काठमाडौं– हिन्दू नेपालीहरूको ठूलो चाड दसैँ तथा तिहारको अवसरमा संघीय राजधानी काठमाडौंबाट धेरैको संख्यामा सर्वसाधारण जिल्लाजिल्लामा जाने गर्दछन् । धेरैको संख्यामा काठमाडौं उपत्यकाबाट यात्रु बाहिरिँदा त्यसको व्यवस्थापन चुनौतिपूर्ण बन्ने गरेको छ । यात्रु तथा सर्वसाधारणलाई अनधिकृत व्यक्तिले टिकटको नाममा ठगी गर्नेदेखि हुन सक्ने अन्य विभिन्न अवाञ्छित गतिविधिलाई ध्यानमा राख्दै ट्राफिक प्रहरीले सुरु गरेको यात्रु सहायता कक्षबाट सेवा लिने बढेका छन् ।
महानगरीय ट्राफिक प्रहरी महाशाखाले चाडबाडलाई लक्षित गरी ‘यात्रु सहायता कक्ष’ सञ्चालनमा ल्याएको थियो । गोंगबुस्थित नयाँ बसपार्कमा स्थापना भएको यात्रु सहायता कक्षको बिहीबार उद्घाटन गरी विधिवत रूपमा सेवा दिन शुरु गरेको थियो । यसअवधिमा कक्षबाट धेरैले सेवा दिएको ट्राफिक प्रहरीले जनाएको छ । टिकट सम्बन्धी कुनै पनि समस्या पर्दा समाधानका लागि विभिन्न स्थानमा यात्रु सहायता कक्ष स्थापना गर्ने योजना स्वरूप नयाँ बसपार्कमा कक्ष स्थापना गरिएको जनाइएको छ ।
महाशाखाका प्रमुख प्रहरी वरिष्ठ उपरीक्षक (एसएसपी) जनक भट्टराईका अनुसार यात्रुका गुनासोहरू सुन्ने र सोही स्थानबाट सहयोग गर्ने उद्देश्यका साथ सुरु गरिएको कक्षबाट हालसम्म तीन हजारभन्दा धेरै यात्रुले सेवा लिइसकेका छन् । उनले दसैँ मान्न उपत्यका छाडी आ–आफ्नो थातथलो फर्किने यात्रुहरूलाई बढी भाडा लिने, यात्रु ठगी गर्ने, टिकटलगायत अन्य यातायात सम्बन्धी समस्याहरूलाई सहजता दिलाउन कक्षले काम गरिरहेको छ ।
कक्षले यात्रु तथा आफ्नो मालसामानको सुरक्षा सम्बन्धी सुसूचित गराउने, जनचेतनामूलक पर्चापम्प्लेट वितरण गरिरहेको छ । त्यस्तै कोरोना संक्रमणबाट बच्न मास्कको प्रयोग गरी स्वास्थ्य मापदण्डको अनिवार्य पालना गर्नसमेत कक्षले सचेत गराइरहेको एसएसपी भट्टराईले जानकारी दिए । यात्रु सहायता कक्ष भएका स्थानहरूमा निशुल्क मास्क वितरणसमेत भइरहेको छ । महाशाखाले उपत्यकामा टिकट काउन्टर रहेका र यात्रुको बढी भिडभाड हुने १४ स्थानमा कक्ष स्थापना गर्ने तयारी गरेको छ । बसपार्क, गौशाला, बल्खु र कोटेश्वरमा कक्ष सुरु भइसकेको छ । अब सातदोबाटो, कलंकी, नागढुंगा, स्वयम्भू, माछापोखरी, चाबहिल, जगाती, सुन्धारा, रत्नपार्क र फर्पिङमा कक्ष राखी सञ्चालनमा ल्याइने जानकारी महाशाखाले दिएको छ ।
दसैँमा घर जान लामो तथा मझौला दूरीका अग्रिम टिकट बुकिङ खुला हुने हुँदा त्यस्ता स्थानहरूमा यात्रुको भिडभाड र हुनसक्ने समस्यालाई समाधान गर्न कक्षहरू सक्रिय भई काम गर्ने छन् । कक्षले फर्जी टिकट बेच्ने र डबल टिकट काट्ने, टिकट कालोबजारी गर्ने, यात्रुलाई सास्ती दिने अनाधिकृत व्यक्तिहरू माथि निगरानी गर्ने, पकेटमारका गतिविधिलगातय निगरानी गर्न छुट्टै सादा पोसाकमा समेत ट्राफिक प्रहरीको टोली परिचालन गरिने महाशाखाका प्रवक्ता तथा प्रहरी उपरीक्षक संजीव शर्मा दासले बताए । चाडबाडमा उपत्यकाबाट बाहिर जाने यात्रुको सहजताका लागि उपत्यकाको टिकट काउन्टर रहेका विभिन्न स्थानमा प्रत्येक वर्ष दसैँदेखि छठसम्म यस्ता यात्रु सहायता कक्ष स्थापना गर्दै आएको प्रबक्ता दासले जानकारी दिए । यात्रु सहायता कक्षमा ट्राफिक प्रहरी, नेपाल प्रहरी, सामुदायिक सेवा केन्द्र तथा यातायात व्यवसायी रहेका छन् ।
चाडबाडको समयमा मादक पदार्थ सेवन गरी सवारी चलाउने, तीव्रगतिमा सवारी चलाउने, क्षमताभन्दा बढी यात्रु राख्ने, लेन अनुशासनको पालना नगर्दा दुर्घटनाको जोखिमसमेत बढ्न सक्ने हुनाले त्यसलाई न्यूनीकरण गर्नसमेत सहायता कक्षले प्रभावकारी भूमिका खेल्ने महाशाखाले जनाएको छ ।
