भक्तपुर– भूमि व्यवस्था, सहकारी तथा गरिबी निवारणमन्त्री शशि श्रेष्ठले आगामी पुस महिनासम्ममा सुकुम्बासी र लालपूर्जाविहीन स्वबासीको समस्या समाधान गर्ने जानकारी गराएकी छन् ।
नेकपा (माओवादी केन्द्र) मध्यपुरथिमि नगर कमिटीको प्रथम नगर अधिवेशनको उद्घाटन गर्दै उनले यस्तो जानकारी गराएकी हुन् । उनले भनिन्, ‘पुस महिनाभित्र देशमा कोही पनि भूमिहीन नरहने गरी समस्या समाधान गर्ने गरी लागेको छु ।’
उनले यसका लागि कार्ययोजना बनिसकेको पनि जानकारी गराईन् । हाल यसको कार्यविधि बन्दै गरेकाले अब भूमिहीन सुकुम्बासी र लालपूर्जाविहीनको समस्या सधैंको लागी समाधान हुने विश्वास लिईन् ।
उनले विसं २०२१ को नापीमा छुटेका, त्यसअघिदेखि आफ्नै जग्गाको भोगचलन गरेर आएका तर हातमा लालपूर्जा नभएका भूमिहीन धेरै रहेको बताईन् । उनले उपत्यकाभित्रका लालपूर्जाविहीन स्वबासीको समस्या र कतिपय सुकुम्बासीको समस्या यथावतै रहेकोले पनि आफुले समस्या समाधान गर्ने तर्फ लागेको बताईन् ।
अघिल्लो सरकारले गठन गरेको भूमि आयोगले खासै काम नगरेकोले पनि यसमा काम गर्न गाहे भएको उनको भनाई थियो । उनले अब राष्ट्रिय भूमि आयोगले नै काम गरेर गठन आदेशबाटै भए पनि सुकुम्बासी र लालपूर्जाविहीनको समस्याको समाधान गर्ने बताईन् । कानूनको अभावले नभई इमान्दारितापूर्वक कार्यान्वयन नगर्दा संविधानले दिएको कतिपय अधिकार महिलाहरूले नपाएको भन्दै अब सबैको अधिकार स्थापित हुनेगरी काम गर्ने उनले प्रतिवद्धता जनाईन् ।
उनले कानूनमै छोरीका नाममा अंशको व्यवस्था गरे पनि त्यसलाई अझै कार्यान्वयनमा ल्याउन नसकेकोमा दुःख व्यक्त गरिन् । मन्त्री श्रेष्ठले छोरीको नाममा पनि सम्पत्ति भन्ने कानूनलाई कार्यान्वयनमा ल्याउने जनाउँदै भनिन्, ‘अहिले पनि अंशबण्डा हुँदा मालपोत कार्यालयले छोरी छ कि खोज्दैन, अब आमा, श्रीमती, छोरी पनि अंशियार कायम हुन्छन् र मालपोतले महिलालाई पनि अंशियार हकका आधारमा अंशबण्डा गर्दा छोरी खोज्ने गरी व्यवस्था गराउँछु ।’
