काठमाडौं– नेपाल सरकारले १२ वर्षमुनिका बालबालिकालाई पनि कोभिड १९ विरुद्धको खोप दिने तयारी गरेको छ । पछिल्लोपटक विश्वभर फैलिएको डेल्टा भेरियन्टको कोरोना भाइरस सबै उमेर समूहका मानिसका लागि अति संक्रामक रहेको भेटिएपछि विश्वभर नै बालबालिकालाई पनि खोप दिने विषयमा अध्ययन भइरहेको छ । डेल्टा भेरियन्टबाट तुलनात्मक रूपमा बालबालिका बढी प्रभावित भएको पाइएपछि सरकारले १२ वर्षमुनिका बालबालिकालाई पनि खोप दिने तयारी अघि बढाएको हो । स्वास्थ्य तथा जनसंख्यामन्त्री विरोध खतिवडाले बालकालिकाका लागि कोरोना भाइरसविरुद्धको खोप ल्याउने तयारी भइरहेको जानकारी दिएका छन् ।
स्वास्थ्य पत्रकार मञ्च नेपालले बिहीबार काठमाडौंमा आयोजना गरेको पत्रकार सम्मेलनमा मन्त्री खतिवडाले अहिले भारत र चीनमा १२ वर्षमुनिका बालकालिकाका लागि खोपको परीक्षण भइरहेको र त्यसको सफल परीक्षणपश्चात नेपालले पनि खोप ल्याउने तयारी गरेको जानकारी दिएका छन् । १२ वर्षमुनिका बालबालिकाका लागि लगाउने खोपको अहिले भारत र चीनमा दोस्रो चरणको सफल परीक्षण सकेर तेस्रो तथा अन्तिम चरणको परीक्षण भइरहेको जानकारी दिँदै उनले भने, ‘तेस्रो चरणको सफल परीक्षण सकेर विश्व स्वास्थ्य संगठनले मान्यता दिइसकेपछि हामीले उक्त खोप ल्याउँछौँ ।’
भारत वा चीन जसले चाँडो खोप उपलब्ध गराउँछ सोही मुलुकबाट खोप ल्याइने तयारी भइरहेको उनको भनाइ छ । अहिले १२ वर्षभन्दामाथिका उमेरसमूहका बालबालिकालाई लगाउनका लागि सरकारले फाइजर र मोर्डना खोप ल्याउन थालेको पनि मन्त्री खतिवडाले जानकारी दिएका छन् । केही दिनअघि मात्र अमेरिका सरकारले कोभ्याक्समार्फत नेपाललाई एक लाख ६२० मात्रा खोप उपलब्ध गराएको थियो । उक्त खोप १८ वर्षमुनिका दीर्घ रोग भएका बालबालिकालाई दिने सरकारको तयारी छ ।
मन्त्री खतिवडाले फाइजर ६० लाख र मोडर्ना ४० लाख मात्रा खोप सुनिश्चित गरिएको जानकारी दिएका छन् । त्यति मात्रकाको खोपका लागि नेपाल सरकारले पैसा पनि तिरिसकेका जानकारी दिए । चाँडै नै फाइजर र मोडर्ना खोप ल्याउने र ती दुबै खोप १२ देखि १८ वर्ष उमेर समूहका बालबालिकालाई लगाइने उनले बताए ।
पत्रकार सम्मेलनमा मन्त्री खतिवडाले स्वास्थ्य संवेदनशीलतामा भ्रष्टाचार हुन नदिने प्रतिबद्धता पनि जनाएका छन् । यसअघि स्वास्थ्य क्षेत्रमा भ्रष्टाचार र अनियमितताका कुरा व्यापक चर्चामा आएको भन्दै भने, ‘तर, म आएपछि अब स्वास्थ्यजस्तो संवेदनशील क्षेत्रमा भ्रष्टाचार र अनियमितता हुन दिँदैन ।’
मन्त्री खतिवडाले कोरोना भाइरसको उपचार गरेका केही अस्पतालले तोकेभन्दा बढी पैसा मागेको हुनाले रकम निकासा नगरिएको बताएका छन् । ‘केही अस्पतालले तीन दिनका बिरामीलाई १३ दिन भर्ना गरिएको, शैय्यामा राखेर उपचार गरिएका बिरामीलाई संघन उपचारकक्ष (आइसियु) र भेन्टिलेटरमा राखेर उपचार गरिएको भनेर गलत रिर्पोट बुझाएर रकम माग गरेको पाइयो’, उनले भने, ‘रु. १० हजारको बिल बढाएर अस्पतालले रु ९० हजार पनि पु¥याएको पाइयो । त्यही भएर हामीले त्यस्ता अस्पतालको रकम निकास गरेका छैनौँ ।’
मन्त्री खतिवडाले केही औषधिमा औषधि उत्पादक सङ्घले मनोमानीरूपमा पैसा बढाएको भन्ने गुनासो आएकाले सत्यतथ्य बुझ्न मन्त्रालयका सचिवलाई निर्देशन दिएको जानकारी दिएका छन् । उनले स्वास्थ्य बिमा कार्यक्रममा निःशुल्क बनाउने आफूले प्रयास गर्नेसमेत बताएका छन् । ‘अहिले लोपोन्मुख र अल्पसंख्यकलाई स्वास्थ्य बिमा निःशुल्क गर्ने प्रयास रहेको छु’, उनले भने, ‘लोपोन्मुख र अल्पसंख्यकलाई निःशुल्क गराए विस्तारै अन्य वर्गलाई पनि निःशुल्क स्वास्थ्य बिमा गराउन सकिन्छ ।’ स्वास्थ्य बिमा कार्यक्रममा प्रतिपरिवारले वार्षिक रु. तीन हजार ५०० को बिमा गरे रु. एक लाखसम्म निःशुल्क उपचार गर्न पाइन्छ । उनले सबैलाई स्वास्थ्य सेवाको सहज पहुँच पु¥याउने दृढता पनि व्यक्त
गरेका छन् ।
-1745656903.jpeg)
