काठमाडौं– काठमाडौं उपत्यकामा मास्क नलगाउने यात्रुलाई सार्वजनिक सवारी साधन प्रयोग गर्न निषेध गरिने भएको छ । स्थानीय प्रशासनले बिहीबार आदेश जारी गर्दै मास्क नलगाएका यात्रुलाई सवारी साधनको प्रयोगमा निषेध गर्न आदेश जारी गरेको छ । कोरोना भाइरसको संक्रमणको जोखिम कायम रहेको भन्दै स्थानीय प्रशासनले सार्वजनिक सवारीसाधनको प्रयोग गर्ने यात्रुका लागि मास्कको प्रयोग अनिवार्य गर्न निर्णय गरेको हो ।
बिहीबार काठमाडौं उपत्यकाको तीन जिल्ला काठमाडौं, भक्तपुर र ललितपुरका प्रमुख जिल्ला अधिकारीहरूको संयुक्त बैठकले काठमाडौं उपत्यकामा मास्क नलगाएका यात्रुलाई सार्वजनिक सवारीमा चढ्न रोक लगाउने निर्णय गरेको छ । स्थानीय प्रशासनले सार्वजनिक सवारी साधनको ढोकामा अनिवार्य सेनिटाइजरको व्यवस्था गर्न यातायात व्यवसायीहरूलाई निर्देशन दिएको छ । कोभिड–१९ संक्रमणको जोखिमका कारण प्रशासनले सार्वजनिक सवारी अनिवार्य रूपमा दैनिक सेनिटाइज गर्नुपर्ने निर्णय गरेको हो ।
त्यस्तै, स्थानीय प्रशासनले चाडपर्वको बेला सवारी साधनको छतमा यात्रा गर्न पूर्णतः प्रतिबन्ध लगाएको छ । यसअघि चाडपर्वको बेला यात्रुको संख्या धेरै हुने गरेकाले केही सवारीसाधनले छतमा समेत यात्रु राख्ने गरेका थिए । तर, यसरी क्षमताभन्दा बढी यात्रु राख्दा दूरी कायम हुन नसक्ने भएकाले त्यसबाट कोरोना संक्रमण फैलनसक्ने भन्दै प्रशासनले यसपटक क्षमताभन्दा बढी यात्रु राख्ने सवारीसाधनलाई कारबाही गर्ने तयारी गरेको छ । त्यसका लागि प्रहरीले विभिन्न स्थानमा यात्रु सहायता कक्ष सञ्चालनमा ल्याउनुका साथै सवारीसाधनको अवस्थाको अनुगमनको व्यवस्था गरेको छ । त्यस्तै, सवारीसाधनमा स्वास्थ्य सम्बन्धी मापदण्ड पालना भए÷नभएको विषयमा अनुगमन गर्नका लागि सादा पोशाकमा समेत प्रहरी परिचालन गरिएको प्रशासनले जनाएको छ ।
आदेशमा होटल, रेष्टुरेण्ट र सिनेमा हलमा सामाजिक दुरी कामय गर्नुपर्ने आदेश जारी गरिएको छ । कोभिड–१९ संक्रमणको जोखिम कायमै रहेको भन्दै प्रशासनले भिडभाड र जुलुस तथा भोज गर्न रोक लगाउने पुरानो निर्णयलाई निरन्तरता दिएको छ । तर, प्रशासनको उक्त आदेशको भने विभिन्न राजनीतिक दल तथा सामाजिक संघसंसस्थाहरूले उल्लघंन गर्दै आएका छन् । कोरोना महामारीकै बीचमा सत्तारुढ दल नेपाली कांग्रेस, नेकपा माओवादी केन्द्र र प्रमुख प्रतिपक्षी दल नेकपा एमालेलगायतका दल तथा अन्य संघसंस्थाले समेत धेरैजनाको उपस्थितिमा विभिन्न कार्यक्रम गरिरहेका छन् ।
शुक्रबारदेखि ललितपुरमा करिब ६ हजारको उपस्थितिमा एमालेको विधान अधिवेशन सुरु हुँदैछ भने, कांग्रेसको महाधिवेशनका क्रममा विभिन्न जुलुस तथा सभालगायतक कार्यक्रम भइरहेका छन् । माओवादी केन्द्रको भ्रातृसंगठन अनेरास्ववियु क्रान्तिकारीको राष्ट्रिय सम्मेलन काठमाडौंमा बिहीबारदेखि सुरु भएको छ । स्थानीय प्रशासनको राजनीतिक दल तथा विभिन्न संघसंस्थाले उल्लंघन गर्दा पनि प्रशासनले कारबाहीको दायरामा ल्याउन नसकेको भन्दै आलोचनासमेत भइरहेको छ । आदेशमा बैठक, गोष्ठी, सेमिनारहरू भर्चुअल माध्यमबाट गर्नुपर्ने र गर्नैपर्ने भएमा स्वास्थ्य मापदण्ड अनिवार्यरूपमा पालना गराउनुपर्ने भनिएको छ । होटल पार्टी प्यालेसमा बढीभन्दा बढी मानिसलाई सहभागी गराउनुपरे एन्टीजेन, पिसिआर परीक्षणको व्यवस्था मिलाउन भनिएको छ ।
स्थानीय प्रशासनको आदेशमा दशैं, तिहार र छठ पर्व मनाउँदा स्वास्थ्य मापदण्ड पूर्ण पालना गरेर न्युनतम सहभागितामा चाडपर्व मनाउन स्थानीय प्रशासनले आग्रह गरेको छ । घरभित्र परिवारको सदस्यहरू मात्रै सहभागी भएर पर्व मनाउन आग्रह गर्दै जिल्ला प्रशासनले भनेको छ, ‘यात्रा गर्नुअघि अधिकारिक टिकट काउण्टरबाट टिकट काटेर मात्र यात्रा गर्नुहोला ।’
निषेधाज्ञालाई निरन्तरता दिँदै स्थानीय ढुवानी बिहान ९ बजेदेखि ११ बजेसम्म र साँझ ४ बजेदेखि ७ बजेसम्म गर्न नपाउने निर्णय गरिएको छ । सार्वजनिक र निजी निर्माण कार्यको लागि आवश्यक निर्माण सामग्री बेलुका ९ बजेबाट बिहान ५ बजेसम्म मात्र ढुवानी गर्न पाइने निर्णय गरिएको काठमाडौंका प्रमुख जिल्ला अधिकारी गोविन्दप्रसाद रिजालले जानकारी दिए । त्यस्तै, वित्तिय संस्थालाई अनलाइनबाट सेवा प्रवाह गर्ने व्यवस्था मिलाउन समेत प्रशासनले आदेश दिएको छ । उद्योग कलकारखाना, होटल, रेष्टुरेन्ट, सिनेमा, हल, व्यायमस्थल लगायतलाई कोभिड मापदण्ड पालना गर्दै संचालन गर्न समेत आदेश दिइएको छ ।
