काठमाडौं– कोरोना भाइरसको दोस्रो लहर फैलिएसँगै गत वैशाखबाट पूर्ण रुरूमा ठप्प रहेको फिल्म हलहरू कहिले खुल्ने हो अझैं निश्चित भइसकेको छैन । दर्शकको भीड धेरै हुने भएकाले सरकारले तत्कालै चलचित्र हल सञ्चालनको अनुमति दिने सम्भावना कम छ । अन्य क्षेत्र विस्तारै खुल्दै गए पनि सरकारले हल सञ्चालनका लागि चाँडै अनुमति नदिने अनुमान गर्न सकिनछ ।
दोस्रो लहर सकिएको छैन, अझैं कोरोनाको तेस्रो लहर आउनसक्ने विज्ञहरूले चेतावनी दिइरहेका छन्, त्यसैले हल सञ्चालनको मिति केही टाढा हुने अनुमान सही हुनसक्छ । कोभिड संकट व्यवस्थापन केन्द्र (सिसिएमसी) ले संक्रमण दर १५ प्रतिशतमा झरेपछि मात्र हललगायतका मनोरञ्जन क्षेत्र खुलाउन अनुमति दिने कार्यविधि नै तयार पारेपछि दशैंअघि फिल्म क्षेत्रका गतिविधि सुचारु हुने सम्भावना अत्यन्त न्यून देखिएको छ ।
सरकारले छायांकनका लागि औपचारिकरूपमा अनुमति नदिए पनि फिल्म निर्माण भने रोकिएको छैन । गत असार अन्तिममा फिल्म ‘लाइफ इन एलए’ को छायांकन सकियो ।
गएको बुधबार फिल्म ‘आँधी तुफान २’ ले पनि एक महिनाको सेड्युलमा छायांकन पूरा ग¥यो । यसबीच, गत सोमबारबाट फिल्म ‘डाँडाको बरपीपल’ फ्लोरमा गएको छ । धादिङको धार्केबाट फिल्मको छायांकन थालिएको हो ।
६० दिनको छायांकन सेड्युलमा काठमाडौं र चित्लाङमा फिल्म खिचिनेछ । शोभित बस्नेतको निर्देशन रहेको फिल्ममा शिव श्रेष्ठ, भुवन केसी, गौरी मल्ल, सलोन बस्नेत, रुविना थापा, विनोद न्यौपाने, राजीवजंग बस्नेत, अस्मिता जुरेली, हिउँवाला गौतम, उत्तम केसी, संगम भण्डारी, सुशान्तकुमार श्रेष्ठ, प्रभात पल, अस्मी थापा, प्रदीप गिरी, ज्ञानकुमार कट्टेललगायत मुख्य भूमिकामा छन् । बुढासुब्बा ओर्जिनलको प्रस्तुतिमा निर्माण हुने फिल्ममा नवराज गिरीको लगानी छ ।
फिल्ममा रामकाजी घिमिरेको लेखन, सुशान्त प्रजापतिको छायांकन, शिव मुखिया/एलिश कार्कीको संगीत, रोशन श्रेष्ठको द्वन्द्व निर्देशन, गोविन्द राई÷रामजी लामिछानेको नृत्य निर्देशन, मित्रदेव गुरुङको सम्पादन, रामजी राउतको मुख्य सहायक निर्देशन र आकाश बुढाथोकीको सहायक निर्देशन रहनेछ । शिव श्रेष्ठ र भुवन केसीले १६ वर्षपछि एकसाथ फिल्ममा काम गर्न लागेका हुन् । सन् २००५ मा रिलिज भएको शोभित बस्नेत निर्देशित सुपरहिट फिल्म ‘राजु राजा राम’ पछि शिव र भुवनले एकसाथ काम गरेका थिएनन् । १६ वर्षपछि शोभितले नै दुई सुपरस्टारलाई एकसाथ पर्दामा उतार्न लागेका हुन् । त्यस्तै, यो फिल्ममा गौरी मल्ल र शिव श्रेष्ठले करिब २० वर्षपछि एकसाथ काम गरेका छन् ।
