काठमाडौं– सरकारले अब १८ वर्षभन्दा माथिका कोरोना भाइरसविरुद्धको खोप लगाउन छुटेका सबैलाई खोप लगाउन थालेको छ । पहिले लक्षित वर्गलाई मात्र लगाउँदै आएको खोप अहिले १८ वर्षभन्दा माथिका सबै सर्वसाधारणलाई लगाउन थालिएको हो । विभिन्न देशले अनुदानमा खोप उपलब्ध गराएको र सरकारले आफैँले पनि खोप खरिद गरेपछि सर्वसाधरण सबैलाई खोप लगाउन थालिएको हो ।
खोपको सहज उपलब्धतासँगै सबैलाई खोप दिने तयारीमा सरकार लागेको छ । चाँडै सबै जनसंख्यालाई पुग्ने खोपको पूर्ण मात्रा ६ करोड डोज खोप नेपाल ल्याइने सरकारले बताइसकेको छ । सरकारले सबै दीर्घ रोग भएका १२ वर्षदेखि १७ वर्ष उमेरसमूहका बालबालिकालाई पनि खोप लगाउन थालेको छ । स्वास्थ्य तथा जनसंख्या मन्त्रालयका सहप्रवक्ता डा समीरकुमार अधिकारीले खोप नियमित आउन थालेकाले १८ वर्षभन्दा माथिका सबैलाई नियमित खोप लगाउन थालिएको जानकारी दिएका छन् । उनले यसअघि खोप लगाउन छुटेका सबैलाई खोप केन्द्रमा गई खोप लगाउन आग्रह गरे । सरकारले आगामी पुस मसान्तभित्र दुई तिहाई र चैतमसान्तसम्म लक्षित सबैलाई खोप लगाउने लक्ष्य राखेको छ । दुई करोड १७ लाखलाई खोप लगाउने लक्ष्य राखिएको छ ।
अहिलेसम्म कूल जनसंख्याको ३० प्रतिशत जनसंख्यालाई पहिलो मात्रा र २६ प्रतिशत जनसंख्यालाई दोस्रो मात्राको खोप प्रदान गरिएको छ । काठमाडौं जिल्ला स्वास्थ्य कार्यालयका प्रमुख शम्भु काफ्लेले १८ वर्षभन्दा माथिका सबैलाई काठमाडौंका पाँच खोप केन्द्रबाट नियमित खोप प्रदान गरिरहेको जानकारी दिएका छन् । उनले भेरोसेल र एस्ट्राजेनिका खोप दिइसकेको बताए । प्रमुख काफ्लका अनुसार कार्यालयले वीरेन्द्र सैनिक अस्पताल, नेपाल प्रहरी अस्पताल, कलंकीको सहिद मेमोरियल अस्पताल, बल्खुमा बयोधा अस्पताल, गोगंबुस्थित नयाँ बसपार्कको लोत्से भवन र जडीबुडीस्थित जडीबुडी प्रशोधन केन्द्रमा नियमित खोप प्रदान गरिरहेको छ ।
यसैगरी उनले १२ देखि १७ वर्ष उमेर समूहका बालबालिकालाई पनि आइतबारदेखि फाइजर खोप उपलब्ध गराउन थालिएको बताए । उनले सहिद गंगालाल हृदयकेन्द्र, वीरेन्द्र सैनिक अस्पताल, वीर अस्पताल र सिभिल अस्पतालमा फाइजर खोप लगाउन थालिएको जानकारी दिए । फाइजर खोप अभियान बुधबारसम्म सञ्चालन हुने छ । यसैगरी सबै गर्भवती महिलालाई पनि खोप लगाउन सुरु गरिएको छ । यसअघि उच्च जोखिम भएका गर्भवती महिलालाई मात्र खोप लगाउने गरेता पनि अबदेखि गर्भवती भएको तीन महिना पूरा भएका सबै महिलालाई लगाउन थालिएको मन्त्रालयका सहप्रवक्ता डा.अधिकारीले जानकारी दिए ।
अभियानकै क्रममा ललितपुर महानगरपालिकाले कोरोना विरुद्धको कोभिशिल्ड र भेरोसेल खोप शनिबारबाहेक अन्य सबै दिन दिन सुरु गरेको छ । आइतबारदेखि शुक्रबारसम्म बिहान १० बजेदेखि ३ बजेसम्म महानगरपालिकको जनस्वास्थ्य शाखा छबहालमा खोप लगाउने व्यवस्था गरिएको महानगरले जनाएको छ । ललितपुर महानगरपालिकाका प्रमुख प्रशासकीय अधिकृत गणेश अर्यालले खोपमा नागरिकको सहज पहुँच होस् भन्ने हेतुले उक्त निर्णय गरेको बताए । यसअघि समयावधि तोकेरमात्र खोप कार्यक्रम सञ्चालन गर्ने गरिए पनि अब नियमित रूपमा शनिबारबाहेक सबै दिन खोप कार्यक्रम सञ्चालन गरिने बताइएको छ ।
उनले भने, ‘यसअघि हामीले मिति तोकेर खोप कार्यक्रम सञ्चालन गथ्र्यौँ, तोकेकै मितिमा आएर खोप लिन केही नागरिक असमर्थ भएको पनि जानकारीमा आयो, त्यसैले यस्तो निर्णय गरेका हौँ ।’ नागरिकको सहजताको लागि महानगरले साताको ६ दिन खोप कार्यक्रम सञ्चालन गरेको उनले बताए । साताको ६ दिन खोप लगाउने व्यवस्थाले खोप लिन सबैलाई सहज हुने उनको भनाइ छ । ललितपुर महानगर लगातार कोरोनाविरुद्धको खोप सञ्चालन गर्ने पहिलो स्थानीय तह हो । महानगरले यस अघि उमेर, व्यक्तिको स्वास्थ्य अवस्थालगायतलाई प्राथमिकतामा राखेर खोप कार्यक्रम सञ्चालन गरेको थियो ।
