रूपन्देही– राष्ट्रपति विद्यादेवी भण्डारीले लुम्बिनी गुरुयोजना छिटो पूरा गर्न आग्रह गरेकी छन् । लुम्बिनी बौद्ध विश्वविद्यालयको १७औँ वार्षिकोत्सव तथा त्रियान प्रज्ञा सम्मेलन एवं केन्द्रीय पुस्तकालय भवनको उद्घाटन समारोहमा उनले लुम्बिनी संसारभरका बौद्धमार्गीको लागि विशेष महत्वको स्थल भएकाले लुम्बिनीको विकासमा तीनै तहका सरकारले ध्यान दिनुपर्ने बताइन् ।
उनले लुम्बिनी र योसँग जोडिएका कपिलवस्तु, नवलपरासी र रूपन्देहीका विभिन्न बुद्धस्थललाई जोडेर विशेष योजना बनाउनुपर्ने धारणा व्यक्त गरिन् । उनले संघ, स्थानीय र प्रदेश सरकारले लुम्बिनीसंग सम्बन्धित सबै स्थानलाई जोडेर विशेष योजना बनाउनुपर्ने बताइन् । राष्ट्रपति भण्डारीले ‘अन्तर्राष्ट्रिय बौद्धसभा तथा ध्यानगृह’ निर्माणको कामबारे लुम्बिनी विकास कोषसँग जानकारी लिँदै काम छिटो पूरा गर्न आग्रह गरिन् । उनले लुम्बिनीमा यो सभाहल अत्यावश्यक भएका कारण छिटो निर्माण पूरा गर्नुपर्ने बताउँदै भनिन्, ‘सभाहल निर्माणसँगै लुम्बिनी गुरुयोजनाको काम पूरा गरेर तिलौराकोट र रामग्रामको विकासमा ध्यान दिनुस्’ लुम्बिनीका प्रदेश प्रमुख अमिक शेरचनले बुद्धका उपदेश अहिले पनि सबैका लागि अनुकरणीय रहेको बताए ।
राष्ट्रपति भण्डारीलाई विकास कोषका योजना प्रमुख इञ्जीनियर सरोज भट्टराईले बौद्धसभा तथा ध्यानगृहका बारेमा जानकारी गराउँदै असारसम्ममा काम पूरा हुने बताए । उनले असार मसान्तसम्म निर्माणको काम पूरा भए पनि वैशाख पूर्णिमामा उद्घाटन गर्ने राष्ट्रपतिलाई जानकारी गराए । विसं २०७६ असारसम्म सक्ने लक्ष्य राखिएको सभाहलको काम निर्धारित समयमा नसकिएपछि ठेक्काको अवधि थपिएको थियो । सभाहलसहितका संरचना बनाउन अनक–अर्घाखाँची–बाबुल जेभी सिद्धार्थनगरले ठेक्का पाएको थियो ।
लुम्बिनीमा बुद्ध जयन्ती समारोह तथा विभिन्न धार्मिक कार्यक्रम तथा ध्यान गर्न सभाहल नभएपछि विकास कोषले आधुनिक र भव्य सभाहल निर्माण सुरु गरेको हो । पच्चीस सय ६२औँ बुद्ध जयन्तीका अवसरमा विसं २०७५ वैशाख १८ गते राष्ट्रपति भण्डारीले यो सभाहलको शिलान्यास गरेकी थिईन् ।
