काठमाडौं– पछिल्लो समय मुलुकभर कोरोना भाइरसको संक्रमण दर तीव्र रूपमा बढिरहेको छ । त्यसमध्ये काठमाडौं उपत्यकामा संक्रमण दर अझै तीव्र छ । मुलुकभर थपिएका नयाँ संक्रमितमध्ये दुई तिहाई भन्दा बढी त काठमाडौं उपत्यकामा हुने गरेका छन् ।
कोरोना भाइरस संक्रमितको संख्या थपिँदै जाँदा काठमाडौं उपत्यकामा आइसोलेसन र क्वारेन्टाइन तयारी अवस्थामा राखिएको छ । कोरोना भाइरसको नयाँ भेरियन्ट ओमिक्रोन समुदायस्तरमै फैलिएको विषयलाई ध्यानमा राख्दै काठमाडौं महानगरपालिकाले यसअघिको लहरका बेला तयार पारिएका क्वारेन्टाइन र आइसोलेसनलाई नै पुनः सञ्चालन गर्ने तयारी गरेको हो ।
काठमाडौं उपत्यकामा यसअघि कोरोना महामारीको पहिलो र दोस्रो लहरका बेला विभिन्न स्थानमा आइसोलसन र क्वारेन्टाइन बनाइएका थिए । कोरोना महामारीको पहिलो र दोस्रो चरणमा प्रयोग भएका निःशुल्क सञ्चालन गरिएका आइसोलेसन र क्वारेन्टाइन स्थलहरू यसपटक पनि आवश्यक परेको खण्डमा तयारी अवस्थामा रहेको महानगरपालिका प्रमुख विद्यासुन्दर शाक्यले जानकारी दिएका छन् ।
उनका अनुसार पुराना क्वारेन्टाइन र आइसोलेसन सञ्चालन गर्ने विषयमा गृहमन्त्री, विभिन्न अस्पताल र नेपाली सेनासँग छलफल भइसकेको जानकारी दिएका छन् । महानगरपालिकाले नेपाली सेना र अस्पतालहरूलाई पनि तयारी अवस्थामा रहन भनेको महानगरप्रमुख शाक्यले जानकारी दिए । ‘हामी तयारी अवस्थामा छौँ । आवश्यक प¥यो भने तुरुन्तै निःशुल्क आइसोलेसन र क्वारेन्टाइनहरू सञ्चालन गर्न सक्छौँ,’ उनले भने । उनले कोभिड–१९ संकट व्यवस्थापन केन्द्र (सिसिएमसी) लाई स्थानीय सरकारसँग सहकार्य र समन्वय गरी अघि बढ्न आग्रह पनि आग्रह गरेका छन् ।
पहिलो र दोस्रो चरणको कोरोना संक्रमणका बेला सिसिएमसीले स्थानीय सरकारसँग सल्लाह र समन्वय गरे पनि अहिले नभएको महानगरपालिकाले आरोप लगाएको छ । सम्बन्धित निकायहरूबीचमा आवश्यक समन्वय नहुँदा अन्योलको स्थिति सिर्जना भएको उनको भनाइ छ । महानगरवासीलाई थप केही जटिल भयो भने कामपाको ३२ वटै वडामा सञ्चालित स्वास्थ्य क्लिनिक र स्वास्थ्य विभागमा सम्पर्क गर्न पनि आग्रह गरिएको छ ।
संघीय सरकारको निर्देशन र मापदण्डअनुसार महानगरपालिका क्षेत्रभित्रका अग्रपंक्तिमा खटिएका, ज्येष्ठ नागरिकलगायतका लागि खोपको तेस्रो मात्रा पनि महानगरपालिकाले व्यवस्थापन गरेकाले खोप लगाउन योग्य सबैलाई अपिल गरिएको छ ।
निःशुल्क परीक्षण गर्न माग
राष्ट्रिय उपभोक्ता मञ्चले कोभिड–१९ को निःशुल्क परीक्षण हुनुपर्ने माग गरेको छ । मञ्चले मंगलबार प्रधानमन्त्री तथा मन्त्रिपरिषद्को कार्यालय सिंहदरबारमा पत्र पठाउँदै कोभिडको पिसिआर तथा एन्टिजेन परीक्षण निःशुल्क गर्न माग गरेको हो । मञ्चका अध्यक्ष प्रेमलाल महर्जनले हस्ताक्षर गरेका पत्रमा नेपालका सरकारी तथा निजी अस्पतालले पिसिआर तथा एन्टीजेन परीक्षण गर्दा लागतभन्दा बढी मूल्य लिएको उपभोक्ता तथा चिकित्सकले गुनासो गर्न थालेको भन्दै निःशुल्क बनाउन माग गरिएको जनाइएको छ ।
निजी अस्पतालले ऐन्टीजेन टेस्ट गरेबापत न्यूनतम रु पाँच सय लिएको र पिसिआर परीक्षण शुल्क निजी अस्पतालमा न्यूनतम रु दुई हजार र सरकारी अस्पतालमा रु एक हजार लिइरहेका छन् । सम्पूर्ण परीक्षण गर्न टेस्टकिटको अधिकतम साइज ९६ प्रयोग गर्दासमेत अधिकतम ६ अमेरिकी डलर मात्र खर्च हुने आधारमा रु ८०० भन्दा बढी नपर्ने भनिएको छ । तर, सरकारी र निजी स्वास्थ्य संस्थाहरूले धेरै शुल्क लिएको भन्दै गुनासो आइरहेको छ ।–प्रशिक्षार्थी पत्रकार
