रौतहट– रौतहट जिल्लाको ईशनाथ नगरपालिका जनप्रतिनिधिको समयसीमा सकिनै लाग्दा विवादित बन्दै गएको छ । सो पालिकामा कार्यरत कर्मचारीदेखि निर्वाचित जनप्रतिनिधिहरू नै आर्थिक स्वार्थमा लिप्त हुन थालेपछि पालिकामा दिगो विकास हुनुको साटो अनियमितता र भ्रष्टाचारले जडो गाडेको छ । गत आर्थिक वर्षको मसान्त भएको पालिकाको लेखा परीक्षणले पनि सो पालिकामा विभिन्न ६ दर्जन भन्दाबढी शीर्षकमा अनियमितता र अपारदर्शिता रहेको महालेखा परीक्षणको कार्यालयले प्रस्तुत गरेको प्रतिवेदनबाट देखापरेको छ ।
ईशनाथ नगरपालिकामा अनियमितता र भ्रष्टाचार मौलाउनुको मुख्य कारण सो पालिकाका तत्कालीन निमित्त प्रमुख प्रशासकीय अधिकृत नन्दकिशोर गुप्ता र लेखापाल मनोज ठाकुर रहेको स्थानीयले बताएका छन् । ईशनाथ नगरपालिकाका लेखापाल ठाकुरले बिनाकमिसन कुनै पनि भुक्तानी नगर्ने गरेको एक जनप्रतिनिधि कै आरोप रहेको छ । विकास निर्माणको योजनामा दशदेखि पन्ध्र प्रतिशत कमिसन नदिएसम्म कागज अपुग रहेको, अनुगमन प्रतिवेदन नरहेको तथा खातामा पैसा नै नरहेको भनी लेखापालले आलटाल गर्ने गरेको जनप्रतिनिधिहरू कै आरोप छ ।
त्यस्तै समाजिक विकासअन्तर्गत संचालन हुने विभिन्न तालिम गोष्ठीहरूको भुक्तानीमा समेत ठाकुरले मनग्य कमिसन लिने गरेको स्रोतको दाबी रहेको छ । आर्थिक वर्ष ०७७/७८ र आ.व ०७८/७९ मा संचालन नै नभएको दर्जनाँ तालिमहरूको फाइल लेखापाल ठाकुरको मिलेमतोमा भुक्तानी भएको स्रोतले जनाएको छ । विभिन्न सीपमूलक तथा आय आर्जनसँग सम्बन्धित दर्र्जनौँ तालिम गोष्ठीको नाममा सो पालिकाले ३० लाखभन्दा बढी रकम दुई आार्थिक मसान्तमा भुक्तानी गरी अनियमितता गरेको स्रोतको दाबी रहेको छ । कागज मै तालिम गोष्ठीको भुक्तानी सम्बन्धि प्रमाणसमेत फेला परेको छ ।
ईशनाथ नगरपालिकामा हाजिर भएदेखि नै लेखापाल ठाकुरको विलासिता पनि दोब्बर भएको छ । ईशनाथमा जिम्मेवारी सम्हालेपछि ठाकुरले सदरमुकाम गौरमा रहेको एक तल्ले घरलाई थपेर तीनतले बनाएका छन् भने आम्दनीको स्रोत र खर्चभन्दा चार गुणा सम्पत्ति जोडेको स्रोतले जनाएको छ । नाम प्रकाशित नगर्ने सर्तमा एक कर्मचारीका अनुसार ठाकुरले भुक्तानी गर्दा आङ्खना लागि छुट्टैबाट केही भाग कमिसन लिने गरेका छन् । ईशनाथ नगरपालिकाका लेखापाल ठाकुरको सम्पत्ति छानबिन गर्न तथा उनले गरेको भुक्तानीबारे छानबिन गर्न सम्बन्धित निकायसँग स्थानीयले माग गरेका छन् ।
