काठमाडौं– गएको स्थानीय तहको निर्वाचनबाट निर्वाचित जनप्रतिनिधिहरूको कार्यकाल सकिन लाग्दा चन्द्रागिरि नगरपालिकाले अब आफ्नै भवनबाट सेवा दिने भएको छ । हालका जनप्रतिनिधिहरूले निर्वाचित भएलगत्तै प्राथमिकताका साथ भवन निर्माणको काम सुरु गरिएको थियो ।
भवन निर्माण सम्पन्न भएसँगै चालु महिनाभित्रै नगरपालिकाले आफ्नै भवनबाट सेवा दिने तयारी गरेको हो । चन्द्रागिरि– १२ स्थित गुर्जुधारामा करिव सात रोपनी जमिनमा प्रशासकीय भवन तथा अन्य संरचना निर्माणाधीन छन् । मौलिक एवं सास्कृतिक कलात्मक आँखि झ्याल संरचनाको छ तलाको सो भवन निर्माण कार्य करिब सम्पन्न भएको नगरपालिकाले जनाएको छ । केही फिनिसिङ बाहेकका काम सम्पन्न भएकाले यही माघ महिनाको अन्त्यसम्ममा सर्ने तयारी गरिएको हो । उक्त भवन रु. २५ करोड लागतमा सम्पन्न हुन लागेको हो ।
तीन रोपनीमा प्रशासनिक भवन र चार रोपनीमा बाह्य संरचना बनिरहेको र सो रकममध्ये जिल्ला समन्वय समिति काठमाडौंको रु १० करोड र बाँकी नगरपालिको आन्तरिक स्रोत रहेको जनाइएको छ । नगरप्रमुख घनश्याम गिरीले यही माघ मसान्तभित्रमै नगरपालिका नयाँ भवनमा सर्ने जानकारी दिएका छन् । उनले भवन उद्घाटनको तयारी भइरहेको जानकारी दिँदै अब नगरपालिकाले आफ्नै सुविधासम्पन्न भवनबाट नगरवासीलाई सेवा दिने बताए । बाल, जेष्ठ नागरिक र अपाङ्गतामैत्री भवनको भित्री संरचना कोठा, हल तयार गर्ने, छुट््याउने, रंगरोगन गर्ने तथा वाह्य संरचनामा बगैँचा बनाउने काम भइरहेको उनले जानकारी दिए ।
समन्वय समितिका प्रमुख शिवसुन्दर राजवैद्य र नगर प्रमुख गिरीले ११ मंसिर ०७६ मा संयुक्त रूपमा सो भवनको शिलान्यास गरेका थिए । रसुवा कन्स्ट्रक्सन कम्पनी प्रालिले ठेक्का पाएको सो भवन सम्झौताअनुसार ०७८ बैशाखभित्रमा नगरपालिकालाई हस्तान्तरण गर्नुपर्ने थियो, तर कोभिड–१९ को महामारीका कारण ढिलाइ भएको भएको जनाइएको छ ।
नयाँ भवनबाट पशु सेवा कार्यलय बाहेक अन्य सेवा नगरबासीले एकीकृत रूपमा पाउने नगरप्रमुख गिरीले जानकारी दिएका छन् । अब नगरपालिकाको आफ्नै भवनबाट एकीकृत सेवा प्रवाह र विकास निर्माणको कामलाई अझ चुस्त, सरल, सहज र प्रभावकारी बनाउन सहयोग पुग्ने उनको विश्वास छ । यस अघि नै पशु सेवा कार्यालयको भवन रु १ करोड ५७ लाख लागतमा निर्माण सम्पन्न भइसकेकाले उक्त कार्यालयको सेवा सोही भवनबाट दिइनेछ ।
भूकम्पप्रतिरोधी र अग्नि नियन्त्रक उपकरण जडित सो प्रशासनिक भवनमा करिव २०० क्षमताको सभाहलसहित नगर प्रमुख, उपप्रमुख तथा प्रशासकीय अधिकृतका कार्यकक्षमा छुट्टै ‘मिनि मिटिङ हल’ तथा ‘अण्डरग्राउण्ड पार्किङ’ रहेको निर्माण कम्पनीका प्रतिनिधि बरुण केसीले जानकारी दिएका छन् । उनले भने, ‘निर्धारित मितिभन्दा अगाडि नै भवन निर्माण सम्पन्न गरी नगरपालिकालाई हस्तान्तरण गर्ने योजनामा काम भइराखेकोमा कोरोना महामारीका बीचमा पनि स्वास्थ्य मापदण्ड अपनाएर निर्माणलाई निरन्तरता दिँदै आएका छौँ । भवनको ९५ प्रतिशत काम सम्पन्न भैसकेको छ । हस्तान्तरणको तयारीमा छौँ ।’
नगरपालिकाको १५ वडा मध्ये अधिकाशं वडा कार्यालयका आफ्नै भवन छन् । पछिल्ला समय वडा नं ३ र ४ वडाको नयाँ भवन निर्माण सम्पन्न भएको र वडा नं ७, ११ र ५ को जग्गा खरिद गरी भवन निर्माणका लागि आवश्यक काम अगाडि बढेको नगरप्रमुख गिरीले जानकारी दिएका छन् । उनले नगरको भौतिक पूर्वाधार विकाससँगै नगरपालिका भवन तथा वडा कार्यालयका आफ्नै भवन बनाउनेकालाई प्राथमिकताका साथ अघि बढाइएको उनले बताए ।
काठमाडौं जिल्लाका दक्षिण पश्चिम भेगका थानकोट, दहचोक, नैकाप, नयाँ भञ्ज्याङ, वाड भञ्ज्याङ, बलम्बु, महादेवस्थान, तीनथाना, सतुंगल, मातातीर्थ, मच्छेगाउँ र नैकाप पुरानो भञ्ज्याङ तत्कालीन गाउँविकास समिति मिलाएर सो नगरपालिका बनाइएको थियो ।
