काठमाडौं– वैदेशिक रोजगारीका लागि इजरायलको दीर्घकालीन स्याहार केन्द्रमा रोजगारीमा जान आवेदन दिएकामध्ये २ हजार ७ सय जनाको आवेदन अस्वीकृत भएको छ । वैदेशिक रोजगार विभागका निर्देशक तथा इजरायल शाखाका प्रमुख डम्बरबहादुर सुनुवारका अनुसार मंगलबारसम्म रुजु भएका फारममा तोकिएको मापदण्ड तथा योग्यता नपुगेका २ हजार ६ सय ९६ जनाको आवेदन अस्वीकृत भएको हो ।
निर्देशक सुनुवारका अनुसार ९ हजार ६ सय ९९ जनाले आवेदन दिएकामा अधिकांशको आवेदन रुजु गर्ने काम सम्पन्न भएको छ । यसबाट २८ भदौमा हुने भाषा परीक्षामा करिब सात हजार जना सहभागी हुने देखिएको छ । अनलाइन प्रणालीबाट आएका आवेदनहरूको विभागले रुजु गर्ने काम अहिले अन्तिम चरणमा पु¥याएको निर्देशक सुनुवारले बताएका छन् । उनका अनुसार मंगलबारसम्मको तथ्यांक हेर्दा २ हजार ६ सय ९६ जनाको आवेदन अस्वीकृत भएको छ । आवेदन अस्वीकृत भएका व्यक्तिहरूलाई आवेदन दिँदाका समयको मोबाइल नम्बर र इमेलमा यस विषयमा जानकारी गराइसकिएको प्रमुख सुनुवारले बताए । आवेदन अस्वीकृत हुनेहरूमा सूचनामा भनिएको योग्यता नपुगेकाहरू रहेको विभागले जनाएको छ ।
निर्देशक सुनुवारका अनुसार तालिन नलिएका केही व्यक्तिको पनि आवेदन परेको छ । त्यस्तै सूचनामा भनिएको सिएमए/ अनमीको योग्यता पूरा नगरेर आएका आवेदनहरू अस्वीकृत भएको उनले बताएका छन् । यो सबै अनलाइन प्रणाली (सिष्टम) बाट भएको उनले बताए । भाषा पास गरिपछि रोजगारीका लागि इजरायल जाने सतप्रतिशत ग्यारेन्टीसमेत नहुने विभागले जनाएको छ । भाषा पास गरेकामध्ये चार सय जनाले भने इजरायल जान नपाउने विभागले यसअघि नै बताइसकेको छ ।
२८ भदौमा सञ्चालन हुने लिखित परीक्षाबाट करिब एक हजार ६ सय जना उत्तीर्ण हुने बताइएको छ । उनीहरू मौखिक परीक्षामा सहभागी हुने र त्यसबाट एक हजार चार सय जनाको अन्तिम नामावाली सार्वजनिक गरिने प्रमुख सुनुवारले बताएका छन् । त्यसमध्येबाट ७० प्रतिशत महिला र ३० प्रतिशत पुरुष गरी एक हजार जनाले रोजगारीका लागि इजरायल जान पाउने उनले बताए । एक हजार जनाको कोटा निर्धारण गरेर माग भएको आवेदनमा नौ हजार छ सय ९९ जनाको आवेदन परेको थियो । त्यसमध्ये चार हजार दुई सय महिला र पाँच हजार चार सय ९९ जना पुरुष रहेको विभागले जनाएको छ । अंग्रेजी भाषाको परीक्षाको मिति विभागले २८ भदौका लागि तोकेको छ । यसका लागि काठमाडौं उपत्यकाका १६ वटा शैक्षिक संस्थामा परीक्षा केन्द्र तोकिएको प्रमुख सुनुवारले बताएका छन् ।
रोजगारीका लागि इजरायल जानका लागि १ लाख ६५ हजार लागत लाग्ने बताइएको छ, निजी क्षेत्रले श्रमिक पठाउँदा १० हजार रूपैयाँ मात्र लिन पाउने भए पनि सरकारले भने यसभन्दा कैयौँ गुणा बढी लिएको भन्दै सर्वसाधारणले नै गुनासो गरिरहेका छन् । इजरायलको दीर्घकालीन स्याहार केन्द्रमा रोजगारीका लागि जाने श्रमिकले मासिक करिब एक हजार ६ सय अमेरिकी डलर आम्दानी गर्न सक्ने बताइएको छ । चार वर्षसम्म करार अवधि थप गर्न सक्ने विकल्पसहित सुरुमा एक वर्षको करार सम्झौता गरिने विभागले जनाएको छ । तर, पाँचौ वर्षमा भने अनिवार्य स्वदेश फर्कनै पर्ने अन्यथा गैरकानुनी ठहर हुने सम्झौतामा उल्लेख छ ।
-1745656903.jpeg)