धरान– जनवादी गायिका हर्षु राईको राष्ट्रिय भावमा समर्पित गीत ‘मेरो देश नेपाल’को सार्वजनिक गरिएको छ । धरानको बराह कम्प्लेक्स हलमा हालै आयोजित कार्यक्रममा वरिष्ठ गायक दीप श्रेष्ठ र धरान उपमहानगरपालिकाकी उपप्रमुख मञ्जु भण्डारीले गीतको भिडियो सार्वजनिक गरेका हुन् । गोपाल दाहालको शब्द रचना, विनोद प्रियदर्शी राईको संगीत र किरण कँडेलको संगीत संयोजन रहेको गीतको भिडियो नगेन्द्र लोहोरुङ राईको निर्देशन, छायाँकन र सम्पादनमा तयार भएको हो ।
भिडियो विमोचन कार्यक्रममा बोल्दै वरिष्ठ गायक दीप श्रेष्ठले देशभक्ति भावको गीत लेख्ने र गाउने क्रम कम भएका बेला ‘मेरो देश नेपाल’ गीत सार्वजनिक गर्न पाउँदा खुसी लागेको बताए । कोरोना संक्रमणपछि पहिलोपटक सार्वजनिक कार्यक्रममा देखा परेका उनले गीत तथा भिडियोको टिमलाई बधाई समेत दिए । धरान उपमहानगरकी उपप्रमुख मञ्जु भण्डारीले आफूलाई गीतका शब्द, संगीत र गायनले छोएको बताउँदै अझै यस्तै गीतमा निरन्तरता दिन आग्रह गर्दै सबैलाई भिडियो हेरेर शेयर गरेर सहयोग गर्न अनुरोध गरिन् ।
कार्यक्रममा गायिका हर्षुले ‘मेरो देश नेपाल’ र आङ्खनो पुरानो गीत ‘चेलीको सिन्दुर पुछियो’ बोलका गीत सुनाएकी थिइन् । ०४३/४४ सालबाटै जनवादी गीत गाउन सुरु गरेकी गायिका हर्षुले पञ्चायतकालमा हिमायती समूहसँगै मिलेर गीतमार्फत खबरदारी गर्ने गर्थिन । ०४७ सालताका पूर्वका गाउँ–गाउँमा ‘चेलीको सिउँदो पुछियो....’ जस्तो जनवादी गीत गाउँदै हिँड्ने हर्षुले हिमायती समूहबाट ‘आकाशमा उड्ने चरी’, ‘झरझर झरना’लगायतका गीतहरू पनि गाएकी छन् ।
पछिल्लो समय आधुनिक गीतमा सक्रिय उनी पूर्वका धेरै ठाउँसँगै हङकङसम्म पुगेर आङ्खनो कला प्रस्तुत गरिसकेकी छन् । ०५१ सालमा उनले आङ्खनो पहिलो एकल एल्बम ‘स्मृति’ र ०६२ मा दोस्रो एल्बम ‘प्रिति’ बजारमा ल्याएकी थिइन् । लामो समय धरान उप–महानगरपालिकाको जागिरे जीवनबाट केही वर्षअघि मात्र अवकास लिएकी गायिका हर्षुले लामो अन्तरालमा नयाँ गीत ‘मेरो देश नेपाल’ राष्ट्रिय भावनामा समर्पित रहेर म्युजिक भिडियोसहित ल्याएकी हुन् ।
