काठमाडौं– कोरोना भाइरसको संक्रमण बढ्दै भएपछि सरकारले आगामी १५ माघसम्म विद्यालयहरू बन्द गर्ने निर्णय गरेको छ । कोभिड–१९ संकट व्यवस्थापन केन्द्र (सिसिएमसी)को आइतबार बसेको बैठकले शिक्षण संस्थाहरू बन्द गरिनुपर्ने सुझाव दिएपछि सोमबार शिक्षा, विज्ञान तथा प्रविधि मन्त्रालयले विद्यालय बन्द गर्ने निर्णय गरेको हो । मन्त्रालयको निर्णयानुसार मंगलबारदेखि लागू हुने गरी १५ माघसम्म विद्यालय बन्द गर्ने निर्णय गरिएका छ ।
मन्त्रालयका प्रवक्ता दीपक शर्माले कोरोना भाइरसको संक्रमण बढ्दै गएपछि २७ पुसदेखि १५ माघसम्म विद्यालय बन्द गर्ने निर्णय गरिएको जानकारी दिएका छन् । पछिल्लो दिनमा कोभिड–१९ को संक्रमण तीव्ररूपमा फैलिनाका साथै ओमिक्रोन भेरियन्टको संक्रमणसमेत बढ्न थालेकाले विद्यार्थीको स्वास्थ्य, सुरक्षा तथा बचावटका लागि विशेष ध्यान दिँदै देशभरका सबै आधारभूत तथा माध्यमिक विद्यालयको वार्षिक बिदामा मिलान हुने गरी बिदा दिइएको उनले बताए । मन्त्रालयले जारी गरेको विज्ञप्तिमा निर्धारित परीक्षाका कार्यक्रम भने नरोकिने उल्लेख छ ।
मन्त्रालयले बिदाको उक्त अवधिमा १२ वर्षदेखि १७ वर्ष उमेर समूहका विद्यार्थीलाई सबै स्थानीय तहमा रहेको स्वास्थ्य चौकीमार्फत खोप लगाउने कार्यक्रम रहेकाले विद्यालयसँग सम्पर्क गरी तोकिएको दिनमा खोप लगाउने कार्यमा आङ्खना बालबालिकालाई पठाउन पनि अनुरोध गरेको छ । बिदाको अवधिमा विद्यालयले सिकाइ सहजीकरण निर्देशिका–०७७ ले गरेको व्यवस्थाबमोजिम विद्यार्थीको सिकाइमा आवश्यक सहजीकरण गर्ने प्रबन्ध मिलाउन पनि आग्रह गरिएको छ ।
मन्त्रालयले विश्वविद्यालय र शैक्षिक प्रतिष्ठानले पूर्वनिर्धारित सेमेष्टर र वार्षिक परीक्षाका कार्यक्रम जनस्वास्थ्य र सुरक्षाका मापदण्ड पूर्णरूपमा पालना हुनेगरी ‘जेड’ आकारमा बसाइँ व्यवस्था गरी सञ्चालन गर्नसमेत सुझाएको छ ।
काठमाडौं र ललितपुरमा बालबालिकालाई खोप
कोरोना भाइरसको संक्रमण बढ्दै जाँदा बालबालिकालाई पनि खोप दिन थालिएको छ । उपत्यकाका तीन जिल्ला काठमाडौं, भक्तपुर र ललितपुरमा बालबालिकालाई खोप दिन थालिएको हो । अभियानकै रूपमा सुरु भएको खोप कार्यक्रम भक्तपुरमा आइतबारदेखि नै सुरु भएको छ भने काठमाडौं र ललितपुरमा मंगलबारदेखि खोप कार्यक्रम सुरु गरिने छ । काठमाडौं र ललितपुरका १२ देखि १७ वर्ष उमेर समूहका बालबालिकालाई मंगलबारदेखि कोभिड–१९ विरुद्धको खोप दिइने जिल्ला जनस्वास्थ्य कार्यालय काठमाडौंले जनाएको छ । कार्यालय प्रमुख शम्भु काङ्खलेका अनुसार बालबालिकाहरूले विद्यालयमै गएर फाइजर खोप लगाउन सक्नेछन् । काठमाडौंमा करिब दुई लाख ७० हजार विद्यार्थीलाई खोप लगाउने लक्ष्य छ ।
विद्यालयबाट प्राप्त संख्याभन्दा १० प्रतिशत बालबालिका थप हुने अपेक्षा स्वास्थ्य कार्यालयले गरेको छ । उनले यो संख्या विद्यालयले पठाएको विवरण अनुसारको भएको जानकारी दिँदै विद्यालय बाहिर अर्थात् विभिन्न गुम्बा, विद्यापिठहरूका तथ्यांक नभएकोले १० प्रतिशत बालबालिका थप हुन्छ भन्ने अनुमान गरिएको बताए । तीन लाख बालबालिकालाई पुग्ने खोपलगायतका आवश्यक सामग्री खोप केन्द्रहरूमा पठाउने उनले बताए । खोप केन्द्र तोक्नको लागि भने कार्यलयले स्थानीय तहलाई नै जिम्मेवारी दिएको उनको भनाइ छ ।
ललितपुरले पनि मंगलबारदेखि ६ वटै स्थानीय तहका बालबालिकालाई फाइजर खोप दिने भएको छ । स्वास्थ्य कार्यालय ललितपुरका प्रमुख सतिस विष्टका अनुसार ७१ हजार ३०१ जना बालबालिकालाई खोप दिने लक्ष्य रहेको छ । उनले दुई सयभन्दा बढी विद्यार्थी भएका विद्यालयमा खोप केन्द्र रहने र सोभन्दा कम विद्यार्थी संख्या भएका विद्यालयका विद्यार्थीले नजिकैको अर्को खोप केन्द्र रहेको विद्यालयमा गएर खोप लगाउन सक्ने जानकारी दिए ।
