयो ।
उनले आफ्नो न्वारानको नाम उल्लेख गर्दै आफू जन्मजात नै एमाले भएको बताएकी थिइन् । उनले भनेकी थिइन्, ‘मेरो न्वारनका नाम नै सूर्यकुमारी भएकाले म जन्मजात एमाले हुँ ।’ कार्यक्रममा आफ्नो न्वारनको नाम भन्दा ट्रोल भएकी करिश्माले सामाजिक सञ्जाल फेसबुक मार्फत यस्तो बताएकी हुन् ।
करिष्माको उक्त टिप्पणीले सामाजिक सञ्जालदेखि कलाकारिता क्षेत्रमा ठूलै तरंग ल्यायो । तर, करिष्मालाई यी कुराले फरक पारेन । आफ्नो भाषणका कारण चर्चामा आएकी करिष्माले लोकप्रियतालाई थप अर्को उचाईंमा पु¥याउन सामाजिक सञ्जालको प्रयोग गरिन् । उनले बिहीबार बिहान सामाजिक सञ्जाममा आफ्नो नाम सूर्य कुमारी भएको थाहा पाउँदा धेरैलाई पोलेको र भिटामिन डि प्राप्त भएको भन्दै व्यंग्य गरिन् ।
‘सूर्य कुमारी, मेरो न्वारानको नाम थाहा पाउँदा धेरैलाई पोल्यो, भिटामिन डि प्राप्त भयो,’ करिष्माले लेखेकी छन्, ‘राम्रै भयो ।’ उनले आफ्नो भाषणमा आएको प्रतिक्रियामाथि दिएको प्रतिक्रिया पनि भाषणजस्तै चर्चामा आइरहेको छ ।
मानन्धरले आफ्नो र पार्टीका अध्यक्ष केपी शर्मा ओलीको तस्बिर राख्दै दिएको यो अभिव्यक्तिले अहिले सामाजिक सञ्जाल तताएको छ । करिष्माको राजनीतिक करिअरमा एमाले दोस्रो पार्टी हो । यसअघि उनी बाबुराम भट्टराई आवद्ध रहेको ‘नयाँ शक्ति’ पार्टीमा थिइन् । चुनावको मिति नजिकिँदै गर्दा एमालेमा प्रवेश गरेकी करिश्माले मिश्रित प्रतिक्रिया पाइरहेकी छन् ।
