एकै परिवारका ६ जनाको हत्या

प्रवास

Home
प्रवास
एकै परिवारका ६ जनाको हत्या

एकै परिवारका ६ जनाको हत्या

प्रभाव संवाददाता बुधबार, भदौ २३, २०७८

shankhuwasava

काठमाडौं– संखुवासभाको एकै परिवारको ६ जनाको हत्या भएको छ । जिल्ला प्रहरी कार्यालय, चैनपुरका अनुसार संखुवासभाको मादी नगरपालिका–१ का ५७ वर्षीय तेजबहादुर कार्की, ८४ वर्षीया आमा पार्वता कार्की, ५८ वर्षीया श्रीमती मनमाया कार्की, २५ वर्षीया बुहारी रञ्जना कार्की, १० वर्षीय नाति दीपक कार्की र ५ वर्षीया नातिनी गोमा कार्कीको विभत्स हत्या भएको हो । प्रहरीका अनुसार उनीहरूको धारिलो हतियार प्रयोग गरी हत्या भएको छ । उनीहरूको शव एकै ठाउँमा नभएर छुट्टाछुट्टै भेटिएको प्रत्यक्षदशीले बताए । उनीहरूमध्ये पार्वता कार्कीबाहेक अरू सबैको शव घर बाहिर भेटिएको छ । सासू–बुहारीको शव घरभन्दा केही मिनेट पर खोलामा फेला परेको, तेजबहादुरलाई भने हतियारले टाउको र पेटमा हानेर मारेको देखिएको प्रत्यक्षदर्शीले बताए । उनीहरूको शव कसैको खरबारीमा, कसैको मकैबारीमा खोलातिर भेटिएको छ । मृतकहरूले खेतीका लागि जान लागेकोजस्तो कपडा लगाएका। चप्पल पनि लगाएका र उनीहरूलाई लखेटेर, खेदेर मारेकोजस्तो देखिने स्थानीयले बताएका छन् । तर, घटनास्थलबाट ९० वर्षीय वृद्ध बौद्धमान कार्की भने जिवित नै भेटिएको प्रहरीले जनाएको छ । श्रीमतीसहित परिवारका सबै मारिँदा पनि उनले थाहा पाएका थिएनन् । स्थानीयका अनुसार बौद्धमान बुढा भइसकेको उनी आँखा राम्ररी सुन्न नसक्ने र सामान्य आवाजसमेत सुन्न सक्दैनन् । बिहान स्थानीयले घटनाबारे थाहा पाएर उनलाई उठाउन गएपछि मात्रै घटनाबारे उनले परिवारका सबै मारिएको थाहा पाएका थिए । हत्या गरिएको कार्की परिवारको आर्थिक अवस्था सामान्य छ । दुई जना छोरा नरेश र रमेश कार्की डेढ वर्षदेखि वैदेशिक रोजगारमा गएका छन् । नरेश मलेसियामा छन् भने रमेश दुबईमा छन् । उनीहरू ढुंगामाटोले बनेको एक तले घरमा बस्थे । संखुवासभाको इलाका प्रहरी कार्यालय चैनपुर घटनास्थलबाट ५५ किलोमिटर टाढा परेकाले मंगलबार अबेर मात्र प्रहरी निरीक्षकसहितको टोली घटनास्थल पुगेको छ । प्रहरीका अनुसार संघीय प्रहरी कार्यालयबाट प्रहरी उपरीक्षकको कमान्डमा तालिमप्राप्त कुकुरसहितको टोली पनि घटनास्थल पुग्दै छ । प्रहरीको टोलीले घटनास्थललाई सुरक्षित राखेर अनुसन्धान अघि बढाएको छ । तर कसले किन हत्या गरेको भन्ने खुलेको छैन । उनीहरूको गाउँघरमा झै–झगडा नभएको स्थानीयले बताएका छन् । उनीहरूको हत्या कुन बेला भएको हो भन्ने अहिलेसम्म खुलिनसकेको प्रहरीले जनाएको छ । मंगलबार नै शवहरूको पोस्टमार्टमका लागि धरान पठाइएको प्रहरीले जनाएको छ । हत्या प्रकरणको अनुसन्धानमा खटिएको प्रहरीले आफूहरू ‘सकारात्मक दिशामा उन्मुख भएको’ जानकारी दिएको छ । संघीय प्रहरी कार्यालय धरानबाट खटिएको प्रहरी उपरीक्षक भीम दाहाल नेतृत्वको टोलीले अनुसन्धान प्रगतितिर रहेको जनाएको हो । प्रहरीले अनुसन्धान सकरात्मक तरिकाले अघि बढेको बताए पनि यो समाचार तयार पार्दासम्म प्रहरीले कसैलाई पनि नियन्त्रणमा लिन सकेको छैन ।

प्रकाशित मिति: बुधबार, भदौ २३, २०७८ ०२:४०

प्रतिक्रिया दिनुहोस्