स्याङजा– वालिङ नगरपालिकाले विदेश गएका नगरवासीको तथ्यांक संकलन थालेको छ । नगरपालिकाले वैदेशिक रोजगारीका लागि विभिन्न मुलुक पुगेको नगरवासीको तथ्यांक संकलन गर्न थालेको हो । सुरक्षित आप्रवासन परियोजना (सामी), हेल्भेटास नेपाल र अन्धाअन्धी सामुदायिक विकास केन्द्रको सहयोगमा नगरपालिकाले बुधबारदेखि नगरका सबै वडामा गणकहरू परिचालन गरेको छ । सुरक्षित आप्रवासनको पक्षमा वकालत गर्दै आएको सामी परियोजनाले वालिङबाट विभिन्न मुलुकमा काम तथा अन्य सिलसिलामा पुगेको व्यक्तिहरूको विवरण संकलन थालेको हो ।
गणनामा खटिनुअघि उनीहरूलाई तालिम पनि दिइएको थियो । उनीहरूलाई वैदेशिक रोजगारीमा गएर फर्केका व्यक्ति र वैदेशिक रोजगारीमा रहेका व्यक्तिको परिवारलाई लक्षित गरेर विवरण संकलन गरी डिजिटल प्रविधिमार्फत भर्ने तरिका सिकाएर पठाइएको छ ।
सबै वडामा परिचालन गरिएका गणकहरूले वालिङ नगरभित्रका नागरिक वैदेशिक रोजगारीमा गएका वा गएर फर्केकाको तथ्यांक संकलन गर्नेछन् । वालिङका कति नागरिक वैदेशिक रोजगारीमा छन्, कति फर्किएका छन्, फर्किएका वालिङका नागरिकको स्थिति के छ भन्ने बुझ्नका लागि १४ वटै वडामा गणक खटाइएको प्रमुख प्रशासकीय अधिकृत राजन भट्टराईले जानकारी दिए । एक महिनासम्म १७ गणकले गाउँ–गाउँमा पुगेर विवरण संकलन गर्ने जानकारी दिँदै उनले भने, ‘वैदेशिक रोजगारीमा गएका वा फर्केका यहाँका नागरिकको अवस्थाका बारेमा यथार्थ जानकारी भएस“गै यससम्बन्धी आगामी दिनमा नीति तथा कार्यक्रम निर्माण गरी कार्यान्वयनमा ल्याउन सहज हुने छ ।’
‘कोभो एप्स’को प्रयोग गरेर गणकले डिजिटल प्रविधिबाट तथ्यांक संकलन गर्नेछन् । वैदेशिक रोजगारीमा गएका नागरिकले पठाउने रेमिट्यान्स र घरपरिवारले त्यसको प्रयोग के काममा गरेका छन् भन्ने विवरणसमेत गणकले घर–घरमै पुगेर लिने भट्टराईले बताए ।
त्यस्तै गणकहरूले विदेश गएका तथा फर्केकाहरूको सीप, योग्यतालगायत विवरण पनि संकलन गरिरहेको नगरप्रमुख दिलीपप्रताप खा“णले जानकारी दिएका छन् । उनका अनुसार वालिङका नागरिक वैदेशिक रोजगारीमा कति छन्, कति फर्किए, उनीहरूसित के–कस्तो सीप छ वा बेरोजगार छन् यी सबै विवरण गणकले घर–घरमै पुगेर संकलन गर्नेछन् । त्यसरी विदेशमै रहेका वा फर्केकाहरूको नामावली, सीप, क्षमता, योग्यतालाई ‘रोजगार पोर्टल’ निर्माण गरी राख्ने अद्यावधिक राख्ने नगरपालिकाको योजना छ ।
रोजगार पोर्टलमा कामदार र रोजगार प्रदायक व्यक्ति तथा संस्थाहरूको व्यवस्थित विवरण राख्ने नगरपालिकाको तयारी छ । नगरपालिकाभित्रका बेरोजगारी समस्या समाधान गर्नका लागि नगरपालिकाले यस प्रकारको तयारी गरेको हो । रोजगार पोर्टलमा इच्छुकको नामावली राखेस“गै उद्योग तथा कलकारखानालाई आवश्यक पर्दा सहजरूपमा उपलब्ध गराउन सकिने छ । ‘वैदेशिक रोजगारीबाट स्वदेश फर्केकाको सीप, क्षमताको विवरण ‘रोजगार पोर्टल’मा उल्लेख गरिन्छ’, उनले भने, ‘सोही पोर्टलमा उद्योग तथा कलकारखानालाई आवश्यक पर्ने जनशक्तिको पनि विवरण राखिने छ, कामदारले काम पाउने र उद्योगले कामदार पाउन सहज हुने छ ।’
-1745656903.jpeg)