काठमाडौं — नेपाली कलाकार तथा मार्शल आर्टका खेलाडी शन्नी बि.केसीको हलिउड मुभी ‘फाइट एण्ड फुरी–२’को गीत सार्वजनिक गरिएको छ । सन्नी बि. केसीको कथा निर्देशन तथा प्रमुख भूमिका रहेको फिल्ममा हलिउडका चर्चित कलाकारसमेत काम गरेका छन् । काठमाडौंको क्युज सिनेमा हलमा एक कार्यक्रमबीच फिल्ममा समावेश शीर्ष गीत सार्वजनिक गरिएको हो ।
कार्यक्रममा पूर्वडीआईजी रमेश खरेल, नेपाल चलचित्र कलाकार संघका अध्यक्ष रबिन्द्र खड्का तथा संचारकर्मीको उपस्थिति थियो । हलिउडका चर्चित अभिनेता ब्ु्रसलीको फिल्म ‘द इन्टर द ड्रागन’मा काम गरेका कलाकार बब वालको समेत अभिनय रहेको ‘फाइट एण्ड फुरी–२’ मा लियो फोङ, जोस्फू माइकल, एमएम ए फाइटरलगायत हलिउडका कलाकारको अभिनय रहेको छ । अंग्रेजी भाषामा बनेको फिल्म नेपालीमा डब गरेर नेपालमा समेत प्रदर्शन गरिने निर्देशक तथा कलाकार शन्नी बि.ले बताए । कार्यक्रममा बोल्दै शन्नी बि.ले अमेरिकामा रहेपनि नेपाली चलचित्र क्षेत्रको लागि कार्य गरिरहेको र छिट्टै नेपाली चलचित्र बनाउन आफुले तयारी गरिरहेको बताए ।
कार्यक्रममा बोल्दै पूर्वडीआईजी रमेश खरेलले कलेज पढ्दाको समयको शन्नी बिको बारेमा बताए । उनले भने, ‘शन्नी बि कलेज पढ्दादेखि नै चलचित्रमा रुचि राख्ने गर्थे, उनी बु्रसलीको फिल्म हेरेर एक्शन गर्थे । अहिले आएर हलिउडमा समेत काम गरेकामा खुसी लागेको छ ।’ एक्शन जनराको ‘फाइट एण्ड फुरी–२’ मा ह्युमन ट्राफिकिङको कथालाई उठाउन खोजिएको कलाकार तथा निर्देशक केसीले बताए । बलिउडका चर्चित कलाकारहरू जस्तै गोबिन्दा, मिथुनका फिल्महरूमा काम गरिसकेका शन्नी बि.केसीले केही बर्षअघि नेपाली चलचित्र ‘गोर्खा रक्षक’मा काम गरेका थिए ।
