काठमाडौं– यसअघि मेसिन रिडेबल पासपोर्ट (एमआरपी) जारी गर्दै आएको नेपालले पछिल्लो महिनादेखि विद्युतीय पासपोर्ट (ई–पासपोर्ट) वितरण गरिरहेको छ । एमआरपीको वितरण पूर्णरूपमा बन्द गरेर ई–पासपोर्ट वितरण थालेको राहदानी विभागले देशका विभिन्न जिल्लासहित विदेशस्थित नेपाली दूतावासबाटसमेत ई–पासपोर्ट वितरण थालेको छ । हालसम्म कतार, मलेसिया र ओमानबाट ई–पासपोर्ट वितरण थालिसकेको छ ।
पछिल्लो समय आज(आइतबार)देखि साउदी अरबमा ई–पासपोर्टका लागि आवेदन फाराम लिने प्रक्रिया सुरू गरिने भएको छ । साउदीमा रहेको नेपाली दूतावासले ई–पासपोर्टको आवेदन लिने भएको हो । आवेदन दिन दूतावास जा“दा अनिवार्य रूपमा प्रि–इनरोलमेन्ट गर्नुपर्छ । प्रि–इनरोलमेन्ट गरेर जाने आवेदकहरूको मात्र ई–पासपोर्टका लागि आवश्यक बायोमेट्रिक विवरणसहितको लाइभ इनरोलमेन्ट प्रक्रिया अघि बढाइने दूतावासले सूचनामार्फत् जानकारी दिएको छ ।
प्रारम्भिक चरणमा सीमित बुकिङ खुला गरिएको भन्दै दूतावासले अहिले पासपोर्टको अवधि सकिएका वा ६ महिनाभन्दा कम अवधि रहेकाहरूलाई मात्र आवेदन दिन अनुरोध गरेको छ । साउदी अरबबाटै ई–पासपोर्टको लागि आवेदन दिनेले राष्ट्रिय परिचयपत्र नम्बर राख्नु पर्दैन । दूतावासमा जा“दा प्रि इनरोलमेन्ट गर्दा प्राप्त भएको बारकोडसहितको फाराम डाउनलोड गरी प्रिन्ट गरेर लिएर जानुपर्छ ।
यसका साथै दूतावासमा जा“दा आफ्नो गाउ“पालिका, नगरपालिका वा उपमहानगर र महानगरपालिका जे हो त्यसको वडा नम्बर, बुबा आमाको सम्पर्क नम्बर र विवाहितहरूको हकमा श्रीमतीको पनि सम्पर्क नम्बर दूतावासले माग्ने छ । प्रि–इनरोलमेन्ट गर्दा नै दूतावासले लाइभ इनरोलमेन्टका लागि समय दिएको हुन्छ । त्यही तोकिएको मिति र समयमा दूतावासमा जानुपर्छ । राहदानी नवीकरणका लागि दुई सय साउदी रियाल लाग्ने छ भने पहिलेको राहदानी चोरी भएको, हराएको, च्यातिएको वा कुनै कारणले काम नलाग्ने भएको भएमा चार सय साउदी रियाल लाग्ने दूतावासले जनाएको छ ।
नवीकरण गर्नका लागि दूतावासमै उपस्थित हुनुपर्छ । साउदीमा रियादभन्दा बाहिर कतै पनि राहदानीको आवेदन संकलन शिविर नराख्ने पनि दूतावासले जानकारी दिएको छ । कसैले बाहिर आवेदन फाराम संकलन गरिने भनेर भनेमा त्यस्ता सूचनालाई विश्वास नगर्न पनि दूतावासले आग्रह गरेको छ ।
