काठमाडौं– कोरोना महामारीको तेस्रो लहर सुरु हुन लागेको भन्दै देशभरको सबै विद्यालय बन्द गरिएको छ । शिक्षा, विज्ञान तथा प्रविधि मन्त्रालयले २७ पुसदेखि १५ माघसम्म विद्यालयहरू बन्द गर्ने निर्णय गरेको छ । मन्त्रालयले कोरोना भाइरसको संक्रमण दर बढेको भन्दै विद्यालयहरू बन्द गर्ने निर्णय गरेको हो । विद्यालय बन्द गरिदा बालबालिकाको सिकाइ कार्य प्रभावित भएको छ ।
कोरोना महामारीकै कारण यस वर्ष शैक्षिक सत्र ढिलो गरी सुरु गरिएको थियो । अन्य वर्ष बैशाखमै शैक्षिक सत्र सुरु हुने गरे पनि यस वर्ष असारदेखि मात्रै शैक्षिक सत्र सुरु भएको थियो । अर्कोतर्फ कोरोना महामारीको दोस्रो लहरका कारण लामो समय सिकाइ कार्य प्रभावित भएको थियो । महामारीका बेला भौतिक उपस्थितिमा हुने पठनपाठन कार्य स्थगित गरी अनलाइनमार्फत शिक्षण कार्य अगाडि बढाइएको थियो । तर, अनलाइन मार्फत गरिएको सिकाइ कार्य प्रभावित हुन नसकेको गुनासो पनि व्याप्त छ ।
सहरी क्षेत्रमा अनलाइनमार्फत पढाइए पनि ग्रामिण इलाकामा इन्टरनेट र मोबाइल, ल्यापटपजस्ता विद्युतीय सामग्री उपलब्ध नहुँदा विद्यार्थीहरू अनलाइन कक्षामा सहभागी हुन सकेनन् । कोरोना महामारीका कारण विद्यार्थीको पढाइ प्रभावित भएकै परिस्थितिमा पुनः तेस्रो लहर सुरु हुन लागेको भन्दै सरोकारवालाले चिन्ता व्यक्त गरेका छन् । उनीहरूले वैकल्पिक माध्यमबाट सिकाई कार्यको सुनिश्चितता नगरी विद्यालय बन्द गर्न नहुने मत राखेका हुन् ।
सामुदायिक विद्यालय व्यवस्थापन समिति महासंघ, नेपालले वैकल्पिक माध्यमको सिकाइ सुनिश्चितता गरेर मात्रै विद्यालय बन्द गराउन आग्रह गरेको छ । महासंघका अध्यक्ष कृष्ण थापा र महासचिव गुणराज मोक्तानले बुधबार विज्ञप्ति जारी गर्दै कोभिड–१९ को महामारीको पुनः प्रभावको स्थितिमा विद्यालयलाई सुरक्षित सिकाइको थलो बनाउन नेपाल सरकार र राजनीतिक दलको ध्यान नपुगेकामा दुःख व्यक्त गरिएको छ । मन्त्रालयले कोभिड–१९ संकट व्यवस्थापन केन्द्रको सिफारिसमा विद्यालय बन्द गराउने निर्णय गरेको थियो । बालबालिकाहरू लामो समयदेखि प्रभावित रहेकाले विद्यालय बन्द गर्नुपर्ने अवस्थामा वैकल्पिक माध्यमको सिकाइ सुनिश्चित गर्न विद्यालय व्यवस्थापन समितिहरूलाई महासंघले आग्रह गरेको छ । सिकाइ निरन्तरताका लागि वैकल्पिक सिकाइ गतिविधिहरू प्रभावकारी रूपमा सञ्चालनमा ल्याउनका लागि संघीय, प्रदेश र स्थानीय सरकारको ठोस नीति, निर्देशन र कार्यक्रम सार्वजनिक हुनुपर्ने महासंघले माग गरेको छ ।
भक्तपुरमा ६ हजार विद्यार्थीलाई खोप
सरकारले उपत्यकाका तीन जिल्ला काठमाडौं, भक्तपुर र ललितपुरका बालबालिकालाई पनि कोरोना भाइरसविरुद्धको खोप दिन थालेको छ । १२ देखि १७ वर्ष उमेर समूहका बालबालिकालाई खोप दिन थालिएको हो । भक्तपुरमा गत आइतबारदेखि खोप दिन थालिएको हो । भक्तपुरमा बुधबारसम्म करिब ६ हजार विद्यार्थीले कोरोनाविरुद्धको मोडर्ना खोप लगाएका छन् ।
विद्यार्थीको सहजतालाई ध्यानमा राखी जिल्ला स्वास्थ्य कार्यालयले स्थानीय तहसँगको समन्वयमा विद्यालयमा नै खोप केन्द्र राखी खोप दिएको हो । स्वास्थ्य कार्यालय प्रमुख कृष्णबहादुर मिजारका अनुसार मंगलबारसम्म जिल्लाको चाँगुनारायण र सूर्यविनायक नगरपालिकाभित्रका विद्यालयमा खोप अभियान सम्पन्न भएको छ । त्यस्तै मध्यपुरथिमि र भक्तपुर नगरपालिकाका विद्यालयमा मंगलबारदेखि खोप अभियान सुरु भएको मिजारले बताएका छन् । भक्तपुर नगरपालिकाले खोप अभियान बिहान ९ देखि ३ बजेसम्म सञ्चालन हुने र खोप लगाउन विद्यार्थीले विद्यालयको परिचयपत्र अनिवार्य साथमा ल्याउनुपर्ने प्रावधानको व्यवस्था गरेको छ । खोप अभियानका लागि भक्तपुरले विभिन्न विद्यालय तथा कलेजमा खोप केन्द्र तोकेको छ ।
