वीरगन्ज– सशस्त्र प्रहरी बल नं. २ छिन्नमस्ता बाहिनीले अवैध कार्यविरुद्ध अभियान संचालन गरेको छ । नयाँ नेतृत्व अर्थात् सशस्त्र प्रहरीका डिआइजी गणेशबहादुर ठाडा मगर आएपश्चात् तस्करीजन्य कार्य नियन्त्रणमा थप आक्रामक बनेको प्रहरी नेपालको नं २ छिन्नमस्ता बाहिनी क्रमशः विभिन्न उपलब्धि हासिल गरेको देखिन्छ । गत डेढ महिनामा करिब १० करोड बराबरको अवैध सामान बरामद गरेको तथा तस्करी नियन्त्रणमा ब्यापक परिचालनपश्चात् राजस्व असुलीमा उल्लेख्य सुधार भएको तथ्यांक भन्सार कार्यालयहरूबाट बुझिएको छ ।
गत असोज महिनाका लागि १७ अर्ब १ करोड ३४ लाख ११ हजार ५ सय अनुमानित लक्ष्य तोकिएको २ नं प्रदेशको विभिन्न भन्सार कार्यालयहरूबाट लक्ष्यभन्दा ३ अर्ब ९१ करोड बढी २० अर्ब ९२ करोड ४७ लाख ४५ हजार ७ सय ४ राजस्व संकलन गर्न सफल भएको तथ्यांकले देखाएको छ । राजस्वको वृद्धि यो महिनासमेत २० प्रतिशतभन्दा बढी उठ्ने संकेत देखिएको छ भने तर अन्तिम डाटा आउन बाँकी रहेको छ ।
यसबाहेक विभिन्न खालका लागुऔषध सहित ११ जना व्यक्ति पक्राउ, ललाइफकाई भारत लैजाने लागेका ४ बालिकाहरूसहित ४ व्यक्ति पक्राउ, तिहारलगायत चाडबाडको अवसरमा ४ लाखभन्दा बढी मूल्यको विभिन्न खाले पटकाहरू बरामद गरी नष्ट, विपद तथा सडक दुर्घटनामा उद्धार कार्यमा परिचालनलगायत कार्यमा सहभागि भएको देखिन्छ ।
सूचनाको प्रभावकारी परिचालनपश्चात गत २८ कात्तिकबाट सबै जिल्लाहरूमा लगाइएको गाँजा फडानी सुरु गरेको प्रहरीले संयुक्त रूपमा महोत्तरी र सर्लाहीको करिब १४ बिगाहामा लगाइएको गाँजा नष्ट गरेको छ । यस क्रममा करिब १० ट्रक गाँजा नष्ट गरेको बाहिनी प्रमुख डिआइजी ठाडा मगरले बताएका छन् । बाहिनी सं्रोतका अनुसार यो अभियान अन्य जिल्लाहरूमा समेत निकट भविष्यमा संचालन गर्ने गरी कैयौँ बिगाहामा लगाइएको गाँजा नष्ट गरिने योजना रहेको बताइएको छ ।
यस अलावा यो अवधिमा पर्सा, बारा, सप्तरी, महोत्तरीलगायत जिल्लाका विभिन्न स्थानबाट करिब २ सय ५० केजीभन्दा बढी तयारी गाँजा, २२ केजी चरेस तथा व्यक्तिहरू पक्राउ गरी नेपाल प्रहरीलाई बुझाएको छ । २८ कात्तिकमा महोत्तरीको एकडाँडा इलाकाबाट ४४ केजी तथा ३० कात्तिकमा बाराको बेनौली इलाकाबाट थप ४० केजी गाँजा बरामद गरेको छ । भरपर्दो सूचना तथा प्रभावकारी परिचालनको कारण विभिन्न जिल्लाको विभिन्न स्थानबाट चोरी तस्करीबाट ल्याउँदै गरेको तथा लुकाइछिपाई राखेको करिब ५ सय क्यु फिट काठ बरामद गरी विभिन्न वन कार्यालयहरूमा बुझाएको छ ।
यसै क्रममा २९ कात्तिक रौतहट वृन्दावन नपा–६ इसा महमद्को घर इलाकाबाट ११ गोलिया (३३ क्यु फिट) तथा ६९.२४ क्यु फिट चिरान काठ बरामद गरी वन कार्यालय चन्द्रपुरमा बुझाएको छ । त्यस्तै शुक्रबार जिल्ला महोत्तरी एकडाँडा गाउपालिका–५ गेना बथनाहामा प्रहरी बल नेपाल नं. २ छिन्नमस्ता बाहिनी मुख्यालय बर्दिबास महोत्तरीबाट खटिएको सप्रबह सन्तोषकुमार सिंहको ५ जनाको स्क्वाड टोलीले चेक जाँच गर्ने क्रममा नेपालबाट भारततर्फ ३ जना व्यक्तिहरू क्रमशः महोत्तरी एकडाँडा–५ बस्ने बर्ष ३६ को रमेश पासवान र वर्ष ६० को राम खेलावन मण्डल तथा महोत्तरी जलेश्वर–७ बस्ने वर्ष ५० को सुरेश यादवले टाउकोमा बोकी लैजाँदै गरेको प्रतिबन्धित लागुऔषध गाँजा १ सय १.५ केजीसहित निजहरूलाई नियन्त्रणमा लिई जिल्ला प्रहरी कार्यालय महोत्तरीमा बुझाएको डिआइजी मगरले बताएका छन् ।
