काठमाडौं– आगामी ३० बैशाखमा हुने स्थानीय तहको निर्वाचनमा प्रयोग गरिने मतपत्रको रंगबारे टुंगो लागेको छ । आसन्न स्थानीय तह निर्वाचन प्रयोजनका लागि छापिने मतपत्रमा हरियो रङको प्रयोग हुने भएको हो । मतपत्र र स्वस्तिक छापको मसी एकै प्रकारका हुँदा मतगणनामा समस्या भएको गुनासो आएको भन्दै निर्वाचन आयोगले मतपत्रको मसी परिवर्तन गर्ने निर्णय गरेको हो ।
निर्वाचनका लागि आवश्यक मतपत्र छपाइ गर्दा मतपत्रमा हुने चिह्न, विवरण तथा सुरक्षण चिह्न हरियो मसीले छपाइ गर्ने निर्णय गरिएको आयोगका सहप्रवक्ता सूर्यप्रसाद अर्यालले जानकारी दिएका छन् । यसअघि आयोगले ०७४ सालको निर्वाचनमा मतपत्रमा निलो मसीको प्रयोग गरेको थियो । अघिल्लो निर्वाचनमा मतपत्रको रंग र स्वस्तिक चिह्नमा प्रयोग गरिने मसीको संग एउटै हुँदा समस्या देखिएको भन्दै गुनासो आएको थियो । मतगणनाका क्रममा मतपत्र र छापमा प्रयोग गरेका मसी एउटै हुँदा विवाद भएको कुरालाई ध्यानमा राख्दै मतपत्रको रंग परिवर्तन गर्ने निर्णय गरिएको आयोगले जनाएको छ ।
सहप्रवक्ता ढकालका अनुसार मतपत्र र चिह्न तथा स्वस्तिक छापको मसी एकै प्रकार (निलो) को हुँदा रातको समयमा मतगणना गर्न गाह्रो भएको गणकबाट गुनासा आएका थियो । मतपत्र र स्वस्तिक छापको मसीका कारण देखिने अप्ठ्यारा कम गर्न मतपत्रमा प्रयोग हुने मसी परिवर्तन गरिएको उनले बताए ।
आयोगले आगामी निर्वाचनको तयारी तीव्र पारेको छ । यसवर्ष मतदाता शिक्षाका कार्यक्रम कम भएपछि अन्य तयारीका कार्य भइरहेको आयोगले जनाएको छ । मतदाता शिक्षाका लागि विभिन्न विद्युतीय सञ्चारका माध्यम प्रयोग गर्ने आयोगको तयारी छ । त्यसका लागि श्रव्य तथा दृश्य सामग्री तयार पार्ने काम भइरहेको छ । वरिष्ठ साहित्यकार, गीतकार र संगीतकारहरू संलग्न समितिले निर्वाचन प्रचारप्रसार र मतदाता शिक्षाका लागि अडियो÷भिडियो सामग्री निर्माणका लागि प्राप्त रचनाको मूल्यांकन गरिरहेको आयोगले जनाएको छ ।
मतदाता नामावली अद्यावधिकको काम भइरहेको आयोगले जनाएको छ । मतदाता नामावलीमा रहेको त्रुटि सच्याउन निवेदन लिने, कसैले झुट्टा विवरण दिएको भएको सोको सम्बन्धमा उजुरी दिने, एकभन्दा बढीस्थानमा मतदाता नामावली भए हटाउनका लागि सूचना दिनेलगायत क्रियाकलाप चलिरहेको आयोगले जनाएको छ । मतदाता अद्यावधिकका काम यही २६ फागुनसम्म जारी रहने आयोगले जनाएको छ ।
निर्वाचनको मिति नजिकिँदै जाँदा राजनीतिक दलहरूले पनि आवश्यक तयारी तीव्र पारेका छन् । विभिन्न राजनीतिक दलहरूले गाउँ तथा टोल–टोलमा विभिन्न राजनीतिक गतिविधि तीव्र पारेका हुन् । विभिन्न टोलमा संगठन विस्तार, विभिन्न भेला तथा बैठकहरू तीव्र रूपमा भइरहेको दलहरूको भनाइ छ ।
