काठमाडौं– सरकारले खरिद गरेको कोरोना भाइरसविरुद्धको २४ लाख डोज खोप हराएको सार्वजनिक भएपछि सरकारको तीव्र आलोचना भयो । मन्त्रीहरूले खोपमा पनि भ्रष्टाचार गरेको भन्दै आलोचना भएपछि सरकारले हराएको खोपको खोजी कार्य सुरु गरेको छ । हराएको खोप खोजी गर्न गठन गरिएको छानबिन समितिले खोजी कार्य कार्य सुरु गरेको हो । समितिले खोपको मौज्दात र खोप लगाएका व्यक्तिहरूको विवरण चार दिनभित्र पठाउन ‘सर्कुलर’ गरेको छ ।
२१ माघ अपरान्ह ४ बजेभित्रमा खोपको मौज्दात र खोप लगाएका व्यक्तिहरूको विवरण पठाउन सरोकार सबै पक्षलाई छानविन समितिले भनेको हो । स्वास्थ्य सचिव डा. रोशन पोखरेलले २४ लाख डोज खोपको कुनै तथ्यांक नभेटिएको बारे संसदीय समितिलाई जानकारी गराएका थिए । स्वास्थ्य सचिव पोखरेलले नै ठूलो मात्रामा खोप हराएको तथ्य सार्वजनिक गरेपछि प्रमुख प्रतिपक्षी दल नेकपा एमालेले सरकारको चर्को आलोचना गर्दै आइरहेको थियो । विपक्षीको चर्को आलोना खेप्नुपरेपछि स्वास्थ्य मन्त्री विरोध खतिवडाले आइतबार मात्रै हराएको खोप खोज्नका लागि स्वास्थ्य मन्त्रालयका प्रमुख विशेषज्ञ डा. गुणराज लोहनीको संयोजकत्वमा ५ सदस्यीय छानविन समिति गठन गरेका थिए ।
छानबिन समितिको पहिलो बैठकले स्वास्थ्य सेवा विभागअन्तर्गतको व्यवस्थापन महाशाखा, ७ वटै प्रदेश स्वास्थ्य आपूर्ति व्यवस्थापन केन्द्र, ७७ वटै जिल्लाका स्वास्थ्य कार्यालय, ७५३ वटै स्थानीय तहलाई खोपको मौज्दात र खोप लगाएका व्यक्तिहरूको विवरण पठाउन सार्वजनिक सूचना जारी गर्ने निर्णय गरेको हो । विवरण पठाउँदा डिएचएस–२ प्रणालीअनुसार पठाउन भनेको छ ।
कोभिड १९ को रोकथाम तथा नियन्त्रणका लागि खोप एकमात्र विकल्प हो । खोपले मानव शरीरमा रोग प्रतिरोधात्मक क्षमता (एण्टीबडी) विकास गर्ने भएकाले खोप कार्यक्रमलाई विश्वका सबै मुलुकले प्राथमिकताका साथ अगाडि बढाएका छन् । नेपाल आफैँले खोप उत्पादन गर्न सकेको छैन । अन्य मुलुकमा उत्पादन गरिएको खोपको केही मात्रा सरकारले किनेको छ भने अधिकांश खोप विभिन्न मुलुकले अनुदानमा उपलब्ध गराएका छन् । हालसम्म लक्षित समूहमध्ये करिब ६५ प्रशितलाई खोप लगाइसकिएको सरकारले दाबी गरेको छ । सरकारले खोपको तेस्रो मात्रा (बुस्टर डोज) पनि लगाउन थालेको छ ।
थप २३ लाख ४० हजार मोर्डना खोप आउँदै
नेपालमा थप २३ लाख ४० हजार मात्रा कोभिड १९ विरुद्धको मोर्डना खोप ल्याइने भएको छ । स्वास्थ्य तथा जनसंख्या मन्त्रालयकाअनुसार विश्व बैंकको ऋण सहयोगमा मंगलबारसम्म २३ लाख ४० हजार मात्रा मोर्डना खोप आउन लागेको हो । मन्त्रालयका अनुसार सोमबार साँझ साढे ७ बजे ११ लाख ७० हजार मात्रा खोप नेपाल आइपुगेको छ । बाँकी खोप मंगलबार बिहान ९ बजे पनि सोही संख्यामा खोप आउने स्वास्थ्य मन्त्रालय व्यवस्थापन महाशाखाका सुरेन्द्र चौरसियाले जानकारी दिएका छन् । उक्त खोप १२ देखि १७ वर्ष उमेर समूहलाई लगाइने मन्त्रालयले जानकारी दिएको छ ।
सरकारले बालबालिकालाई खोप दिइरहेको छ । अधिकांश जिल्लामा बालबालिकालाई मोर्डना खोपको पहिलो मात्रा लगाइँदै छ । ललितपुरमा जिल्लामा भने उक्त समूहका बालबबालिकालाई खोपको दोस्रो मात्रा पनि दिन थालिएको छ ।
