पाल्पा– आगामी निर्वाचनमा बदर मत न्यूनीकरण गर्न जिल्लास्तरीय सरोकारवाला निकायबीच समन्वय कार्यक्रम भएको छ । मतदाता शिक्षा अभियान सञ्चालन नै गरी बदर मत कम गर्न र गराउने थालिएको हो । दलित महिला तथा सीमान्तकृत समुदायको निर्वाचन र राजनीतिक सहभागिता अभिवृद्धिका लागि मतदाता शिक्षा अभियान सञ्चालन गरिएको हो ।
मंगलबार दलित महिला संघ, पाल्पा युएसएआइडी र आइइएसको सहयोगमा पाल्पामा दलित महिला तथा सीमान्तकृत समुदायको निर्वाचन र राजनीतिक सहभागिता अभिवृद्धिका लागि मतदाता शिक्षा अभियानअन्तर्गत ‘मेरो मत मेरो अधिकार, बन्छ सुनौलो भविष्यको आधार, आफू सिकौँ र अरु थप पाँच जनालाई पनि सिकाऔँ’ भन्ने नाराका साथ सो समन्वय कार्यक्रम सम्पन्न भएको छ । जिल्लास्तरीय सरोकारवाला निकायबीच भएको सो कार्यक्रममा जिल्लाका चार स्थानीय तहमा २० अभियन्ताले मतदाता शिक्षासम्बन्धी सचेतना गर्नेछन् ।
पाल्पा जिल्लाको तानसेन नगरपालिका, बगनासकाली, रिब्दीकोट, रम्भा गाउँपालिकामा सञ्चालित मतदाता शिक्षा अभियानअन्तर्गत स्थानीय तहसँग समन्वय, समुदाय अभिमुखीकरण, नमूना मतदान, सडक नाटक र घरदैलो कार्यक्रम सञ्चालन गर्ने दलित महिला संघका जिल्ला संयोजक तुल्सी बुढाप्रितीले बताईन् ।
कार्यक्रममा नेकपा एमालेका जिल्ला अध्यक्ष धनेन्द्रराज घिमिरे, नेपाली कांग्रेसका उपाध्यक्ष झपेन्द्र गहिरे, नेकपा माओवादीका मधुरा ढकाल, नेकपा एकीकृत समाजवादीका सचिव मोहन गैरे, राजमोका अध्यक्ष विशाल दर्लामीले नागरिकमा दिइने मतदाता शिक्षाका कारण बदर मत न्यून हुने बताए ।
जिल्ला प्रशासन कार्यालय पाल्पाका प्रशासकीय अधिकृत रमा श्रेष्ठ र निर्वाचन कार्यालय पाल्पाका सूचना अधिकारी कल्पना पौडेलले जनप्रतिनिधि छनोट गर्ने अधिकार नागरिकको रहेकाले मतदान प्रक्रियामा बदर मत कम गर्न र गराउने अभियान सफल बनाउनुपर्ने बताए । सरकारी निकायबाट सञ्चालन गर्नुपर्ने काम दलित महिला संघबाट सञ्चालन हुनु र नागरिकलाई सचेत बनाउने काम राम्रो भएको उनले बताए ।
संघका जिल्ला अध्यक्ष शान्ता गहतराजले दलित तथा सीमान्तकृत समुदायका महिला स्थानीय सरकारको नेतृत्वमा देखिनुपर्ने दलित समुदायको माग रहेको बताईन् । कार्यक्रममा जिल्लाका राजनीतिक दलका प्रमुख, जिल्ला प्रशासन कार्यालय पाल्पा, जिल्ला निर्वाचन कार्यालयका प्रतिनिधि, सञ्चारकर्मी, तथा सरोकारवाला निकायबीच छलफल सम्पन्न भएको हो ।
