रुकुम– हिमपातकै कारण मध्यपहाडी लोकमार्गसमेत अवरुद्ध भएको छ । लोकमार्ग अवरुद्ध भएपछि आवतजावतमा समस्या छ । रुकुमपूर्व र बागलुङको सिमाना पातीहाल्ना लेकमा बाक्लो हिउँ जमेको कारण लोकमार्ग अवरुद्ध भएको हो । लोकमार्ग अवरुद्ध भएपछि काठमाडौंबाट आएका गाडीलाई निसीतीरै फर्काइएको छ भने रुकुमकोटबाट गएका गाडीलाई रुकुमकोटमै फर्काइएको प्रमुख जिल्ला अधिकारी लक्ष्मीप्रसाद बाँस्कोटाले बताए ।
हिउँ पन्छाएर सडक खुलाउने योजना बनाए पनि हिउँ पर्ने क्रम नरोकिएपछि मेसीन लाउन पनि समस्या भएको उनले बताए । हिउँ पर्ने क्रम रोकियो भने मेसिन लगाएर बाटोमा जमेको हिउँ पन्छाएर सडक सञ्चालन गर्ने प्रजिअ बाँस्कोटाले बताए । त्यस्तै मंगलबार रातिदेखि परेको वर्षा र हिमपातका कारण मध्यपहाडी लोकमार्गको बागलुङ खण्ड अवरुद्ध भएको छ । लोकमार्गको बुर्तिबाङ–पातिहाल्ने खण्ड अवरुद्ध भएको हो ।
जिल्लाको निसीखोला गाउँपालिका–६ सिपमा दुई फिट भन्दा धेरै हिमपात भएको जिल्ला प्रहरी कार्यालयले जनाएको छ । सडक अवरुद्ध हुँदा पूर्वी रुकुमबाट बागलुङ र बागलुङदेखि पूर्वी रुकुमका लागि छुटेका सवारीसाधन सडकमै अलपत्र परेका छन् । हिउँ जमेकाले सडक पूर्ण रूपमा अवरुद्ध भएको प्रहरी नायब उपरीक्षक इकबाल हवारीले जानकारी दिए । त्रिभुवन राजपथअन्तर्गत पर्ने मकवानपुर जिल्लाको सीमभञ्ज्याङ र अघोरमा हिउँ पर्नाले हेटौँडा–काठमाडौंतर्फको यातायात सेवा बुधबार बिहानैदेखि अवरुद्ध भएको छ । मंगलबार रातिदेखि बाक्लो हिउँ परेपछि बुधबार बिहान सवा ७ बजेदेखि यातायात अवरुद्ध भएको इलाका प्रहरी कार्यालय पालुङले जनाएको छ ।
उक्त स्थानमा अहिले हिउँ परिरहेकाले काठमाडौंबाट हेटौँडातर्फ र हेटौँडाबाट काठमाडौंतर्फ जाने विभिन्न सवारीसाधन सञ्चालन गर्दा दुर्घटना हुने सम्भावनाको जोखिम देखिएकाले यातायात सञ्चालनमा रोक लगाएको हो । डडेल्धुरालगायत सुदूरपश्चिमका पहाडी जिल्लाका उच्च भेगमा मंगलबार रातिदेखि हिमपातका कारण भीमदत्त राजमार्ग र जयपृथ्वी राजमार्ग अवरुद्ध बनेका छन् । सुदूरपश्चिमका सात पहाडी जिल्ला जोड्ने भीमदत्त राजमार्गको हगुल्टे र साहुखर्क क्षेत्रमा रातिदेखि हिमपात भएपछि यातायात अवरुद्ध छ । हिउँ परेपछि तराई–पहाडका जिल्लाका लागि गुडेका सवारीसउाधन राजमार्गमै रोकिएका छन् । यात्रु बाटोमै अलपत्र परेको बताइएको छ ।
भीमदत्त राजमार्गको साहुखर्क र हगुल्टेमा बुधबार बिहानदेखि सडक अवरुद्ध भएको हो । सडक क्षेत्रको हिउँ पन्छाउन डोजर पठाइएको छ । डडेल्धुरा, बैतडी, बझाङ, डोटी, बाजुरा र दार्चुलाका उच्च भेगमा हिमपात सुरु भएसँगै चिसो बढेको छ । हिमपातका कारण यहाँका राजमार्गसमेत बन्द छन् । अनारखोली, भालुमारे खोडपे क्षेत्रमा परेको हिमपातका कारण दशरथचन्द राजमार्ग अवरुद्ध छ । बाजपानी, ढोल्यामोड, खोडपे क्षेत्रमा परेको हिउँका कारण जयपृथ्वी राजमार्गमा पनि बन्द छ ।
