काठमाडौं– कोरोना भाइरसको संक्रमण बढेकाले सर्वसाधरणमा फेरि लकडाउन हुने त्रास बढिरहेका बेला स्वास्थ्य तथा जनसंख्या मन्त्री विरोध खतिवडाले सरकार लकडाउनको पक्षमा नरहेको प्रष्ट पारेका छन् । लकडाउन भएमा दैनिकी चलाउन नै गाह्रो हुने सर्वसाधरणको चिन्ताका बीचमा उनले सरकार अनावश्यक लकडाउन गर्ने पक्षमा नरहेको प्रष्ट पारेका हुन् । बिहीबार कीर्तिपुर अस्पतालमा आयोजित कार्यक्रममा बोल्दै उनले यसअघि अन्य देशहरूको कुरा सुनेर लकडाउन गरिएको भए पनि अब आवश्यक ठाउँ हेरेर मात्रै लकडाउन गरिने बताए ।
उनले सम्बन्धित सबैलाई नआत्तिन आग्रह गर्दै सरकारले आवश्यक स्थानमा मात्र बन्द गर्ने ‘स्मार्ट लकडाउन’को विधिलाई कार्यान्वयन गर्ने बताएका छन् । यसअघिका लकडाउनले देशको आर्थिक, सामाजिक र शैक्षिक क्षेत्रमा धेरै असर गरेको भन्दै मन्त्री खतिवडाले अब लकडाउन नै समस्याको समाधान हो भन्ने किसिमबाट सरकार नजाने बताए । उनले सरकारले स्वास्थ्य क्षेत्रमा विशेष तयारीका साथ काम गरिरहेकोले लकडाउन हुन्छ भनेर आत्तिनुनपर्ने बताए ।
कोरोना महामारीको सुरूका बेलामा आतंक बढी भएको हुनाले एक/दुईवटा सामान्य लक्षण देखिँदा पनि लकडाउन गरेर गल्ती गरिएको उनको भनाइ छ । विशेषगरी युरोपेली देशहरूमा लकडाउन भनेको सुनेर त्यसैअनुसार नेपालमा पनि गरिएको भन्दै मन्त्री खतिवडाले भने, ‘हामी पनि आतंकित भयौँ । गर्नुपर्ने बेलामा गरेनौँ, अघि–पछि गर्यौँ । त्यसले केही मृत्युदर घटायो होला भन्ने अनुमान गर्न सकिन्छ । तर, त्यसले परेको शैक्षिक क्षेत्रको असर, औद्योगिक, राजस्व, सामाजिक क्षेत्रका अनेक कामहरूलाई क्षति भयो ।’ उनले यस प्रकारको क्षति नदेखिने भए पनि यो मृत्युभन्दा पनि भयावह ढंगले भएको बताए ।
‘अब हामी आत्तिएर, मात्तिएर लकडाउन नै समाधान हो भन्ने पक्षमा छैनौँ । आवश्यकता हेरेर खास ठाउँमा त्यो विचार पुर्याएर हामी लकडाउन गर्नेछौँ,’ मन्त्री खतिवडाले भने, ‘सजिलैसँग लकडाउनमा जाँदैनौँ । आवश्यकताअनुसार ठाउँ विशेष गर्न सक्छौँ । त्यसैले तत्काल लकडाउनको विषयमा आतंकित हुनुपर्दैन ।’ उनले अहिले सरकारले पर्याप्तमा मात्राका महामारीसँग जुध्नका लागि पूर्वतयारी गरेको जानकारी दिएका छन् । ‘हामीले सबै ठाउँमा आइसोलेसन वार्डहरू, आइसियु, अक्सिजन, पहिलो भेरियन्टको बेलाभन्दा दुई तीन गुणामाथि इक्युपमेन्ट र टेन्ट भएका छौँ ।
नागरिकलाई असजिलो पर्दा सरकार तयारीका साथ बसेको छ । स्वास्थ्यकर्मीहरू हामीले तयारीका साथ राखेका छौँ,’ मन्त्री खतिवडाले भने । मन्त्री खतिवडाले कोरोनाको तेस्रो भेरियन्टबाट बच्न होसियार रहनुपर्ने भन्दै मास्क र स्यानिटाइजर अनिवार्य प्रयोग गर्न आग्रह गरेका छन् । उनले कोरोनाको पहिलो र दोस्रो डोज लगाएर सुरक्षित बस्न पनि आग्रह गरे । विज्ञहरूले बुस्टर डोज लगाएपछि तेस्रो भेरियन्टबाट बच्न सहज हुने बताएको उद्धृत गर्दै उनले आउँदो माघ पहिलो हप्ताबाट अग्रपंक्तिमा रहेर काम गर्नेहरूलाई बुस्टर डोजको व्यवस्था गरिएको जानकारी दिए ।
