काठमाडौं– त्रिभुवन विश्वविद्यायलअन्तर्गतको मानविकी तथा समाजशास्त्र विभागका डिन प्राडा.कुसुम शाक्यले विकास निर्माणका कार्य अगाडि बढाउँदा पर्यावरणलाई समेत ध्यान दिनुपर्ने बताएकी छन् । बुधबार पत्रकारिता केन्द्रीय विभागमा आयोजित वृक्षरोपण कार्यक्रममा उनले यस्तो बताएकी हुन् । उनले पर्यावरणको संरक्षण विनाको विकासले दीर्घकालीन रूपमा नकारात्मक असर गर्ने भन्दै त्यसतर्फ सबै सचेत बन्नुपर्ने धारणा राखिन् ।
विभागले नयाँ भवन निर्माण गर्दै गर्दा वातावरणलाई पनि ख्याल गरेर वृक्षरोपण कार्यक्रम गरेको जानकारी दिँदै उनले यसले समाजमा सकारँत्मक सन्देश दिएको दाबी गरिन् । विभागको निर्माणाधीन भवनको वरवरको खाली ठाउँमा विभिन्न प्रजातिका करिब २ सय विरुवा रोपिएको पत्रकारिता विभागका प्राध्यापक देवराज अर्यालले जानकारी दिए । पत्रकारिता विभागको भवन बन्दै गरेको स्थानमा वातावरण सन्तुलनका लागि वृक्षरोपण गरिएको उनले बताए ।
कार्यक्रममा वन विज्ञान अध्ययन संस्थानका डिन डा.वीरबहादुर खनालले वातावरण संरक्षणका लागि भवन निर्माण सँगै विरुवासमेत रोप्नु पर्ने बताएका छन् । प्राणी जगतलाई सास फेर्नका लागि नभई नहुने अक्सिजनका लागि विरुवा अपरिहार्य भएको भन्दै विभागले गरेको यो कार्य निकै प्रशंसनीय रहेको उनले बताए । अहिले रोपिएका विरुवाले दीर्घकालीन रूपमा पत्रकारिता विभाग वरपरको वातावरणलाई हरियाली र मनोरम राख्नका लागि समेत महत्वपूर्ण भूमिका खेल्ने उनको भनाइ छ ।
कार्यक्रममा प्रत्रकारिता विभागका प्रमुख चिरन्जिवी खनाल, रत्नराज्य लक्ष्मी क्याम्पस पत्रकारिता विभागका प्रमुख श्रीराम खनाललगायत शिक्षक विद्यार्थीको सहभागिता रहेको थियो ।
