काठमाडौं– कोरोनाका कारण लामो समयदेखि रोकिएको रोजगार गन्तव्य मुलुक दक्षिण कोरियामा श्रमिक पठाउन सुरु भएको छ । इपिएस कोरिया शाखाका निर्देशक सुरेश रावतका अनुसार कोरोनाका कारण ०७६ चैतदेखि रोकिएको श्रमिक पठाउने काम पहिलो चरणमा बुधबारदेखि सुरु हुने भएको हो ।
कोरिया सरकारले राखेको सर्त पूरा गरेर पहिलो चरणमा प्रतिबद्ध श्रमिकहरूमध्ये ४८ जनालाई पहिलो चरणमा कोरिया पठाउन लागिएको निर्देशक रावतले बताएका छन् । उनले भने, ‘कोरियाले राखेको सर्त पूरा गरेर भोलि (बुधबार) ४८ जनालाई सिधै कोरिया पठाउँदै छौँ ।’ कोरिया सरकारले सुरुमा ४ वर्ष १० महिना कोरियामा रोजगारी गरेका श्रमिकहरूलाई लैजान सुरु गरेको उनले बताएका छन् । करिब २० महिनासम्म रोकिएको कोरिया रोजगारी पुनः सुरु हुनु नेपालका लागि सकारात्मक भएको उनले बताए ।
पहिलो चरणमा जाने श्रमिकको पिसिआर रिपोर्ट नेगेटिभ आएको पनि निर्देशक रावतले बताएका छन् । उनले भने, ‘कोरिया सरकारले राखेको सर्तमध्ये ४८ घन्टा पहिलेको पिसिआर रिपोर्ट नेगेटिभ हुनु पर्ने पनि एक हो ।’ कोरिया जाने सबै प्रक्रिया पूरा भएको र ४८ जना बुधबार साँझ ७ः३० बजे कोरियन एयरलाइन्समार्फत कोरिया जाने निर्देशक रावतले बताएका छन् । उनले भने, ‘कोरियाले सिधा उडानबाट मात्रै कोरिया आउनु पर्ने भनेको थियो ।’
निर्देशक रावतका अनुसार श्रमिकले कोरिया पुगेपछि १४ दिन अनिवार्य क्वारेन्टाइनमा बस्नु पर्ने, सो अवधिको बिमा गर्नु पर्ने र त्यसको खर्च श्रमिक आफैँले बेहोर्नु पर्ने छ । कोरिया जाने युवाहरूले कोरोनाविरुद्धको खोपको पूर्ण मात्रा पनि अनिवार्य रूपमा लगाउनु पर्ने सर्त राखिएको उनले बताए । उनका अनुसार कोरियामा क्वारेन्टाइन बस्दा कुनै दुर्घटना भएमा सहजीकरण होस् भनेर बिमा अनिवार्य गरिएको हो । कोरियाले पहिलो चरणमा १ सय १९ जनाको कन्फर्मेसन सर्टिफिकेट अफ इन्सुलेसन पठाएको र बाँकी रहेका ७१ जना नोभेम्बरसम्म कोरिया जाने निर्देशक रावतले बताएका छन् । बुधबार कोरिया जाने श्रमिकलाई दिउँसो २ बजे भर्चुअल माध्यमबाट पूर्वप्रस्थान अभिमुखीकरण कार्यक्रम सञ्चालन गरिने इपिएस कोरिया शाखाले जनाएको छ । सो कार्यक्रममा सबै जना अनिवार्य उपस्थित हुनुपर्ने निर्देशक रावतले बताए । कोरोनाका कारण कोरिया जाने श्रमिकले टिकटसमेत आफैँले व्यहोर्नु पर्ने उनले बताएका छन् ।
नेपालका तर्फबाट लामो प्रयासपछि श्रमिक पठाउन सफल भइएको भन्दै निर्देशक रावतले खुसी व्यक्त गरेका छन् । रावतका अनुसार नेपालले नयाँ श्रमिक लैजाने विषयमा पनि आग्रह गरिरहेको र कोरिया त्यसमा पनि सकारात्मक देखिएको छ । उनीहरूको पहिलो प्राथमिकतामा प्रतिबद्ध श्रमिक परेकाले नयाँ श्रमिक पनि छिट्टै जान पाउन विश्वासमा आफूहरू रहेको उनले बताए । अहिले कोरिया जाने प्रक्रियामा २ हजार ५ सय जना प्रतिबद्ध र करिब ७ हजार नयाँ श्रमिक रहेको शाखाको तथ्यांकले देखाएको छ । कोरियाले हरेक चरणमा ५० जनाका दरले नेपाली श्रमिक लैजाने बताइएको छ ।
कोरिया जाने श्रमिकले सिधा काठमाडौं–सोल उडानमार्फत जानु पर्ने छ । रोजगारदाताको चाहना तथा नेपाली पक्षको निर्णयअनुरूप काठमाडौं–सोल सिधा उडान गरिएको निर्देशक रावतले बताएका छन् । उनका अनुसार शाखाले काठमाडौं–सोल सिधा उडानका लागि बोलपत्र आह्वान गरेको भए पनि कुनै पनि एयरलाइन्सले माग पूरा गर्न नसक्दा कोरियन एयरलाइन्सबाट जानु पर्ने भएको हो । कोभिड–१९ का कारण १८ फागुन ०७६ का लागि तय भएको उडान रद्द भएको र त्यसपछि कोरिया जान नसकेको निर्देशक रावतले बताए ।
प्रतिबद्ध श्रमिकलाई लैजान सुरु गरेसँगै कोरिया जाने पर्खाइमा बसेका नयाँ श्रमिकमा पनि उत्साह थपिएको देखिएको छ । पुराना लैजान सुरु गरेसँगै नयाँको पनि पालो आउने आसा बढेको खोटाङका भुपेन्द्र राईले बताएका छन् । लामो समयदेखि कोरिया बन्द हुँदा निरास बनेको भन्दै अब आसा जागेको उनले बताए ।
