काठमाडौं– सोमबार मुलुकभर कुल ६ हजार ७३४ जनामा कोरोना भाइरसको संक्रमण पुष्टि हुँदा काठमाडौं उपत्यकामा मात्र ३ हजार ९३९ जना नयाँ संक्रमित थपिए । स्वास्थ्य तथा जनसंख्या मन्त्रालयले दिएको जानकारीअनुसार मुलुकभर थप भएका संक्रमितमध्ये करिब दुई तिहाई काठमाडौं उपत्यकामा मात्र थपिएका हुन् । मन्त्रालयको अनुसार काठमाडौंमा २ हजार ९४३, भक्तपुर २०१ र ललितपुरमा ७९५ जना संक्रमित थपिएको मन्त्रालयको तथ्यांकमा उल्लेख छ ।
मन्त्रालयका अनुसार पछिल्लो २४ घन्टामा देशभरमा १४ हजार १४ नमुनाको पिसिआर परीक्षण गर्दा ५ हजार ७४७ र ६ हजार ७३४ नमुनाको एन्टीजेन परीक्षण गर्दा ९८७ जनामा संक्रमण पुष्टि भएको हो । मन्त्रालयका अनुसार सोमबार ५४७ जना संक्रमणमुक्त भएका छन् भने ३ जनाको मृत्यु भएको छ । हाल देशभरमा ३० हजार ८७७ संक्रिय संक्रमित छन् ।
त्यसअघि आइतबार देशभरमा ४ हजार ९६१ जनामा कोरोना संक्रमण पुष्टि भयो, त्यसमध्ये दुई तिहाइभन्दा बढी काठमाडौं उपत्यकाका मात्रै थिए । १२ हजार ५६२ नमुनाको पिसिआर परीक्षण गर्दा ४ हजार ५३४ र २ हजार ५६९ नमुनाको एन्टिजेन परीक्षण गर्दा ४२७ जनामा संक्रमण देखिएको थियो । नयाँ संक्रमितमध्ये ३ हजार ३४७ जना काठमाडौं उपत्यकाका थिए । उपत्यकामा पनि सबभन्दा धेरै २ हजार ५४५ जना काठमाडौंका, भक्तपुरका ३२८ र ललितपुरका ४७४ जना थिए ।
पछिल्लो एकहप्ताको तथ्यांकले मुलुकभर थपिएका नयाँ संक्रमितमध्ये झण्डै दुई तिहाईको हाराहारीमा काठमाडौं उपत्यकाको मात्र रहेको देखाउँछ । यी तथ्यांकले कोरोना महामारीको तेस्रो लहर सुरु हुनलाग्दा काठमाडौं उपत्यका ‘हटस्पट’ बन्दै गएको देखाउँछ । चिकित्सकहरूले कोरोनाको सम्भावित तेस्रो लहरले काठमाडौं उपत्यका कोरोनाको ‘हटस्पट’ बन्दै गएको बताउँछन् । संक्रामक रोग विशेषज्ञ डा.शेरबहादुर पुनका अनुसार पहिलो लहरमा वीरगन्ज संक्रमणको हटस्पट बनेको थियो । दोस्रोमा बाँकेको नेपालगञ्ज । तर, तेस्रो लहरमा काठमाडौं उपत्यका संक्रमणको ‘हटस्पट’ बन्दै गएको देखिएको उनको भनाइ छ ।
ओमिक्रोन बढी संक्रामक भाइरस भएको र जनघनत्वको हिसाबले सबभन्दा घना सहर उपत्यका भएकाले पनि काठमाडौंबाट फैलिएको उनको भनाइ छ । जनघनत्व बढी भएको ठाउँमा जनस्वास्थ्यको मापदण्ड पालनामा बेवास्ता हुँदा संक्रमण तीव्र रुरूमा फैलिएको डा. पुनको भनाइ छ । काठमाडौंमा विभिन्न राजनीतिक दलको सम्मेलनका कारण भीडभाड बढ्न जाँदा ओमिक्रोनको संक्रमण ‘साइलेन्स’ रुरूमा फैलिएको हुन सक्ने उनी बताउँछन् । पछिल्लो समय राजनीतिक दलका ठूला नेताहरूलाई नै संक्रमण देखिनुले पनि राजनीतिक दलको सभा–सम्मेलनमै संक्रमण साइलेन्स रुरूमा घुमिरहेको थियो भन्ने पुष्टि गरेको डा. पुनले बताए ।
चिसो मौसमका कारण रुघाखोकीजस्ता लक्षण देखिएको भनेर परीक्षण नगर्दा पनि संक्रमण भित्रभित्रै फैलन सक्ने उनको तर्क छ । ओमिक्रोनको लक्षण डेल्टाको भन्दा केही भिन्न छ । डेल्टाले सिधै फोक्सोमा इन्फेक्सन गराउँथ्यो । जसले गर्दा संक्रमितलाई असहज भएर अस्पतालसम्म जानुपर्ने बाध्यता हुन्थ्यो । तर, मौसम परिवर्तन हुँदा देखा पर्नेजस्ता लक्षण ओमिक्रोनले गराउने भएका कारण पनि धेरैले समयमा परीक्षण गराएनन्, जसले भित्रभित्र संक्रमण फैलिएर संक्रमण दर बढेको हुनसक्ने बताइएको छ ।
बुस्टर डोज सुरु
सरकारले काठमाडौंका १७ वटा ठाउँबाट अग्रपंक्तिमा खटिएका व्यक्तिलाई कोभिडविरुद्धको थप एक अतिरिक्त मात्रा खोप (बुस्टर डोज) दिने भएको छ । तत्कालका लागि अग्रपंक्तिमा (फन्टलाइनर) काम गर्नेहरूलाई बुस्टर मात्रा दिइनेछ । अहिले खोप सञ्चालन भइरहेका काठमाडौंका १७ खोप केन्द्रबाट बुस्टर डोज लगाउन सकिने स्वास्थ्य कार्यालयका प्रमुख शम्भु काङ्खलेले जानकारी दिएका छन् । ८ वटा सरकारी अस्पताल र नाकासहित ९ वटा निजी अस्पतालबाट खोप दिन सुरु गरिएको काङ्खलेले जानकारी दिए ।
