सुदूरपश्चिम– सुदूरपश्चिम प्रदेशका मुख्यमन्त्री त्रिलोचन भट्टले नेपालमा विकास र लगानीको मोडेलमा एकरूपता नहुँदा लगानी मैत्री वातावरण बन्न नसकिरहेको धारणा व्यक्त गरेका छन् ।
गैरआवसीय नेपाली संघ (एनआरएन)का अध्यक्षसहितका पदाधिकारीको सहभागितामा धनगढीमा भएको अन्तरक्रियामा उनले लगानीमैत्री वातावरण सिर्जना गर्न प्रदेश सरकार प्रतिबद्ध रहेको बताए । उनले एनआरएनले नेपालमा र खासगरी सुदूरपश्चिम प्रदेशमा गरिएको सहयोगप्रति धन्यवाद दिँदै उनले प्रदेशमा अहिलेसम्म कसैबाट पनि लगानी नगरिएकामा दुखेसो व्यक्त गरे । उनले प्रदेशमा पर्यटन, कृषि, ऊर्जा, उद्योगलगायत क्षेत्रमा लगानी गर्न सकिने सम्भावना धेरै भएको बताए ।
कार्यक्रममा आर्थिक मामिलामन्त्री तारालामा तामाङ र भौतिक पूर्वाधार विकासमन्त्री दीर्घबहादुर सोडारीले प्रदेशको समग्र विकासका लागि एनआरएनबाट भूमिका निर्वाह भइरहने विश्वास व्यक्त गरे । एनआरएनका अध्यक्ष कुमार पन्तले विदेशमा बसेर प्राप्त भएको ज्ञान सीपलाई आङ्खनै देशको समृद्धिका लागि प्रयोग गर्ने सोच संस्थाको रहेको जानकारी गराए । उनले एनआरएनको पहलमा नेपालमा दस अर्ब लगानीका लागि प्रयास भइरहेको बताए । उनले नेपालमा कोभिड–१९ को समस्या आउँदा सबैभन्दा पहिले एनआरएनले नै सहयोग सामग्री पठाएको स्मरण समेत गरे ।
उनले विदेशमा रहेका नेपालीको संस्था एनआरएनले नेपालमा भूकम्प, कोभिड–१९ जस्ता विपत्तिको समयमा विभिन्न सहयोग उपलब्ध गराउँदै आएको छ । संस्थाले नेपालमा कोरोना भाइरसका संक्रमितको उपचार व्यवस्थापनका लागि प्रयोगमा आउने अक्सिजन प्लान्ट, अक्सिजन कन्सन्टेटरलगायत सामग्रीको सहयोग गरेको जनाइएको छ ।
संस्थाका पूर्वअध्यक्ष जीवा लामिछाने, नेपाल सरकारका पूर्वमुख्य सचिव लीलामणि पौडेल, पत्रकार दीर्घराज उपाध्याय लगायतले सुदूरपश्चिममा लगानी मैत्री वातावरणका सम्भावना र चुनौतीका विषयमा आङ्खना धारणा राखेका थिए ।
