काठमाडौं — पूर्वी पहाडी जिल्ला पाँचथरको फिदिममा किरात लिम्बू समुदायमा बजाइने लोकबाजा च्याबु्रङ (केलाङ) बजाउने तालिम सम्पन्न भएको छ । नेपाल संगीत तथा नाट्य प्रज्ञा–प्रतिष्ठान, संगीत विभागको आयोजना र किरात याक्थुङ चुम्लुङ जिल्ला शाखा पाँचथरको व्यावस्थापनमा प्रदेश नं. १ स्तरीय लोकबाजा च्याबु्रङ (केलाङ) बजाउने तालिम सम्पन्न भएको हो ।
फिदिमस्थित वरदान संगीतालयमा लिम्बू जातिको परम्परागत मौलिक लोकबाजा च्याबु्रङ बजाउने दुई हप्ते सैद्धान्तिक तथा प्रयोगात्मक तालिम मंसिर १२ गतेदेखि २६ गतेसम्म सञ्चालन भएको थियो । उक्त तालिम कार्यक्रममा ताप्लेजुङ, पाँचथर, तेह्रथुुमलगायतका जिल्लाबाट २२ जनाले तालिम लिएका थिए । ‘मैले वर्षौं च्याब्रुङ बजाएँ, नाचेँ तर यसबारे सैद्धान्तिक ज्ञान भने केही पनि थाहा पाएको रहेनछु । यो तालिमबाट मैले धेरै कुरा सिकेँ । पहिले बजाएको त अव्यवस्थित र अवैज्ञानिक पो रहेछ’ तालिममा सहभागी ताप्लेजुङका केबी किरातीले सुनाए । यस्तै तालिममा सहभागी तेह्रथुमकी समीक्षा थेगुवाले भनिन्, ‘हामीले सही तरिकाले च्याबु्रङ बजाउनु, नाच्नुमात्र होइन, यसको उत्पत्ति र महत्वदेखि बनाउने तरिका समेत जान्यौँ । तालिमबाट धेरै फाइदा भयो ।’
नेपाल संगीत तथा नाट्य प्रज्ञा–प्रतिष्ठान, संगीत विभागका प्रमुख प्राज्ञ अशोक राईको प्रत्यक्ष निगरानीमा सम्पन्न उक्त कार्यक्रमका प्रमुख प्रशिक्षकमा यासेली योङहाङ र वरदान सङ्गीतालयका प्रमुख बुद्ध लिम्बू इङ्वा रहेका थिए । उक्त तालिमको संघीय सांसद तथा पूर्वभौतिक पूर्वाधार तथा यातायातमन्त्री वसन्तकुमार नेम्बाङ, प्राज्ञसभा सदस्य भूमिका सुब्बा, किरात याक्थुङ चुम्लुङका केन्द्रीय महासचिव निरन्ती तुम्बापो, संगीतज्ञ शिलाबहादुर मोक्तान तथा गायिका कुन्ति मोक्तानलागायत व्यक्तित्वले हरेक दिनको तालिमको अवलोकन तथा अनुगमन गरेका थिए ।
तालिममा कार्यक्रममा घटिका थेबे, समीक्षा लिम्बू, जुनु तुम्बापो, सुम्जिरी तुम्बापो, देबुबहादुर साँवा, प्रभा मेयोङ्वा, उदय नेम्वाङ, केबी किराती, कर्मचन्द्र नेम्बाङ, मन्दिरा मेयोङ्वा, महेश सेलिङ, मिराकहाङ लिम्बू, महेन्द्रकुमार तुम्बापो, चन्द्रप्रकाश तुम्बापो, सेसेमा सुहाङ, तारा लिङ्देन, सम्झना योङहाङ, सुखराज लिम्बू, ज्योति बेघा, सुरेन्द्र सुहाङ, वीरेन्द्र लिम्बू माबो तथा लाजोहाङ लिम्बू सहभागी थिए ।
