काठमाडौं– कोरोना भाइरसको संक्रमण बढ्दै गएपछि उपत्यकका तीन जिल्लामा कडाइ गर्न थालिएको छ । कोरोना भाइरसको पछिल्लो भेरियन्ट ओमिक्रोनबाट संक्रमितहरूसमेत बढ्न थालेपछि स्थानीय प्रशासनले भिडभाडमा कडाइ गर्न थालेको हो । अन्य भेरियन्टभन्दा निकै बढी संक्रामक ओमिक्रान समुदायस्तरमै फैलिएको आशंका गरिएको छ । त्यसैले कोरोनो भाइरसको संक्रमण न्यूनिकरण तथा रोकथामका लागि स्थानीय प्रशासनले आवश्यक सतर्कता अपनाउन थालेको हो ।
काठमाडौं महानगरपालिकाले कोरोना भाइरस संक्रमण फैलिन नदिन सार्वजनिकस्थलमा कडाइ गर्न सुरु गरेको छ । पछिल्ला केही दिनयता कोरोनाका नयाँ संक्रमितको संख्या उकालो लागेको भन्दै काठमाडौं महानगरपालिकाले सार्वजनिकस्थलमा कडाइ गर्न थालेको हो । काठमाडौं धेरै जनघनत्व भएको स्थान हो, जहाँ मानिसको संख्या बढी छ । साथै पछिल्लो समय कोरोनाको इपिसेन्टर काठमाडौं बनेकाले पनि आवश्यक सतर्कता अपनाउन थालिएको हो ।
काठमाडौं महानगरपालिकाले संक्रमणदर पनि बढ्ने भएकाले घर बाहिर निस्कँदा मास्क लगाउन र सावधानी अपनाउनका आग्रह गरेको छ । यससम्बन्धमा सबैलाई सजग बनाउनका लागि ३२ वटै वडाका विभिन्न स्थानमा माइकिङ गर्नेजस्ता काम सुरु गर्न थालेको छ । माइकिङमार्फत मास्क लगाउन, साबुनपानीले हात धुन, स्यानिटाइजर लगाउन, सामाजिक तथा भौतिक दूरी कायम राख्न, भिडभाड नगर्न पनि आह्वान गरिएको छ । महानगरपालिकाको आग्रहलाई बेवास्ता गरी संक्रमण बढाउन सहयोग गरे थप कारबाही गर्ने काठमाडौं महानगरपालिका सहरी स्वास्थ्य विभागका हेल्थ असिस्टेन्ट ऋषि भुसालले जानकारी दिएका छन् । उनले कोरोना नियन्त्रणका लागि राजनीतिक दलले पनि भौतिकरूपमा हुने गतिविधि कम गर्नुपर्ने बताएका छन् । त्यस्तै, नागरिकले आङ्खनो जनजीवनमा पनि केही परिमार्जन गर्नुपर्ने, अन्यथा नियन्त्रण गर्न कठिन हुने उनको भनाइ छ ।
उता भक्तपुरमा जिल्ला प्रशासन कार्यालय एवं जिल्ला विपद् व्यवस्थापन समितिले कोरोना भाइरस संक्रमण फैलिन नदिन सार्वजनिकस्थलमा कडाइ गर्न सुरु गरेको छ । उपत्यकामा कोरोना भाइरसको संक्रमण तीव्र गतिमा फैलिरहेको बेला भक्तपुरमा संक्रमण फैलन नदिन कडाइ गर्न थालिएको हो । कोरोना भाइरस संक्रमण फेरि बढ्दै गएपछि भक्तपुरमा स्वास्थ्य मापदण्ड पालनलाई कडाइ गरिएको प्रमुख जिल्ला अधिकारी रुद्रादेवी शर्माले जानकारी दिइन् । उनका अनुसार स्थानीयवासीलाई सतर्कता अपनाउन आग्रह गर्दै बुधबारदेखि माइकिङ पनि सुरु गरिएको छ । कोरोना भाइरसको संक्रमणबाट बच्न र बचाउनका लागि स्वास्थ्यसम्बन्धी मापदण्डको पालना गर्न आग्रह गर्दै जिल्लाभर माइकिङ सुरु गरिएको हो ।
त्यस्तै, भक्तपुर प्रशासनले घर बाहिर निस्कँदा मास्क नलगाउनेलाई अब कारबाही गर्ने चेतावनी दिएको छ । प्रमुख जिल्ला अधिकारी शर्माले कोरोना संक्रमणबाट बच्न अनिवार्य मास्क लगाउन सबैलाई आह्वान गरिएको जानकारी दिँदै मास्क लगाउन, साबुनपानीले हात धुन, स्यानिटाइजर लगाउन, सामाजिक तथा भौतिक दूरी कायम राख्न, भीडभाड नगर्न आह्वान गरिएको बताएकी छन् । उनले सार्वजनिक यातायातका साधनमा भीडभाड नगर्न, अनिवार्य मास्क लगाउन, चालक तथा सहचालकलाई मास्क, फेसमास्क लगाउन कडाइ गरिने बताएकी छन् । प्रजिअ शर्माले भनिन्, ‘सार्वजनिक यातायातदेखि सार्वजनिकस्थलमा अनुगमन गर्छाैँ ।’ जिल्लाका सरकारी तथा निजी अस्पताललाई तयारी अवस्थामा रहन उनले निर्देशन पनि दिएकी छन् । संकट समाधानका लागि सबै अस्पताललाई तयारी अवस्थामा राखिएको भक्तपुर प्रशासनले जनाएको छ ।
भक्तपुरमा कोरोनाविरुद्धको खोप अभियानलाई प्रभावकारी बनाउन जनप्रतिनिधि, सुरक्षा निकायलगायत सबै संयन्त्रको सहयोग र समन्वयमा काम भइरहेको छ । जिल्ला स्वास्थ्य कार्यालयका प्रमुख कृष्णबहादुर मिजारका अनुसार मध्यपुरथिमि नगरपालिकामा ११ जनामा नयाँ भेरियन्ट ‘ओमिक्रोन’ फेला परेको छ । चाँगुनारायणमा तीन, सूर्यविनायकमा आठ र अन्यमा चार नयाँ संक्रमित थपिएका छन् । भक्तपुरमा हालसम्म कोरोनाबाट ३५७ जनाको मृत्यु भएको छ । जिल्लामा १८५ सक्रिय संक्रमित छन् । हालसम्म दुई लाख ३३ हजार ७५१ जनाले खोप लगाएको मिजारले जानकारी दिए । भक्तपुर नगरपालिकामा ५१ हजार ५९६, चाँगुनारायणमा ४१ हजार ९०९, मध्यपुरथिमिमा ५८ हजार ५८१ र सूर्यविनायक नगरपालिकामा ८१ हजार ७०५ जनाले कोरोनाविरुद्धको खोपको पूर्ण मात्रा लगाएका छन् ।
