काठमाडौं– स्थानीय प्रशासनले काठमाडौं उपत्यकामा लगाउँदै आएको निषेधाज्ञा थप खुकुलो पार्दै लगेको छ । कोरोना भाइरसको संक्रमण रोकथाम तथा नियन्त्रणका लागि गत १६ वैशाखदेखि जारी गरिएको निषेधाज्ञा खुकुलो पार्दै लगिएको हो । पछिल्लो पटक मंगलबार स्थानीय प्रशासनले निषेधाज्ञा जारी गर्दै राति ८ः०० बजेपछि पनि यातायात सञ्चालन गर्न दिने आदेश गरेको छ ।
स्थानीय प्रशासनले काठमाडौं उपत्यकामा राति ८.०० बजेपछि सवारीसाधन सञ्चालनमा लगाइएको रोक हटाएको हो । उपत्यकाका प्रमुख जिल्ला अधिकारीहरूको मंगलबार भएको बैठकले निजी तथा सार्वजनिक सवारी साधन सञ्चालनमा यसअघि व्यवस्था गरिएको समयावधि हटाइएको जनाएको छ । काठमाडौंका प्रमुख जिल्ला अधिकारी कालीप्रसाद पराजुलीले सवारीसाधन सञ्चालनका लागि यसअघि गरिएको व्यवस्था हटाइएको जानकारी दिएका छन् । उनले साविक बमोजिमको १६ भदौसम्म कोभिड–१९ महामारी नियन्त्रणका लागि जारी गरिएको निषेधाज्ञा भने कायमै रहेको बताएका छन् ।
पछिल्लो पटक २८ साउनदेखि ८ भदौसम्मको निषेधाज्ञाको आदेशमा उपत्यकाका जिल्ला प्रशासन कार्यालयले अत्यावश्यक सेवा, ढुवानीका साधन र उपत्यका प्रवेश गर्ने सवारीसाधन बाहेकका अन्य निजी एवं सार्वजनिक सवारी साधन बेलुका ८.०० बजेभित्र गन्तव्यमा पुगिसक्नु पर्ने उल्लेख थियो ।
त्यस्तै, स्थानीय प्रशासनले काठमाडौं उपत्यकामा भौतिक उपस्थितिमै गोष्ठी, सेमिनारलगायतका क्रियाकलाप गर्न खुला गरेको छ । बैठकले भौतिक उपस्थितिमै बढीमा २५ जनाको सहभागितामा गोष्ठी, तालिम, सेमिनार, बैठक, समीक्षा, प्रशिक्षणलगायतका क्रियाकलाप गर्न पाउने निर्णय गरेको हो ।
यसअघि समूहमा सञ्चालन हुने यस्ता क्रियाकलाप भर्चुअल माध्यमबाट मात्रै गर्न पाउने प्रावधान थियो । प्रशासनले जारी गरेको विज्ञप्तिमा भनिएको छ, ‘गोष्ठी, तालिम, सेमिनार, बैठक, समीक्षा, प्रशिक्षण जस्ता क्रियाकलापहरू सम्भव भएसम्म भर्चुअल माध्यमबाट सञ्चालन गर्ने । भौतिक उपस्थितिमा गर्नुपर्ने भएमा बढीमा २५ जनासम्मको सहभागिता हुने गरी भौतिक दूरी तथा स्वास्थ्य मापदण्डको पूर्ण पालना गरी सञ्चालन गर्न सक्ने छ ।’
यद्यपि सबैप्रकारका सभा, सम्मेलन, पार्टी प्यालेस, सिनेमा हल, डान्सबार, दोहोरी, नाचघर, क्लब, स्वीमिङ पुल, मनोरन्जनस्थल, संग्रहालय, रंगशालामा हुने दर्शकसहितको खेलकुद र मानिसको भिडभाड हुने अन्य कार्यक्रम सञ्चालनमा यसअघि लगाइएको रोक यथावत छ । त्यस्तै, खुला स्थानमा मानिसहरू भेला हुने, सभा, जुलुस, जात्रा, महोत्सव, भोज भतेर आदि गर्न रोक लगाइएको छ । पुजारीबाट हुने नित्य पूजाबाहेकको धार्मिक कार्य, शैक्षिक संस्थानहरूमा भौतिक उपस्थितिमा हुने पठनपाठन र स्थानीय ढुवानी बिहान १ देखि ११ बजेसम्म र अपराह्न ४ देखि ७ बजेसम्म सञ्चालन गर्न रोक लगाइएको छ ।
परीक्षाको हकमा एकै स्थानमा कोठाको आकारअनुसार २५ जनाभन्दा बढी भेला नहुने गरी परीक्षा सञ्चालन गर्न अनुमति दिइएको छ । अन्य प्रावधान यसअघिको आदेशअनुसार यथावत रहेको काठमाडौंका प्रजिअ पराजुलीले जानकारी दिए ।
