काठमाडौं– श्रम रोजगार तथा सामाजिक सुरक्षा मन्त्री कृष्णकुमार श्रेष्ठ (किशन) ले आबुधाबी डाइलगमा श्रमिकको पारिश्रमिकमा भएको विभेद् र सामाजिक सुरक्षाको विषय उठाउने बताएका छन् । शुक्रबार मन्त्रालयमा वैदेशिक रोजगार पत्रकार समाजसँगको भेटघाटमा मन्त्री श्रेष्ठले यस्तो बताएका हुन् ।
नेपाल र अन्य देशबाट जाने श्रमिकका बीचको पारिश्रमिकमा निकै भिन्नता रहेको भन्दै यस विषयलाई नेपाली टोलीले जोडदारका साथ उठाउने उनले बताए । एउटै प्रकारको काम अन्य देशका श्रमिकले गर्दा पारिश्रमिक बढी र नेपालीले कम पारिश्रमिक पाउने गरेको भन्दै यस्तो विभेद्को अन्त्यका लागि सशक्त रूपमा नेपालले आवाज उठाउने मन्त्री श्रेष्ठले बताएका छन् । नेपाली श्रमिकले धेरैभन्दा धेरै पाइदा दिन सक्ने विषयमा आपूmहरूले उठाउने उनले बताए । यसका साथै सामाजिक सुरक्षाका विषयमा पनि छलफल गर्ने एजेन्डा तयार पारिरहेको मन्त्री श्रेष्ठको भनाइ थियो ।
लामो समय विदेशमा काम गरेर फर्किएपछि पनि सामाजिक सुरक्षाअन्तर्गत नेपाली श्रमिकले फाइदा लिने विषयमा पनि कुरा उठाउने नेपालको तयारी रहेको छ । रोजगारदाता मुलुकका श्रमिकले काम गर्दा सामाजिक सुरक्षा कोषमा आवद्ध गरिने भएकाले ती देशहरूलाई नेपाली श्रमिकलाई पनि त्यो कार्यक्रम समेट्नका लागि आबुधाबी डाइलगमा नेपालले सशक्त आवाज उठाउने मन्त्री श्रेष्ठले बताएका छन् । जसबाट लामो समय काम गरेर स्वदेश फर्किएका नेपाली श्रमिकले फाइदा लिन सक्ने भएकाले यो कुरा महत्वका साथ उठाउने मन्त्री श्रेष्ठले बताए । काम गर्ने उमेर विदेशमा बिताएर स्वदेश फर्किएका श्रमिकलाई समस्या हुने गरेको भन्दै यस्तो समस्या समाधानका लागि सामाजि सुरक्षाको एजेन्डा उठाउन लागिएको मन्त्री श्रेष्ठले बताएका छन् । २५ अक्टोबरदेखि हुने आबुधाबी डाइलगमा श्रमिक पठाउने तथा रोजगारी दिने १६ देशका श्रम मन्त्रीहरूले भाग लिँदै छन् ।
दक्ष श्रमिक पठाउनुपर्छ
मन्त्री श्रेष्ठले नेपालबाट अदक्ष श्रमिक धेरै विदेश गएको भन्दै उनीहरूलाई दक्ष बनाएर पठाउनेतर्फ आफू लागिपर्ने बताएका छन् । ‘मन्त्री हुनका लागि मात्रैभन्दा पनि काम गरेर देखाउनका लागि आएको हुँ, सोही अनुसार देखिने गरी काम गर्छु,’ मन्त्री श्रेष्ठले भने । उनका अनुसार अहिले नेपालबाट ९७ प्रतिशतभन्दा बढी अदक्ष श्रमिक वैदेशिक रोजगारीमा जाने गरेका छन् । सिटिइभिटिईसँगको सहकार्यमा सीप सिकाएर नेपाली श्रमिक पठाउने विषयमा पनि आफ्नो ध्यान केन्द्रित हुने उनले बताएका छन् । ‘संख्यात्मकभन्दा पनि गुणात्मक श्रमिक पठाउनु पर्छ, जसबाट रेमिट्यान्ससमेत बढ्ने छ,’ मन्त्री श्रेष्ठले भने ।
आफूले रोजगारदाता मुलुकसँग कुरा गर्दा नेपालमा चिकित्सक, नर्स, इन्जिनियरजस्ता जनशक्ति पनि लैजानका लागि आग्रह गरेको बताएका छन् । निमुखा श्रमजीवी जनताको सुरक्षा आफ्नो पहिलो प्राथमिकतामा रहेको भन्दै मन्त्री श्रेष्ठले श्रमिकहरू ठगिन नहुने बताए ।
श्रमिक र रोजगारदाताबीचको खाडल अन्त्य आवश्यक
मन्त्री श्रेष्ठले श्रमिक र रोजगारदाताबीच ठूलो खाडल रहेको भन्दै यसलाई घटाउनेतर्फ लाग्नु पर्ने बताएका छन् । श्रमिकलाई देख्दा रोजगारदाता भाग्ने गरेको भन्दै यस्तो अवस्थाको अन्त्य हुनु पर्ने उनले बताए । साथै श्रमिकले पनि रोजगारदातालाई अभिभावक ठान्न नसकेको अवस्थामा रहेको भन्दै यसमा सुधार गर्नु पर्ने मन्त्री श्रेष्ठको भनाइ छ । उनका अनुसार रोजगारदाताले श्रमिकलाई परिवारको सदस्यजस्तै व्यवहार गर्नु पर्ने र श्रमको सम्मान गर्नु पर्नु पर्छ ।
तिहारपछि गति लिने गरी काम गर्ने र श्रमिक तथा रोजगारदाताको हक हितका लागि तीव्र गतिमा काम हुने मन्त्री श्रेष्ठले बताएका छन् । यसैबीच, श्रमिक पठाउन देशहरूसँग पनि छुट्टै छलफल गर्ने गरी लागिरहेको मन्त्री श्रेष्ठको भनाइ थियो ।
-1745656903.jpeg)