काठमाडौं– विश्वभर फैलिएको कोरोना महामारीका कारण रोजगारी गुमाएका श्रमिकलाई निःशुल्क तालिम र अनुदान दिइने भएको छ । स्वदेश तथा विदेशमा महामारीका कारण रोजगारी गुमाएका श्रमिकलाई बाग्लुङको तमानखोला गाउँपालिकाले तालिम तथा अनुदान कार्यक्रम अघि बढाएको हो ।
कोरोना महामारीका कारण आन्तरिक तथा वैदेशिक रोजगारीमा रहेका धेरै युवाले रोजगारी गुमाएपछि उनीहरूलाई व्यवसायमा जोड्नका लागि यस्तो कार्यक्रम ल्याउने तयारी गरिएको गाउँपालिकाले जनाएको छ ।पछिल्लो समय कोरोना महामारीका कारण धेरै युवाहरू बेरोजगार भएको जनाउँदै गाउँपालिकाले त्यस्ता युवाहरूलाई स्वरोजगार बनाउन व्यवसायमा प्रेरित गर्न थालेको हो । स्वदेश तथा विदेशमा रोजगारीमा रहेका धेरै युवा महामारीका कारण बेरोजगार भएका छन् । महामारीको समयमा रोजगारीका लागि विदेश गएका धेरै युवाहरू फर्किनुपरेको र छुट्टिमा आएका युवाहरू पुनः विदेश फर्कन नपाएको यस्तो कार्यक्रम ल्याइएको हो ।
स्वरोजगारमूलक व्यवसाय गर्ने युवा तथा महिलाका लागि व्यवसाय गर्दा बैंक तथा वित्तीय संस्थाबाट लिने ऋणको ब्याज तिरिदिने र आवश्यक तालिम तथा प्रशिक्षण निःशुल्क उपलब्ध गराउने गाउँपालिकाका अध्यक्ष जोकलाल बुढाले जानकारी दिए ।उक्त कार्यक्रम सञ्चालन गर्नका लागि गाउँपालिकाले कार्यविधिसमेत तयार गरिसकेको छ । गाउँपालिकाले तयार गरेको कार्यविधिअनुसार रोजगारी गुमाएका जोकोहीले पनि तमानखोलाभित्र रहेका बैंक तथा वित्तीय संस्थाबाट लिएको ऋणको सबै ब्याज गाउँपालिकाले नै तिर्ने छ ।
दशौँ गाउँसभाबाट पारित भएको कार्यविधिले ऋणको ब्याज तिर्ने गरी युवा तथा महिलाले गर्ने व्यवसायमा लगानी गर्न सरोकारवालालाई आग्रहसमेत गरेकोे छ । लगानीको अभावमा व्यवसाय सुरु गर्न नसकेका युवाका लागि गाउँपालिकाले बनाएको विधि उपयुक्त हुने उनले बताए ।एक जनाले रु पाँच लाखदेखि २५ लाखसम्म व्यवसायको प्रकृति हेरेर ऋण लिनसक्ने व्यवस्था गरेको जानकारी दिँदै अध्यक्ष बुढाले भने, ‘कोरोना महामारीका बेला स्वदेश तथा विदेशमा रोजगारी गुमाएका युवासाथी यो कार्यक्रममा सहभागी हुन सक्नुहुने छ ।’
गाउँपालिकाले तयार गरेको कार्यविधि कार्यान्वयनमा आइसकेको छ । कार्यविधि कार्यान्वयनमा आएपछि गाउँपालिकाले रोजगारी गुमाएका युवाहरूको तथ्यांकसमेत संकलन गर्ने तयारी गरिरहेको छ । हालसम्म गाउँपालिकामा महामारीको समयमा रोजगारी गुमाएकाको यकिन तथ्यांक नभए पनि रोजगारी गुमाएका युवाले आश्यक प्रमाण पेस गरेर यो कार्यक्रमबाट लाभ लिनसक्ने उनले बताए ।
गाउँमा नै स्वरोजगारमूलक व्यवसाय सञ्चालन गर्दा उत्पादन बढ्ने र अन्य सर्वसाधारणलाई समेत रोजगारीमा जोडिन वातावरण सहज हुने गाउँपालिकाको विश्वास छ । गाउँपालिकाले स्वरोजगारमूलक व्यवसायमा लाग्ने युवा तथा महिलाका लागि प्रेरित गर्ने कार्यक्रमसमेत सञ्चालनमा ल्याएको छ । तालिम, प्रशिक्षण र प्रक्रियामा सहयोग गर्नेदेखि ऋणको ब्याज तिर्ने र गाउँपालिकाकै तर्फबाट अनुदान सहयोग गर्नेसम्मका कार्यक्रम समेटिएको गाउँपालिकाले जनाएको छ ।
-1745656903.jpeg)