काठमाडौं — गायक राजेशपायल राईले नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’लाई भेटका छन् । केही समयअघि मात्र एक अन्तर्वार्तामा ‘नेता भनेको प्रचण्डजस्तो हुनुपर्छ’ भनेर प्रचण्डको तारिफ गरेका राजेशपायल बिहीबार उनको निवासमै भेट्न पुगे ।
अध्यक्ष प्रचण्डसँगको भेटमा खुवालुङ, नेपाली गीतसंगीत र २०६२ सालमा खोटाङको बुइपास्थित माओवादीले आफ्नो घरमा आगो लगाएकोबारे कुरा गरेको गायक राईले बताए ।
उनले भने, ‘घर जलाएको कुरा सुनाउँदा अध्यक्षज्यूले गल्ती भयो, माफ पाउँ भन्नुभयो ।’ राजेशपायलले खुवालुङको विषयमासमेत अध्यक्ष प्रचण्डसँग कुरा गरेको उुनाउँदै भने, ‘खुवालुङ हाम्रो आस्था हो । पानीजहाजभन्दा ठूलो हो, त्यसैले नफुटाउनुस् भन्दा उहाँले अस्थाका केन्द्र जोगाउनुपर्छ भन्नुभयो ।’
सप्तकोशी त्रिवेणीमा रहेको ढुंगालाई राई सम्ुदायले खुवालुङको रूपमा मान्दै आएको छ । खुवालुङको किराँतीहरुले आस्था र एकताको प्रतीकको रुपमा सम्मान गर्छन् । किराती मुन्धुमअनुसार दक्षिणबाट उत्तर जाने क्रममा किराती पुर्खाहरू खुवालुङ आइपुगेका थिए ।
उक्त खुवालुङ तत्कालीन प्रधानमन्त्री केपी शर्मा ओलीले विराटनगरमा आयोजित एक सभामा ‘सप्तकोशीमा स्टिमर चलाउन एउटा ढुंगा अवरोध भएको बताउँदै सो अवरोधलाई क्रेन लगाएर फाल्ने बताएपछि विवादमा आएको थियो । ओलीले भनेका थिए, ‘स्टिमर चढेर चतराबाट ११ मिनेटमा भोजपुर र ११ मिनेटमा भोजपुरबाट चतरा आइपुग्न बाधा भएको एउटा ढुंगो क्रेन लगाएर फुटाएर बाटो क्लियर गर्दै छौंं ।’
आफ्नो सांस्कृतिक आस्था र सभ्यताको धरोहर मान्दै आएको उक्त ढुंगा फुटाएर फाल्ने बताएपछि किरातीहरूले ‘खुवालुङ फुटाउन हुँदैन मात्र भनिरहेका छैनन्, सरकारले जबर्जस्ती गरे प्रतिकार गर्ने पनि बताइरहेका छन् ।’
बिहीबार राजेशपायलसँग चेतन सापकोटा, रीता सापकोटा, करिश्मा ढकाल, कल्पना दाहाललगायतका कलाकारले अध्यक्ष प्रचण्डलाई भेटेको प्रचण्डका स्वकीय सचिव गंगा दाहालले उल्लेख गरेकी छन् । स्वकीय सचिव दाहालका अनुसार अध्यक्ष प्रचण्डले ती कलाकारसँग एक्लाएक्लै भेट गरेका थिए ।
