काठमाडौं– स्वास्थ्य तथा जनसंख्या मन्त्रालयले कोरोना भाइरसको महामारीको तेस्रो लहर आउन सक्ने चेतावनी दिइरहेको बेला बिहीबार संक्रमितको संख्या बढेको छ । मन्त्रालयले सार्वजनिक गरेको पछिल्लो २४ घन्टाको विवरणअनुसार बिहीबार तीन महिना यताकै उच्च संक्रमण देखिएको हो । बिहीबार थप ५४० जनामा कोरोना भाइरस संक्रमण पुष्टि भएको छ । १२ हजार ९९ जनाको नमुना परीक्षण गरिएको थियो । सात हजार २०९ जनाले पिसिआर र चार हजार ८९० जनाले एन्टिजेन विधिबाट परीक्षण गरिएको स्वास्थ्य तथा जनसंख्या मन्त्रालयले जनाएको छ ।
गत २४ घन्टामा २७१ जना कोरोनाबाट निको भएका छन् । यससँगै निको हुनेको संख्या आठ लाख १३ हजार ४४७ पुगेको छ । निको हुने दर ९७ दशमलव नौ प्रतिशत रहेको मन्त्रालयले जनाएको छ । नेपालमा पिसिआर विधिबाट कोरोना परीक्षण गरिँदा आठ लाख ३० हजार ४८० र एन्टिजेन विधिबाट परीक्षण गरिँदा ९६ हजार ४४५ जना संक्रमित भएको मन्त्रालयले जनाएको छ । पिसिआर विधिबाट परीक्षण गर्नेको संख्या ४९ लाख एक हजार ७४२ र एन्टिजेन विधिबाट परीक्षण गर्नेको संख्या आठ लाख ४४ हजार ३९४ पुगेको छ । कुलमा संक्रमण दर १६ दशमलव नौ प्रतिशत छ ।
कोभिडविरुद्धको खोप लगाउनेको संख्या पछिल्लो २४ घन्टामा एक लाख २० हजार ६५३ रहेको छ । हाल सक्रिय संक्रमितको संख्या पाँच हजार ४३१ रहेको छ । पछिल्लो २४ घन्टामा कोरोनाबाट एक जनाको मृत्यु भएको छ । यससँगै कोरोनाबाट मृत्यु हुनेको संख्या ११ हजार ६०२ पुगेको छ । कोरोनाबाट हुने मृत्युदर एक दशमलव चार प्रतिशत रहेको छ । प्रति १० लाख जनसंख्यामा मृत्युदर ३८१ दशमलव नौ रहेको छ ।
हाल भेन्टिलेटरमा रहनेको संख्या जम्मा १४ र आइसियुमा ७९ जना रहेका छन् । होम आइसोलेशनमा पाँच हजार ६९, संस्थागत आइसोलेसनमा ३६२ र क्वारेन्टाइनमा ११३ रहेका छन् । हाल देशभरमा ५०० भन्दा बढी सक्रिय संक्रमित भएका जिल्लामा काठमाडौं, ललितपुर र भक्तपुर रहेका छन् भने २०० भन्दा बढी उपचारार्थ संक्रमित रहेका जिल्लामा सुनसरी, कास्की, बाँके र कैलाली छन् । शून्य संक्रमित रहेका जिल्लामा रसुवा, मनाङ, मुस्ताङ, हुम्ला र मुगु रहेका छन् । उपत्यकाका तीन जिल्लामध्ये हाल काठमाडौंमा एक हजार ३०२, ललितपुर ६२१ र भक्तपुरमा ५५३ सक्रिय संक्रमित रहेको मन्त्रालयले जनाएको छ ।
कोरोना महामारीको दोस्रो लहर कम भएपछि यतिको संख्यामा संक्रमित थपिएको थिएन । आजको दैनिक संक्रमणदर ५ प्रतिशत पुगेको छ । बिहीबार पुष्टि भएको संक्रमण गत तीन महिनायताकै उच्च हो । गत कात्तिक १० गते ५८२ संक्रमण पुष्टि भएको थियो । त्यसयता संक्रमितको संख्या कम हुँदै आएको थियो । भारतमा कोरोनाभाइरस संक्रमितको संख्या बढेसँगै नेपालमा पनि बिस्तारै त्यसको असर देखिन थालेको छ । निकै संक्रामक भनिएको ओमिक्रोन भेरियन्ट नेपालमा समेत पुष्टि भइसकेको छ । पछिल्लो ५ दिनको स्वास्थ्य तथा जनसंख्या मन्त्रालयको तथ्यांक हेर्दा बिस्तारै कोरोनाको संक्रमण दर उकालो लाग्न थालेको छ । यो हप्ताको सुरुवातमा संक्रमण दर साढे २ प्रतिशतको हाराहारीमा रहेकोमा बिहीबार यो बढेर ५ प्रतिशत नजिक पुगेको छ ।
१२ पुसमा १० हजार २६७ जनाको परीक्षण गर्दा ४३५ जनामा कोरोना पुष्टि भएको थियो । सोही दिन सक्रिय संक्रमितको संख्या ५ हजार २२५ थियो । यस्तै २० पुसमा ९ हजार ३२९ जनाको परीक्षणमा ३९३ जनामा संक्रमण पुष्टि भएको मन्त्रालयको तथ्यांकमा उल्लेख छ । मन्त्रालयका अनुसार २० पुसमा संक्रमितको संख्या ५ हजार ९४ छ । १९ पुसमा १२ हजार ४९८ जनाको परीक्षण गर्दा ३२६ जनामा संक्रमण पुष्टि भएको थियो ।उक्त दिन ५ हजार ५ जना सक्रिय संक्रमित रहेका थिए । यस्तै, १८ पुसमा ७ हजार ६३१ जनाको परीक्षण गर्दा २१६ जनामा संक्रमण पुष्टि भएको थियो । उक्त दिन ४ हजार ९७१ जना सक्रिय संक्रमित रहेका थिए । बितेको ५ दिनमा संक्रमण दर १.६३ प्रतिशतले बढेको पाइएको छ । यो तथ्यांकअनुसार आगामी दिनमा संक्रमण दर बढ्न सक्ने देखिएको छ ।
तेस्रो लहरको संकेत
स्वास्थ्य तथा जनसंख्या मन्त्रालयले कोभिड–१९ को नयाँ ओमिक्रोन भेरियन्ट फैलिन नदिन सतर्कताका लागि अनुरोध गर्दै स्वास्थ्य निर्देशनालय, जिल्ला स्वास्थ्य कार्यालय र स्थानीय तहलाई परिपत्र गरेको छ । हालसम्म नेपालमा तीन जनामा मात्र ओमिक्रोन भेरियन्टको संक्रमण पुष्टि भएको छ । तर, आगामी माघ दोस्रो हप्तादेखि तेस्रो लहर आउनसक्ने देखिएकाले सर्तकता अपनाउन आग्रह गरेको मन्त्रालय उच्च स्रोतले जनाएको छ । अर्को लहरमा देखापर्ने पूर्व संकेत देखिसकेकाले माघको दोस्रो सातापछि अर्को लहर आउने प्रक्षेपण गरिएको मन्त्रालयले जनाएको छ । मन्त्रालयका एक अधिकारीका अनुसार मन्त्रालयले यस विषयमा ¥यापिड एक्सन प्लान तयार गरिरहेको छ ।
उनका अनुसार तेस्रो लहर आएमा दोस्रो लहर उच्च विन्दुमा पुगेको बेला भन्दा बढी संक्रमित हुन सक्छन् । दोस्रो लहरमा एकैदिन ९ हजार २ सय संक्रमित थपिएका थिए, जसका कारण अस्पतालहरूमा वेड र अक्सिजनसमेत अभाव भएको थियो । अमेरिकामा हाल दैनिक १० लाखभन्दा बढी संक्रमित थपिइरहेका छन् । भारतमा पनि संक्रमण दर बढ्दै गएको छ । मन्त्रालयका अधिकारीहरूका अनुसार तेस्रो लहर आउनसक्ने केही पूर्वसंकेत देखिसकेको छ । अर्को लहर आउने विश्लेषण गरेको मन्त्रालयले सबै निकायलाई सतर्क रहन निर्देशन दिएको छ । मन्त्रायले स्थानीय तह, स्वास्थ्य कार्यालयहरूलाई पनि मन्त्रालयले निर्देशन दिइसकेको छ ।
मन्त्रालयकी प्रवक्ता डा. संगीता मिश्राले ¥यापिड एक्सन प्लान तयारी भइरहेको बताएकी छन् । ‘भारतमा कोरोना फैलिएपछि पहिलो र दोस्रो लहरले केही समयमा नेपालमा फैलिएको पाइएको थियो,’ उनी भन्छिन्, ‘अहिले पनि यस्तै हुनसक्छ । त्यस कारणले हामीले सबै निकायलाई ‘अलर्ट’ रहन सुझाव दिएका छौँ ।’
