विराटनगर– संखुवासभा, मादी नगरपालिका–६ सातघुम्तीस्थित सडकमा मादीबाट झापातर्फ जाँदै गरेको बस दुर्घटना हुँदा चालक सहित १५ जनाको मृत्यु भएको छ । बिहीबार बिहान मादीबाट झापातर्फ जाँदै गरेको बा.४ ख ७३५ नम्बरको बस सडकबाट अन्दाजी ३ सय मिटर तल खसेर दुर्घटना हुँदा चालक सहित १५ जनाको मृत्यु भएको छ भने ४ जना घाइते भएका छन् ।
दुर्घटनामा मादी नगरपालिका–६ बस्ने ३० वर्षीया सिता बिक, ३२ वर्षीया अञ्जना कटुवाल, ५ वर्षीया दिक्षा कटवाल, सोही नगरपालिका–५ बस्ने बसका सहचालक उमेश भट्टराई, ४९ वर्षीय भवानी प्रसाद दाहाल, ४८ वर्षीय दिपक कुमार दाहाल, ५५ वर्षीय श्याम शेर्पा, सोही नगरपालिका–२ बस्ने ४२ वर्षीय ईन्द्र अधिकारी, सोही नगरपालिका–४ बस्ने ६० वर्षीय बल बहादुर कार्की, २८ वर्षीया सबिता कार्की, आईत बहादुर तामाङ, बसका चालक तेह्रथुम फाक्चामारा बस्ने ३१ वर्षीय विपिन निरौला, ताप्लेजुङ घर भएका ३१ वर्षीया समिक्षा योञ्जन र ताप्लेजुङकै ८ वर्षीय सुदिप घिसिङको घटनास्थलमै मृत्यु भएको छ भने मादी नगरपालिका–५ बस्ने २७ वर्षीया युका पोखरेलको प्राथमिक स्वास्थ्य केन्द्र चैनपुर हुँदै घोपा धरानमा उपचारको क्रममा मृत्यु भएको हो ।
दुर्घटनाको खबर प्राप्त हुनासाथ तत्काल जिल्ला प्रहरी कार्यालय संखुवासभा र ईलाका प्रहरी कार्यालय चैनपुरबाट खटिएको प्रहरीले दुर्घटनामा घाइते भएका युका पोखरेल समेत ५ जनालाई उद्धार गरी लगिएकोमा थप उपचारको लागि नेपाली सेनाको हेलिकप्टरद्वारा धरान घोपा पठाएको थियो ।
दोलखा, गौरीशंकर गाउँपालिका–४ स्थित सडकमा ना.६ त २७७५ नम्बरको ट्याक्टर आफैँ अनियन्त्रित भई सडकबाट करिब २ सय मिटर तल खसेर विहिबार दिउँसो दुर्घटना हुँदा ट्याक्टरमा सवार गौरीशंकर गाउँपालिका–४ गोर्तान बस्ने ३३ वर्षीय लिला बहादुर खत्रीको घटनास्थलमै मृत्यु भएको छ । दुर्घटनामा घाइते भएका चालक सोही गाउँपालिका बस्ने २१ वर्षीय आङ फुर्वा शेर्पा लगायत ४ जना उपचार पश्चात डिस्चार्ज भएका छन् । ट्याक्टर चालकलाई प्रहरीले नियन्त्रणमा लिएको छ ।
घाइतेलाई थप उपचारका लागि धरान लगियो
बस दुर्घटनाका घाइते पाँच जनालाई हेलिकप्टरबाट थप उपचारका लागि धरान लगिएको छ । घाइते पाँच जनालाई नै बिपी कोइराला स्वास्थ्य विज्ञान प्रतिष्ठान धरानमा उपचारका लागि लगिएको प्रहरी नायब उपरीक्षक सुवेदीले बताए । घाइते डम्बरबहादुर कार्की, करिष्मा तामाङ, तुलसा कटुवाल, सुवास तामाङ र युवा पोख्रेललाई नेपाली सेनाको हेलिकप्टरबाट उपचारका लागि धरान लगिएको छ ।
उपराष्ट्रपतिद्वारा दुःख व्यक्त
उपराष्ट्रपति नन्दबहादुर पुनले सङ्खुवासभाको मादी नगरपालिका–६ पुलुङस्थित सात घुम्तीमा यात्रुबाहक बस भीरबाट खस्दा ठूलो मानवीय क्षति हुने गरी भएको सडक दुर्घटनाप्रति गहिरो दुःख व्यक्त गरेका छन् । उपराष्ट्रपतिले सङ्खुवासभाको मादीबाट झापाको दमक जाँदै गरेको बा४ख ७३५ नम्बरको यात्रुबाहक बस दुर्घटना हुँदा ज्यान गुमाउनु भएकाहरू प्रति श्रद्धाञ्जली दिँदै शोकाकुल परिवारजनमा गहिरो समवेदना व्यक्त गरेका छन् । उपराष्ट्रपतिले घाइतेहरूको शीघ्र स्वास्थ्यलाभको कामना गर्दै उचित उपचारका लागि सरकारको ध्यानाकर्षण गराएका छन् ।
उपराष्ट्रपतिले बढ्दो सडक दुर्घटनाप्रति चिन्ता व्यक्त गर्दै पछिल्ला सडक दुर्घटनाको उचित छानबिन गरी सो छानबिन प्रतिवेदनका आधारमा सडक दुर्घटना न्यूनीकरणको योजना बनाएर कार्यान्वयन गर्न सरकारको गम्भीर ध्यानाकर्षणसमेत गराएका छन् ।
