काठमाडौं– जिल्ला प्रशासन कार्यालय काठमाडौंले बिहीबारबाट उपत्यकाका हलहरू खोल्न दिने निर्णय गरे पनि हलहरू सञ्चालनमा आउन सकेनन् । प्रशासनले हल खोल्न दिने निर्णय गरे पनि प्रदर्शनका लागि कुनै पनि चलचित्र तयार नभएकाले हल नखुलेका हुन् । यस्तै, बलिउड तथा हलिउड चलचित्र पनि वितरकले खरिद नगरेकाले तत्काल के चलाउने भन्ने अन्योल रहेकाले अझैं केही दिल हलहरू नखुल्नेअनुमान गरिएको छ । काठमाडौंका हलहरू बिहीबार नखुलेको र केहिलेदेखि खुल्छ भन्ने कुराको कुनै टुंगो नभएको हल सञ्चालकहरूले बताएका छन् ।
काठमाडौंको नयाँ बानेश्वरमा रहेको वान सिनेमाजका म्यानेजर उमेश गिरीले वितरकहरूबाट चलचित्रको विषयमा कुनै पनि जानकारी नआएकाले हल बिहीबारबाट नखुलेको बताए । उनले भने, ‘हामीलाई वितरकहरूले नयाँ चलचित्रको विषयमा कुनै पनि जानकारी गराउनु भएको छैन । यसैले, चलचित्र नै नभई हल खोलेर पनि अर्थ भएन ।’ उनले, वितरकहरूबाट चलचित्रको बिषयमा जानकारी आएसँगै हल सञ्चालनमा आउने समेत प्रतिक्रिया दिए । वान सिनेमाजमा २ वटा पर्दा रहेका छन् ।
यस्तै, काठमाडौंको बालाजुमा रहेको अष्टनारायण हलका सञ्चालक सोहित मानन्धरले चलचित्र चलाउन आफूहरू तयार भए पनि चलचित्र नै नभएकाले हल नखुलेको बताए । उनले भने, ‘हामी चलचित्र चलाउन पूर्ण रूपमा तयार छौँ । तर, हिजो भएको निर्णय आज नै कार्यान्वयन गर्न सकिने अवस्था छैन । नयाँ चलचित्र नआएसम्म हल खुल्ने संभावना पनि छैन । सायद, अर्को साताबाट हल खुल्छ होला ।’
अष्टनारायणमा ४ वटा पर्दा भएपनि सुरुवाती दिनमा १ वा २ वटा पर्दाबाट चलचित्र रिलिज सुरु गरिने सोहितले जानकारी दिए । चलचित्र संघका महासचिव अशोक शर्माले कुनै पनि हल नखुलेको बताए । उनले भने, ‘हलहरू सुचारु हुन अझै एक साता लाग्छ होला । किनकी, पहिलो कुरा त चलचित्र नै छैनन् । दोश्रो कुरा धेरै हलहरूमा सरसफाई पनि गर्न‘पर्ने अवस्था छ ।’
कोभिड १९ का कारण नेपालमा कुनै व्यवसाय चौपट भएको छ भने त्यो सिनेमा हल हो । काठमाडौं उपत्यकामा रहेका ४ दर्जन बढी हलहरूमध्ये डेढ दर्जन हल कोभिडका कारण सधैका लागि बन्द भएका छन् । मानिसको भीडभाड रहने क्षेत्र भएकाले संक्रमण फैलिन सक्ने भन्दै गत चैतमा सरकारले सिनेमा हल बन्द गर्ने निर्णय गरेको थियो । त्यसको करिब ९ महिना सिनेमा हल बन्दै रहे । गत माघबाट भने सरकारले स्वास्थ्य सुरक्षाको मापदण्ड अपनाएर ५० प्रतिशत अनुपेन्सीमा हल खोल्न अनुमति दियो । लामो समयपछि खुलेको सिनेमा हलमा व्यवसायीहरूले सुरुमा पुराना फिल्म रिलिज गरे । तर, त्यसले दर्शक तान्न सकेन । पछि केही नयाँ फिल्म रिलिज गरे ।
कोरोनाको भयले नयाँ फिल्म हेर्न पनि दर्शक हलसम्म पुगेनन् । गत चैत अन्तिममा केही आशातित फिल्म रिलिजको तयारीमा थिए । तर, ती फिल्म रिलिज हुन नपाउँदै कोरोनाको दोस्रो महामारीले फेरि सिनेमा हल बन्द भए । यसपटक पनि यस्तै अवस्था आउने हो कि भन्ने डर हल सञ्चालकहरूमा छ । विज्ञहरूले कोरोना महामारीको तेस्रो लहर आउनसक्ने चेतावनी दिइरहेकाले पनि हल सञ्चालकहरू थप चिन्तामा परेका छन् ।
