काठमाडौं– विश्वव्यापी महामारीको रूपमा फैलिएको कोरोना भाइरसको नयाँ भेरियन्ट ‘ओमिक्रोन’ विश्लाई नै आक्रान्त पारिरहेको छ । निकै संक्रामक यस भेरियन्ट विश्वका सबैजसो मुलुकमा देखा परिसकेको छ । पछिल्लोसमय युरोपियन मुलुक र अफ्रिका महादेशका मुलुकहरूमा यसको प्रकोप निकै डरलाग्दो अवस्थामा रहेको छ । विश्व स्वास्थ्य संगठनले ‘भेरियन्ट अफ कन्सर्न’को सूचीमा राखेको ओमिक्रोनका संक्रमण छिमेकी मुलुक भारतमा पनि तीव्र गतिमा फैलिरहेको छ । अबको एक महिनाभित्रमा भारतमा पनि यसको संक्रमण उच्च गतिमा पुग्ने अनुमान गरिएको छ । नेपालमा पनि हालसम्म तीन जनामा यसको संक्रमणल पुष्टि भइसकेको छ ।
दोस्रोपटक फैलिएको महामारीको कारण नेपालमा पनि जनजीवन निकै प्रभावित भएको थियो । पुनः ओमिक्रोनको संक्रमणका कारण नेपालमा तेस्रोपटक महामारीको रूप लिनसक्ने अनुमान भइरहेको छ । सरकारले सबै नागरिकलाई स्वास्थ्यसम्बन्धी मापदण्डको कडाइका साथ पालना गर्न आग्रह गरे पनि अधिकांशले बेवास्ता गर्दै आइरहेका छन् । सरकारले आवश्यक सतर्कताको उपाय अपनाउन थालेकै छ । यस्तैमा स्थानीय तहहरूलाई पनि ओमिक्रोनको संक्रमणका कारण आउनसक्ने परिस्थितिको बारेमा आवश्यक सतर्कता अपनाउन सरकारले आग्रह गरेको छ ।
स्वास्थ्य सेवा विभाग, इपिडिमियोलोजी तथा रोग नियन्त्रण महाशाखाले प्रदेश र स्थानीय तहलाई कोभिड–१९ तथा नयाँ भेरिन्ट ओमिक्रोन नियन्त्रणका लागि थप सर्तक भएर तयारीमा लाग्न भनेको हो । महामारीको विश्वव्यापी जोखिम कायम रहेको र थप संक्रामक भेरियन्ट ओमिक्रोन नेपाल भित्रिएकाले थप सजग हुँदै तयारीमा लाग्न भनिएको हो । महाशाखाका निर्देशक कृष्णप्रसाद पौडेलले आइतबार विज्ञप्ति जारी गर्दै प्रदेश र स्थानीय तहका स्वास्थ्य निर्देशनालय तथा कार्यालयलाई भीडभाड हुन नदिने, मास्कको प्रयोग गर्ने, हात धुनेलगायत जनस्वास्थ्यका मापदण्ड पूर्णरूपमा पालना गर्न भनिएको छ । समुदायमा जोखिम क्षेत्र (हटस्पट) पत्ता लगाएर एन्टिजिन किटद्वारा परीक्षणको दायरा बढाउन भनिएको छ ।
महामारीको जोखिम बढिरहेकाले महाशाखाले पहिचान भएका कोभिड–१९ केसको आइसोलेसन, उपचारलगायतको व्यवस्थापनमा समन्वय र सहयोग गर्न भनिएको छ । पहिचान भएका संक्रमितसँग सम्पर्कमा आएकालाई कन्ट्याक ट्रेसिङ गर्न र सीमा नाकामा रहेका प्रवेश विन्दुबाट प्रवेश गर्ने यात्रुको पोटोकलअनुसार परीक्षण तथा व्यवस्थापन गर्न भनिएको छ । खोप लगाउन छुटेका लक्षित वर्गको पहिचान तथा खोप प्रयोगमा वृद्धि गर्न महाशाखाले भनेको छ । घरमै होम आइसोलेशनमा रहेका र क्वारेन्टिनमा रहेकालाई निगरानी गर्न भनिएको छ ।
आइतबार २१६ संक्रमित थप
देशभर पछिल्लो २४ घन्टामा थप २१६ जनामा कोरोना भाइरस संक्रमण पुष्टि भएको छ । आइतबार स्वास्थ्य जनसंख्या मन्त्रालयले नियमित पत्रकार सम्मेलनमा दिएको जानकारीअनुसार पछिल्लो २४ घन्टामा सात हजार ६३१ जनाको नमुना परीक्षण गरिएको थियो । उक्त अवधिमा २०९ जना कोरोना भाइरस संक्रमणमुक्त भएका छन् । यससँगै भाइरस संक्रमणमुक्त हुनेको संख्या ८ लाख १२ हजार ४१९ पुगेको छ । संक्रमणमुक्त हुने दर ९८ प्रतिशत रहेको मन्त्रालयले जनाएको छ । यससँगै नेपालमा पिसिआर विधिबाट कोरोना परीक्षण गरिँदा संक्रमितको संख्या ८ लाख ८७ हजार २०६ पुगेको स्वास्थ्य तथा जनसंख्या मन्त्रालयले जनाएको छ । पिसिआर विधिबाट परीक्षण गर्नेको संख्या ४८ लाख ७० हजार ३२४ र एन्टिजेन विधिबाट परीक्षण गर्नेको संख्या आठ लाख ३१ हजार ६१९ पुगेको छ । कुलमा संक्रमण दर १७ प्रतिशत छ ।
कोभिडविरुद्धको खोप लगाउनेको संख्या पछिल्लो २४ घन्टामा एक लाख ३३ हजार ८१२ पुगेको छ । हाल सक्रिय संक्रमितको संख्या चार हजार ९७१ छ । पछिल्लो २४ घन्टामा कोरोनाबाट दुई जनाको मृत्यु भएको छ । यससँगै कोरोनाबाट मृत्यु हुनेको संख्या ११ हजार ५९६ पुगेको छ । कोरोनाबाट हुने मृत्युदर एक दशमलव चार प्रतिशत रहेको छ । प्रतिशत १० लाख जनसंख्यामा मृत्युदर ३८१ दशमलव सात रहेको छ ।
हाल भेन्टिलेटरमा रहनेको संख्या जम्मा १९ र आइसियूमा ८३ जना रहेका छन् । होम आइसोलेसनमा चार हजार ७४७, संस्थागत आइसोलेसनमा २२४ रहेको छ । हाल देशभरमा ५०० भन्दा बढी सक्रिय संक्रमित भएका जिल्लामा काठमाडौं र ललितपुर रहेका छन् भने २०० भन्दा बढी उपचारार्थ संक्रमित रहेका जिल्लामा सुनसरी, भक्तपुर, कास्की, बाँके र कैलाली छन् । शून्य संक्रमित रहेका जिल्लामा सोलुखुम्बु, रसुवा, मनाङ, मुस्ताङ, हुम्ला, मुगु र बाजुरा रहेका छन् । हाल काठमाडांैमा एक हजार चार, ललितपुर ५८९ र भक्तपुरमा ४९७ सक्रिय संक्रमित रहेको मन्त्रालयले जनाएको छ ।
