काठमाडौं– १२ बैशाख ०७२ मा गएको विनासकारी भूकम्पका कारण क्षतिग्रस्त कमलपोखरीको पुनर्निर्माण कार्य अन्तिम चरणमा पुगेको छ । कोरोना महामारीका कारण पुनर्निर्माणमा केही ढिलाइ भए पनि अहिले भने कमलपोखरीको पुनर्निर्माण कार्य सकिने चरणमा पुगेको हो । एकवर्ष पहिले नै निर्माण सम्पन्न हुने गरी पुनर्निर्माणको काम अघि बढाइए पनि विश्वभर फैलिएको कोरोना महामारीका कारण पुनर्निर्माण कार्य प्रभावित भएको थियो ।
अब आगामी १५ दिनभित्रमा कमलपोखरीको पुनर्निर्माणको काम सम्पन्न भएर उद्घाटन गर्ने काठमाडौं महानगरपालिकाले जानकारी दिएको छ । काठमाडौं महानगरपालिकाका प्रमुख विद्यासुन्दर शाक्यले आगामी १५ दिनभित्रै कमलपोखरीको पुनर्निर्माणको काम सम्पन्न गरेर औपचारिक उद्घाटन गर्ने गरी तयारी भइरहेको बताएका छन् । कमलपोखरी सहरी सौन्दर्य अभिवृद्धिका लागि उपयुक्त हुने २३ रोपनी क्षेत्रफलमा पुननिर्माण कार्य जारी छ । कमलपोखरी आपसापमा ९ वटा चैत्यको विधिगत रूपमा प्रतिस्थापन कार्य पनि करिब सकिएको छ । केही रंगरोगन तथा फिनिसिङको काम मात्र बाँकी रहेको प्रमुख शाक्यले जानकारी दिए । रु. ६ करोड ३६ लाखको लगानीको पोखरी पुनर्निर्माणको काम सुरु गरिएको थियो । सुरुमा एक वर्षअघि नै सम्पन्न हुनुपर्नेमा लक्ष्य राखिए पनि कोरोना महामारीका कारण निर्धारित समयभित्र पुनर्निर्माणको काम सम्पन्न हुन नसकेको हो ।
‘यो ऐतिहासिक कमलपोखरी हो, काम सकिनासाथ हामी पोखरीको उद्घाटन गर्छौँ,’ प्रमुख शाक्यले भने । प्रदूषित अवस्थामा रहेको कमलपोखरीलाई व्यवस्थित गर्दै पर्यटकीय पोखरीका रूपमा विकास गरेको प्रमुख शाक्यको भनाइ छ । ठेकेदारले १५ दिनभित्र पहिलो चरणको काम सम्पन्न गर्ने प्रतिबद्धता व्यक्त गरेका जानकारी दि“दै उनले त्यसलगत्तै पोखरीको औपचारिक उद्घाटन कार्यक्रम गरिने उनले बताए ।
पोखरी उद्घाटनसँगै बिहान र साँझपख स्वस्थ हावा र हरियालीमा मनोरञ्जन लिँदै घुमफिर गर्ने उपयुक्त स्थानका रूपमा यो पोखरी विकास हुने बताइएको छ । कमलपोखरीको पुनर्निर्माण सम्पन्न भएपछि पोखरी वरिपरी वृक्षारोपण गर्ने महागरपालिकालको तयारी छ । ‘यहाँका मठ–मन्दिरको संरक्षण गर्दै यस पोखरीमा ठमेल, हनुमानढोका, स्वयम्भू घुम्न आउने पर्यटकलाई समेत आकर्षित गराउने उद्देश्यका साथ पोखरी पुर्ननिर्माणको काम अघि बढाएका छौँ,’ मेयर शाक्यले भने, ‘छिट्टै कमलपोखरीको सम्पदालाई पर्यटनसँग जोड्छौँ ।’एकातिर पानी अर्कोतिर हरियाली हेर्दै सबैले आनन्द लिने र ऐतिहासिक पर्यटकीय स्थलका रूपमा चिनाउने योजनासहित यो पोखरीको पुर्ननिर्माण अघि बढाएको उनको भनाइ छ ।
यसैगरी महानगरपालिकाले कमलपोखरी वरीपरी चिल्ड्रेन पार्क, ढुंगेधारा, अपाङ्गमैत्री शौचालय, जिम हल, उद्यान र सार्वजनिक स्थलसहितको डिजाइन तयार पारेको र त्यही अनुरूप काम अघि बढेको पनि बताए । महानगरपालिकाकी उपप्रमुख हरिप्रभा खड्गी श्रेष्ठले पोखरीलाई पहिलाको भन्दा पनि व्यवस्थित बनाउँदै यहाँसम्म ल्याउन पाउँदा खुसी लागेको बताइन् । महानगरपालिकाका सहरी योजना आयोगका उपाध्यक्ष सरोज बस्नेतले कमलपोखरीमा चार वटा कुनामा आकर्षक र संस्कृति झल्किने चार ओटा मण्डप र पूर्वतिर मूलढोकासँगै एउटा गरी पाँच ओटा मण्डप रहने जानकारी दिएका छन् । पोखरी निर्माणमा नेपाली इँटा र दर्शनढुंगा प्रयोग गरिएको छ भने पोखरी छिर्ने गेटलाई नेपाली स्वरूप दिइएको उनले जानकारी दिइन् । ‘पोखरी आसपासमा नेपालीपना झल्काउन झिँगटीका छानाको व्यवस्था गरेका छौँ’ उनले भनिन् ।
