काठमाडौं– भारतीय र नेपाली चलचित्र क्षेत्रमा स्थापित कलाकारहरूले आफ्ना सन्तानलाई पनि फिल्म क्षेत्रमै स्थापित गराउने प्रयास गरिरहेका छन् । त्यसैले फिल्म क्षेत्रमा नेपोटिजम अर्थात नातावादको बहस पनि चल्ने गरेको छ । बलिवुड नायिका कंगना रनावतदेखि नेपालमा नायिका नम्रता सापकोटासम्मले फिल्म क्षेत्रमा नातावादको बहस बेलाबेला चर्काउने गरेका छन् ।
नेपाली चलचित्र क्षेत्रमा नायक भुवन केसी, नायिका करिश्मा मानन्धर, झरना थापालगायतले आफ्ना सन्तानलाई पर्दामा उतारिसकेका छन् । यस्तैमा अर्का कलाकार युवराज लामाले पनि आफ्नो छोरा सिद्धार्थलाई पर्दामा उतार्ने तयारी गरेका छन् । एक समय अभिनयसँगै फिल्म निर्माण र निर्देशनमा निकै सक्रिय रहेका उनलाई दर्शकले फिल्म ‘देउता’ को ‘निमा’ भनेर चिन्ने गर्दछन् । ‘मन मन्दिर, कन्यादान, देश परदेश, प्रतिज्ञा, धर्मपुत्र, देवदूत, गोरेटो’ लगायतका फिल्मको निर्माण तथा निर्देशन गरिसकेका उनी पछिल्लो समय राजनीति र होटल व्यवसायमा व्यस्त छन् ।
सन् २००३ मा रिलिज भएको ‘धर्मात्मा’ पछि फिल्म निर्माण र निर्देशनबाट टाढा भएका उनले बीचमा केही फिल्ममा अभिनय भने गरे । अब उनी करीब डेढ दर्शकपछि फिल्म निर्माण र निर्देशनमा कमब्याक गर्ने तयारीमा छन् । अहिले फिल्मको स्क्रिप्टमा काम भइरहेको र आउँदो चैतपछि सुटिङ सुरु हुने उनले बताए । यसलाई उनले आफ्नो फिल्मी करिअरको दोस्रो इनिङ भनेका छन् ।
यो फिल्मबाट उनले आफ्नो ‘लिगेसी’ धान्न छोरालाई नायकको रूपमा डेब्यु गराउने तयारी गरेका छन् । उनका कान्छा छोरा सिद्धार्थ लामाले फिल्ममा अभिनय गर्न लागेका हुन् । नेपाली दर्शकका लागि उनी नयाँ अनुहार भए पनि भारतको मलायलम इन्डस्ट्रीमा लोकप्रिय छन् । उनले मलायलम इन्डस्ट्रीका सुपरस्टार मोहनलालसँग फिल्म ‘योद्धा’ मा एकसाथ स्क्रिन शेयर गरिसकेका छन् ।
मलायलमको अर्को फिल्म ‘इदावाप्पथ्य’ मा पनि उनले मुख्य भूमिकामा अभिनय गरेका थिए । सन् २०१६ मा रिलिज भएको यो फिल्ममा अभिनेत्री मनिषा कोइरालाको पनि अभिनय थियो । मलायलममा सिद्धार्थलाई ‘उनिकुटा’ नामले चिन्ने गरिन्छ । पिताले निर्माण तथा निर्देशन गरेका ‘देउता’लगायतका केही नेपाली फिल्ममा पनि उनले बाल कलाकारको रूपमा अभिनय गरेका छन् ।
आफ्नो छोराको डेब्युबारे लामाले सिद्धार्थले आफ्नो क्षमता र प्रतिभाले मलालयम इन्डस्ट्रीमा पहिचान बनाइसकेको भन्दै त्यो नेपाली दर्शकबीचमा पनि जानुपर्छ भन्ने सोचले डेब्यु गराउन लागेको प्रतिक्रिया दिएका छन् । उसको क्षमता नेपाली दर्शकले पनि चिन्नु पर्ने लामाको तर्क छ ।
