नेपाली कलाक्षेत्रमा अभिनेता र मोडलको रूपमा चर्चित छन् जीवन गिरी । २०६८ सालदेखि आधिकारिक रूपमा कलाक्षेत्रमा प्रवेश गरेका गिरी छोटो समयमा नाम, दाम र चर्चा कमाउन सफल छन् । पछिल्लो समय चलचित्र, म्युजिक भिडियो, विज्ञापनलगायत सबै तिर छाउन समेत सफल उनले कलाकारिताबाट विभिन्न पुरस्कार समेत हात पारेका छन् । काभ्रेपलान्चोक बनेपा–२ स्थायी घर भएका गिरी अभिनित फिल्म ‘एउटा साथी, मखमली, सत्यदीप’ रिलिज भएका छन्, भने केही रिलिज हुन बाँकी रहेका छन् । स्वदेटी स्टेजमा मोडलको रूपमा र्याम्प शोसमेत गरेका उनी म्युजिक भिडियो र राम्रा ब्राण्डका विज्ञापन चलचित्रमा पनि देखिँदै आएका छन् । उनी बलिउड फिल्ममा पनि देखिने तरखरमा छन् । अहिले चीनमा आयोजना हुने पुरुषहरूको चर्चित अन्तर्राष्ट्रिय प्रतियोगिता ‘मिष्टर ओसियन २०२१’ मा नेपालको प्रतिनिधित्व गर्ने तयारी गरिरहेका उनी प्रतियोगितामा देश चिनाउने र उपाधि नेपाल भित्र्याउने उद्देश्यका साथ सहभागी हुन लागेका हुन् । प्रस्तुत छ कलाकार मोडल जीवन गिरीसँग गरिएको कुराकानी ।
‘मिष्टर ओसियन’ किन जाँदै हुनुहुन्छ ?
— मिष्टर ओसियन एक विश्व चर्चित प्रतियोगिता हो । प्रतियोगितामा विभिन्न देशका सहभागी हुने भएकोले देश चिनाउने उद्धेश्यका साथ म प्रतियोगितामा सहभागी हुन लागेको हो । अर्काे कुरा मानिसहरूका लागि म प्रेरणाको स्रोत पनि बन्न खोजेको हो । प्रत्येक मानिस एक नायक हो । सबैमा आ–आफ्नै ब्यक्तित्व र प्रतिभा हुन्छ । यदि तपाईंले आफ्नो भित्री मनबाट चाहनुहुन्छ भने निश्चित रूपमा संसार जित्नु हुनेछ । यो कुराको म संसारलाई प्रेरणा दिन चाहन्छु । जसका लागि विगत एक महिनादेखि नृत्य, फिटनेस, कोरियोग्राफीदेखि विभिन्न तयारी गरिरहेको छु ।
यो पटक ‘मिष्टर ओसियन’को उपाधि नेपाल भित्रिएला त ?
— उद्देश्य मेरो त्यही हो । त्यसका लागि आफूलाई तयार समेत गरिरहेको छु । आसा गरौँ यो पटक उपाधि नेपाल आउनेछ ।
मोडलिङ र कलाकारिता पनि एकसाथ अगाडि बढाइरहनु भएको छ । कतिको सहज छ ?
— मोडलिङ र कलाकारिता एक अर्काेसँग जोडिएको पाटो हो । केही फरक भए पनि दुवैमा धेरै समानता रहेको छ । त्यसैले अहिलेसम्म खासै अप्ठ्यारो परेको छैन ।
किन रोज्नु भयो कला क्षेत्र ?
— सानैदेखि अभिनयमा रुचि थियो । विद्यालयमा पनि विभिन्न क्रियाकलाप गरेर पुरस्कार जित्थे । आफूसँग कलाकारिताका लागि चाहिने खुबी पनि थियो र यो क्षेत्रमा केही गर्न चाहन्थे । त्यसैले कलाकारिता होमिए ।
अहिलेसम्मको अनुभव कस्तो रह्यो ?
– मेरो हकमा कलाकारिताको अनुभव सुखद नै छ । पहिले कस्तो थियो थाहा भएन । अहिले कला क्षेत्र राम्रो छ । मिहिनेत गर्ने र निरन्तरता दिनेका लागि अन्य काम केही सोच्न पर्दैन । नाम, दाम, चर्चा सबै छ । कोरोनाले केही समय सुस्ताएको अवस्था हो ।
कोरोनाले तपाईंलाई कस्तो प्रभाव पार्यो ?
– कोरोनाले गर्दा फिल्मका गतिविधि रोकिएका छन् । त्यसले गर्दा धेरै कलाकार बेरोजगार भएका छन् । मेरो हकमा पनि केही प्रभाव पारेको छ । तर, कामबिहीन भने हुनुपरेको छैन । यो समय पनि मैले अनलाइन विज्ञापन, विज्ञापन चलचित्र र म्युजिक भिडियोले गर्दा खाली बस्नु परेको छैन ।
फिल्म हल बन्द छन्, चलचित्र रिलिज हुन सकेको छैन नि ?
– हो । तर, अहिले हलकै भर पर्नुपर्छ भन्ने मलाई लाग्दैन । बलिउड चलचित्र उद्योगले ठूला ठूला फिल्म डिजिटल प्लेटफर्मबाट रिलिज गरेर लगानी सुरक्षित गरेका छन् । हाम्रोमा पनि त्यस्तो प्लेटफम छन् । कोरोनाको कारण घरमा रहेका दर्शकका लागि डिजिटल प्लेटफर्मको सदुपयोग गरेर फिल्म रिलिज गर्न सकिन्छ । यसो गर्दा लगानी पनि सुरक्षित हुन्छ । अब सबैले त्यता प्लेटफर्ममा ध्यान दिने बेला आयो ।
फिल्म, म्युजिक भिडियो, विज्ञापन सबैमा छाउनु भएको छ । कुनको काम सजिलो ?
– सबै कलाकारिताको पाटा हुन् । केही हदसम्म एक अर्काेजस्तै हुन् । एउटा कलाकारका लागि म्युजिक भिडियो, फिल्म र विज्ञापन चलचित्रमा केही भिन्न हुँदैन । उसले अभिनय देखाउने हो । विज्ञापन र म्युजिक भिडियोमा थोरै समय दिए पुग्छ र छिट्टै बाहिर आउँछ, भने फिल्मलाई धेरै समय दिनुपर्छ । कलाकारिताको खुबी छ सबैबाट राम्रो गर्न सकिन्छ ।
हिरोका लागि फिटनेश कति आवश्यक छ ?
– कलाकारका लागि मात्र होइन, स्वस्थ रहन हरेक मानिसलाई फिटनेश आवश्यक विषय हो । कलाकारितामा लागेको ब्यक्तिका लागि यो निकै महत्वपूर्ण छ । किनभने पर्दामा आफूलाई फिट एण्ड फाइन देखाउन र आफू स्वस्थ फिटनेशमा ध्यान दिनुपर्छ ।
फेसनतिर रुचि त पक्कै होला ?
– रुचि छ । टिपटप भएर हिँड्न मनपर्छ । नर्मल मलाई क्याजुअल ड्रेसहरू मनपर्छ । सेतो सर्ट, कालो पाइन्ट, मरुन कलरका पहिरन, सुटपाइन्ट र दौरा सुरुवालमा म आकर्षक देखिन्छु ।
कस्तो केटा तपाईं ?
– म हेर्दा राम्रो, सिम्पल, फ्रेण्ड्ली र मिहिनेती छु । सबैसँग सजिलै घुलमिल हुनसक्छु ।
प्रेममा हो र ?
– छैन, छैन । अहिले करियर बनाउने दौडमा छु । प्रेममा रमाउने समय छैन ।
कस्तो केटी मनपर्छ ?
— मलाई बुझ्ने, धेरै माया गर्ने, बानी ब्यहोरा राम्रो भएको केटी मनपर्छ ।
सपना पनि त होला नि ?
– नेपाली दर्शकका लागि धेरै राम्रा राम्रा फिल्म दिन चाहन्छु । हलिउड र बलिउडको फिल्म पनि खेल्ने सपना हो । एक बलिउड फिल्मको त अहिले कुरो भइरहेको छ । हेँरौ के हुन्छ ।
