काठमाडौं– प्रहरी महानिरीक्षक शैलेश थापा क्षत्रीले प्रहरी प्रधान कार्यालय परिसरभित्र नवनिर्मित कार्यालय भवनको बुधबार आयोजित कार्यक्रमबीच उद्घाटन गरेका छन् । साथै उनले उक्त भवन तथा कार्यालय कक्षहरूको निरीक्षणसमेत गरे । प्रहरी महानिरीक्षक थापा क्षत्रीले भवन निर्माण कार्यमा सहयोग पु¥याउने तुलसीभक्त कन्स्ट्रक्सन प्रालिका नवराज श्रेष्ठ तथा प्रहरी नायब उपरीक्षकद्वय सुन्दर लाखे र रोशन सारुलाई प्रशंसापत्र प्रदान गरे ।
सो अवसरमा प्रहरी महानिरीक्षक थापा क्षत्रीले नवनिर्मित भवन आधुनिक तथा प्रविधियुक्त भएको चर्चा गर्दै भवन निर्माणमा प्रत्यक्ष एवं अप्रत्यक्ष योगदान पु¥याउने व्यक्तिहरूप्रति आभार प्रकट गरे । भवन प्राप्तिसँगै प्रहरीको कार्य सम्पादनमा पनि स्तर वृद्धि हुनुपर्नेमा उनले जोड दिए । नवनिर्मित कार्यालय भवनमा कार्यरत रहने प्रहरी कर्मचारीहरूले भवनको उपयोग हुने गरी कार्यसम्पादन गर्नुका साथै त्यसको आवश्यक मर्मत सम्भार एवं जगेर्नाका लागि क्रियाशील रहन उनले निर्देशन दिए ।
कार्यक्रममा प्रहरी प्रधान कार्यालय भौतिक पूर्वाधार निर्देशनालयका प्रहरी उपरीक्षक ई. रामकुमार चौधरीले भवन निर्माण सम्बन्धी प्रतिवेदन प्रस्तुत गर्दै नेपाल प्रहरीको नियमित बजेटबाट निर्मित ४ तले उक्त भवन कूल १६ करोड १९ लाख ६३ हजार ६ सय ३० रूपैयाँ ९२ पैसाको लागतमा निर्माण कार्य सम्पन्न भएको जानकारी दिए ।
प्रहरी प्रधान कार्यालय परिसरलाई आधुनिक एवं व्यवस्थित बनाउनुका साथै सुरक्षित सेवा प्रवाह गर्ने हेतुले थप भौतिक पूर्वाधारहरू निर्माण गरिएको हो । नियो क्लासिकल डिजाइन प्ल्याटफर्ममा आधारित रही तयार गरिएको उक्त भवन भूकम्प प्रतिरोधात्मक संरचनामा रहेको छ । नवनिर्मित भवनमा प्रहरी निरीक्षणालय, सवारी महाशाखा, संचार निर्देशनालय, अन्वेषण योजना तथा विकास निर्देशनालय, सुरक्षा सेवा व्यवस्थापन महाशाखा, प्रशासन महाशाखालगायत कार्यालयहरूबाट कार्य संचालन भइरहेको छ । उक्त कार्यालय भवनको बेसमेन्टमा २ वटा स्टोर रुमहरूको व्यवस्थापन सँगै दुईपांग्रे सवारीसाधन पार्किङको व्यवस्था रहेको छ । बेसमेन्टबाहेकको ४५ हजार ४ सय १३ वर्गफिटमा फैलिएको उक्त भवनमा कूल १ सय ४ वटा कार्यकक्षहरू, २० वटा शौचालय, ५ वटा चेन्जिङ रुम, ४ वटा स्टोर रुम, ११ वटा बैठक कक्ष र तालिम सञ्चालनको लागि २ वटा कक्षा कोठा रहेका छन् ।
कार्यक्रममा प्रहरी अतिरिक्त महानिरीक्षकहरू, प्रहरी नायव महानिरीक्षकहरू, राष्ट्रिय बाणिज्य बैंकका उच्च पदस्थ अधिकृत एवं वरिष्ठ प्रहरी अधिकृत तथा प्रहरी अधिकृतहरूको उपस्थिति रहेको थियो ।
